Taratasy voanalohany handeha amy Timoty
1 Baka amy Paoly, apôstôlin’i Kristy Jesosy sady irakan’ny Zan̈ahary Mpan̈avotro atsika ndreky irakan’i Kristy Jesosy fan̈antinan̈antsika, 2 handeha amy Timoty,* zanako tsy mivadiky salakady man̈ano asan’ny Tômpo:
Irarian̈a anao han̈aboahan’ny Zan̈ahary Babantsika ndreky Kristy Jesosy Tômpontsika hatsaram-pan̈ahy miavaka, aviô irarian̈a irô hamindra fô aminao ndreky han̈amia anao fiadanan̈a.
3 Azonao onon̈o zaho nan̈iraka anao hidôko ta Efesôsy, taloha helin’ny zaho handeha a Makedonia in̈y? Zaho ziôty mbala man̈iraka anao hidôko ao fo, amy zen̈y anao hanakan̈a olo sasany tsy hampianatra raha diso, 4 na hitandren̈y tantara tsy marin̈y, na handiniky tetirazan̈a. Irô raha aby io tsisy dikany sady mahavy olo hivolambolan̈a raha tsy azondrô antoko, fa tsy mampianatra* raha baka amy Zan̈ahary. Kanefa raha baka amy Zan̈ahary mahavy finoan̈an’olo hatanjaka. 5 Ny marin̈y aminany, nan̈amia toromariky in̈y zaho amy zen̈y atsika hanan̈a fitiavan̈a baka amy fanan̈antsika fô madio ndreky eritreritry madio aviô finoan̈a ten̈a izy.* 6 Fa olo sasany tsy miasalohan’ny* hifankatia ndreky hanan̈a finoan̈a matanjaka zen̈y, ke irô nanjary nan̈ano koran̈a tsisy dikany. 7 Irô tiho mpampianatra lalàn̈a, kanefa tsy haindrô aby raha volan̈indrô ndreky raha izingizin̈indrô mare be io.
8 Haintsika fa Lalàn̈a io tsara izikoa arehan̈a erakan’ny tôkony ho izy. 9 Lalàn̈a bakà tsy natao nin’olo marin̈y fa nin’olo mpandika lalàn̈a ndreky nin’olo mierin̈y olo, nin’olo tsy mavozo Zan̈ahary ndreky nin’olo mpanota, nin’olo tsy mety atokisan̈a ndreky nin’olo tsy man̈isy fôtiny raha masin̈y, nin’olo mpamono olo, an̈isan’izen̈y olo mamono babany ndreky mamono reniny, 10 nin’olo mijangajanga,* nin’ny lelahy man̈ano firaisan̈a amy lelahy,* nin’olo mangalatra olo, nin’olo mavandy, nin’olo tsy mitana vava nataony, aviô nin’olo jiaby man̈ano raha mifanohitry amy fampianaran̈a marin̈y.* 11 Fampianaran̈a io baka amy Zan̈ahary ravoravo, sady mifan̈araka amy vaovao tsara be voninahitry nankin̈iny taminaka.
12 Zaho man̈ano mersy Kristy Jesosy Tômpontsika, araiky nan̈amia angôvo zaho, fôtony izy natoky zaho ke nan̈iraka zaho han̈ano asa masin̈y. 13 Ia, izy natoky zaho ndray zaho taloha tsy nan̈isy fôtiny Zan̈ahary, ndreky nan̈enjiky mpanomponany, aviô nan̈ambany olo. Baka tamy tsy fahaizako raha ndreky baka tamy zaho tsy ampy finoan̈a nahavy zaho nan̈ano raha aby zen̈y. Kanefa, Kristy namindra fô taminaka. 14 Ten̈a be ankitin̈y hatsaram-pan̈ahy miavaka naboakan’ny Tômpontsika* taminaka. Izy nan̈ampy zaho mare baka zaho hatoky izy, aviô baka aminany koa nahavy Kristy Jesosy han̈aboaka fitiavan̈a aminaka. 15 Marin̈y salakady mety atokisan̈a volan̈a ty: Kristy Jesosy navy tamy donia ty baka hamonjy olo mpanota. Zaho ny voanalohany amin’olo mpanota aby zen̈y. 16 Fa ndray zen̈y, Kristy Jesosy namindra fô taminaka, amy zen̈y baka aminaka han̈aboahany fa izy ten̈a mahari-draha ankitin̈y. Zaho nataony môdely nin’olo mbala hino izy, baka irô hahazo fiainan̈a tsisy farany.
17 Zan̈ahary taokan̈a salakady tsy hita maso, araiky Mpanjaka mandrakizay sady tsy mety maty* zaraiky fo man̈eva hahazo dera ndreky voninahitry mandrakizay mandrakizay. Ameny.
18 Toromariky namiako anao in̈y, Timoty zanako, mifan̈araka amindrô faminanian̈a momba anao aby in̈y. Irô in̈y han̈ampy anao hanohy han̈ano ady tsara. 19 An̈atin’ny anao miady zen̈y, mifen̈a fo hanan̈a finoan̈a ndreky feon’ny fieritreretan̈a madio. Olo sasany bakà tsy nifen̈y hanan̈a eritreritry madio, ke irô nanjary karaha olo vaky sambo izikoa finoan̈a koran̈iny. 20 An̈isandrô olo aby zen̈y i Hymeneo ndreky Aleksandra. Irô io nadosoko tsy an̈isan’ny fiangonan̈a,* amy zen̈y baka amy sazy nazondrô zen̈y irô hianatra havozo Zan̈ahary.