Taratasy nisoratin’i Jakoba
4 Ino ma mahavy anarô miady ndreky mimalo? Tsy baka amy fan̈irian̈an’ny nôfotronarô tihibeko anarô* ndraiky mahavy anarô man̈ano raha aby zen̈y? 2 Misy raha irinarô kanefa tsy mety azonarô. Anarô tsy vôly mamono olo ndreky mitsiriritry, kanefa tsy mety azonarô raha tadiavinarô. Anarô tsy vôly mimalo ndreky miady. Anarô tsy manan̈a, fôtony anarô tsy mangataka. 3 Ary ndray anarô mangataka, tsy ho azonarô raha hangatahanarô, fôtony ratsy antony mahavy anarô mangataka izio. Anarô bakà raha tihan̈amia fahafaham-pô fan̈irian-dratsin’ny nôfotronarô fo!
4 Anarô mivadiky!* Tsy hainarô ma fa anarô koa minaman̈a amy donia ty, anarô manjary fahavalon’ny Zan̈ahary? Ia, lan̈iany olo tihinaman̈a amy donia ty manjary fahavalon’ny Zan̈ahary. 5 Sambaranarô tsisy antony ma mahavy Soratra Masin̈y mivolan̈a: “Fitsiriritan̈a an̈atintsika ao tsy mety afa-pô foeky”? 6 Kanefa hatsaram-pan̈ahy miavaka* aboakan’ny Zan̈ahary mbala be lavitry. Karaha ty bakà ho Soratra Masin̈y: “Zan̈ahary manohitry olo man̈ambony ten̈a, fa olo manetry ten̈a ndraiky han̈aboahany hatsaram-pan̈ahy miavaka.”
7 Ke areha volan̈an’ny* Zan̈ahary, baka iô tohera Devoly fa izy hilefa anarô edy. 8 Anarô man̈ataon̈a Zan̈ahary fa izy han̈aton̈o anarô edy. Anarô mpanota aby io, diova tan̈anarô; aviô anarô mpisalasala aby io, diova fônarô. 9 Anarô mila miôry ndreky malahelo aviô mitomoan̈y. Anarô tsy tôkony himoehy fa halahelo, aviô anarô tsy tôkony ho ravoravo fa ho kivy. 10 Anarô mifen̈a hanetry ten̈a man̈oloan̈a Jehovah, fa izy han̈amia voninahitry* anarô edy.
11 Rahalahy aby, anarô mivoleza mifankaratsy. Lan̈iany olo mankaratsy rahalahy na mitsara rahalahiny, izy mankaratsy lalàn̈a sady mitsara lalàn̈a. Ke izikoa anao mitsara lalàn̈a, tsy mpan̈araka lalàn̈a edy anao zen̈y fa mpitsara. 12 Araiky fo Mpan̈amia Lalàn̈a ndreky Mpitsara, tsy azôvy zen̈y fa Zan̈ahary. Izy zaraiky fo mahavita man̈avotro ndreky mandripaka. Fa anao ke, azôvy ma anao ke handeha hitsara olo miran̈a anao?
13 Anarô mivolan̈a: “Amaray na afak’amaray zahay handeha amy tany karaha zen̈y oe, ke zahay hidôko an̈y taon̈o araiky aviô zahay hivarotro, amy zen̈y zahay hahazo vola”,* 14 kanefa tsy hainarô aby han̈ano akôry fiainan̈anarô amaray. Anarô bakà miran̈a zavon̈o: Mihelan̈a fo aviô betibetiky efa ravan̈a edy. 15 Fa anarô tôkony hivolan̈a karaha ty: “Izikoa sitrapôn’i Jehovah, aviô izikoa zahay mbala velon̈o, ty ndreky ty raha hataonay.” 16 Fa anarô ndraiky mirehareha, aviô werawera sady man̈ambony ten̈a. Ratsy mare izikoa anarô werawera karaha zen̈y. 17 Ke izikoa misy olo mahay raha tôkony hataony kanefa izio tsy hataony, izy manota.