Taratasy handeha amindrô he Letter to the Filipianin̈y aby io
4 Ke nohon’izen̈y, rahalahiko tiako aby salakady mampangaoma zaho, mifen̈a mare tsy hivadiky amy Tômpo;* anarô rahalahiko tiako aby haravoan̈anaka ndreky satroboninahitrinaka.
2 Zaho mandrisiky Eodia ndreky Syntyke handamin̈y raha tsy fan̈arahandrô,* fôtony irô mpan̈ara-dia Tômpo. 3 Aviô, zaho miangavy anao, araiky ten̈a miaraka miasa aminaka,* tsy vôly han̈ampy irô man̈angy aby io. Irô io nifen̈y mare nan̈ambara vaovao tsara niaraka taminaka ndreky tamy Kleman, baka iô tamin’olo hafa miaraka miasa aminaka koa. Voasoratra amy bokin’ny fiainan̈a ao aby an̈aran̈andrô jiaby io.
4 Miravoravoa fo fôtony anarô mpanompon’ny Tômpo. Ampodiko ndraiky: Miravoravoa! 5 Aboaha olo jiaby fa anarô mahay mandanjalanja. Tômpo io tsy lavitry atsika. 6 Anarô aza miasaloha foeky, na momba ino zen̈y na momba ino, fa koran̈esa amy Zan̈ahary raha jiaby ke iangavia izy hitari-dalan̈a anarô, aviô aza vôly man̈ano mersy izy. 7 Ke fiadanan̈an’ny Zan̈ahary hiaro* fônarô ndreky jerinarô*, fôtony anarô mino Kristy Jesosy. Izio mihoatra lavitrin’ny raha jiaby takatran’ny jerin’olombelon̈o.
8 Ke farany, rahalahy aby, zay raha marin̈y, zay raha matomboko, zay raha mety, zay raha madio, zay raha vain̈y tiavin̈y, zay raha tsara laza, zay raha tsara, aviô zay raha man̈eva derain̈a, zen̈y fo iritrireta. 9 Areha fo raha nianaranarô taminaka, raha nikenarô baka taminaka, raha ren̈inarô nivolan̈iko, aviô raha hitanarô nataoko; baka iô irarian̈a Zan̈ahary han̈amia fiadanan̈a anarô ndreky hitahy anarô.
10 Zaho ravoravo mare salakady man̈ano mersy Tômpo, fôtony ela ny ela anarô nimpody nieritreritry raha mahatsara zaho ndraiky koa. Anarô bakà efa tihan̈ampy zaho fo, fa anarô fo tsiary nahita fomba han̈anaovan̈a zen̈y. 11 Tsy nohon’ny zaho an̈atin’ny fahasahiran̈ana mahavy zaho mivolan̈a zen̈y, fôtony zaho efa nianatra ho afa-pô amy raha misy iô.* 12 Haiko karakôry mihafy zen̈y, aviô haiko koa karakôry manan-draha zen̈y. Amy raha jiaby, ndray ino ndray ino raha mandalo, na voky eky zaho na silaon̈o, baka iô na manan-draha na tsisy raha foeky, zaho efa nianatra ho afa-pô.* 13 Zaho manan̈a angôvo hiatrefan̈a raha jiaby, fôtony Zan̈ahary man̈amia angôvo zaho.
14 Ndray izy man̈ano zen̈y, tsara raha nataonarô fôtony anarô nan̈ampy zaho tamy zaho tan̈atin’ny sarotro. 15 Anarô a Filipỳ bakà mahay tsarabe fa, tafaran’ny anarô somilany naharen̈y vaovao tsara, zaho koa fa niala ta Makedonia, anarô zaraiky fo fiangonan̈a nan̈ampy zaho ndreky nan̈eky hampiako. 16 Aviô, tamy zaho ta Tesalônìky, tsy indraiky fo fa indroe aby zaho nandifasanarô raha baka zaho nahazo raha nilaiko. 17 Tsy zaho tihahazo raha* mahavy zaho mivolan̈a zen̈y, fa tiako izikoa anarô mahazo hatsaran̈a baka amin’ny anarô mazoto man̈amia raha olo. 18 Anan̈ako aby raha jiaby ilaiko; ndray izy aby mandilatra foeky. Tsisy raha mampiôry zaho, fôtony nazoko aby raha jiaby nampitondrasinarô i Epafrodito. Irô io miran̈a han̈itry tsara ndreky sôron̈o ten̈a mamparavoravo Zan̈ahary. 19 Ary Zan̈aharinaka mpan̈arivo voninahitry io ndraiky hampiasa Kristy Jesosy han̈amia anarô raha jiaby ilainarô. 20 Ameza voninahitry mandrakizay mandrakizay Zan̈ahary Babantsika! Ameny.
21 Sambitsara amin’olo masin̈y jiaby, tsy amin-jôvy zen̈y fa amin’olo jiaby man̈ara-dia Kristy Jesosy. Sambitsara zen̈y koa anarô ho irô rahalahy miaraka aminaka atỳ. 22 Olo masin̈y jiaby, intsaka eky irô miasa amy lapan’i* Kaisara ao, mandefa sambitsara aminarô.
23 Irarian̈a Jesosy Kristy Tômpo han̈aboaka hatsaram-pan̈ahy miavaka aminarô, fôtony anarô manan̈a toe-tsain̈y tsara!