Taratasy voanalohany handeha amy Timoty
6 Olo araiky koa mpanompo,* izy tôkony han̈aja tômponany mare, amy zen̈y olo tsy han̈aratsy an̈aran̈an’ny Zan̈ahary ndreky fampianaran̈anany. 2 Izikoa misy olo miasa amin’olo ke olo iasany io mpan̈ara-dia Kristy karaha izy, izy tsy tôkony han̈araraotro olo io fôtony izio rahalahiny. Izy tôkony ho vôn̈ono hiasa mare fôtony rahalahiny* sady mpiara-manompo aminany olo mahazo hatsaran̈a baka amin’ny asa mare ataony io.
Ampianara olo fo raha jiaby nivolan̈iko taminao aby in̈y, aviô aza vôly mampirisiky irô han̈araka irô in̈y. 3 Zay olo mampianatra raha diso, na tsy man̈eky fampianaran̈a* baka amy Jesosy Kristy Tômpontsika, na mampianatra raha mety hahavy atsika hivadiky amy Zan̈ahary, 4 izy man̈ambony ten̈a sady tsisy raha hay. Izy faran-draha tia malo ndreky tia miady hevitry eky. Raha aby zen̈y mahavy olo ho be fô, hankany, han̈odihody raha tsy ataon’olo,* ndreky tsy hatoky olo. 5 Baka amy raha aby zen̈y koa mahavy irô olo aby ratsy jery ndreky niala amy fampianaran̈a ten̈a izy* io tsy vôly himalo momba raha tsisy dikany, fôtony irô mieritreritry fa fanompoan̈a Zan̈ahary io fomba hazahoandrô raha. 6 Ndray izy man̈ano zen̈y, hahazo hatsaran̈a* maro atsika izikoa atsika manompo Zan̈ahary sady mahay afa-pô amy raha anan̈antsika. 7 Tamin’ny atsika teraka bakà atsika tsy nitondra raha, karaha zen̈y koa lera atsika maty, atsika tsy hahavita hitondra raha. 8 Ke izikoa atsika misy raha hoanin̈y ndreky lamba sikinin̈y, atsika tôkony ho afa-pô amy zen̈y.
9 Lan̈iany olo tapa-kevitry hanjary mpan̈arivo, izy latsaka an̈atin’ny fandriky sady resin’ny fakam-pan̈ahy ndreky fan̈irian̈a maro tsisy dikany sady mandrobaka. Fan̈irian̈a aby zen̈y hahavy izy hijaly mare ndreky ho foaty. 10 Fôtony fitiavam-bola an̈isan’ny fôtotron’ny raha tsy manjary jiaby. Olo sasany nanjary tia vola loatra, ke irô vôly nino raha inoantsika* ndreky nampiditry prôblemo maro amin’ny ain̈indrô.
11 Fa anao ndraiky Timoty, aza man̈ano raha aby zen̈y, fôtony anao mpanompon’ny Zan̈ahary. Mifen̈a fo han̈ano ny marin̈y, tsy hivadiky amy Zan̈ahary,* hanan̈a finoan̈a, han̈aboaka fitiavan̈a, hiaritry, ndreky halemy toetry. 12 Araova angôvo jiaby raha inoanao.* Zan̈ahary nikaiky anao amy zen̈y anao hahazo fiainan̈a tsisy farany. Ke ataova zay raha tôkony hataonao misy hazahoanao izio, aviô koran̈esa amin’olo jiaby raha momba izio.
13 Man̈oloan̈a Zan̈ahary, tsy azôvy zen̈y fa araiky mahavy raha jiaby mbala velon̈o fo, ndreky man̈oloan̈a Kristy Jesosy, araiky tsy navozovozo nitory tamy Pontio Pilato, ty raha an̈irahako anao: 14 Areha tsarabe didy namezan̈a anao, aviô mifen̈a baka tsisy olo han̈amia tsin̈y anao amy fomba han̈arehanao izio, parapavian’ny fotoan̈a himpodianan’i Jesosy Kristy Tômpontsika. 15 Izy mpitondra ravoravo. Amy fotoan̈a voatôndro, izy han̈aboaka angôvonany. Izy an̈abon̈abon’ny mpitondra jiaby, baka iô izy koa an̈abon̈abon’ny tômpo jiaby.* 16 Izy zaraiky fo tsy mety maty, aviô izy mipetraka amy tany mazava mare ke tsisy olo afaka man̈aton̈o izio na mahita izio na mahavita mizaha izio. Irarian̈a izy hahazo voninahitry, baka iô irarian̈a angôvonany haharitry mandrakizay. Ameny.
17 Anàra irô mpan̈arivo aby io* baka irô tsy han̈ambony ten̈a ndreky tsy hatoky fanan̈anandrô, fa hatoky Zan̈ahary. Fanan̈ana aby io bakà tsy azo antoko, fa Zan̈ahary ndraiky mahavita man̈amia atsika raha jiaby mamparavoravo atsika, sady amezany maro amy raha aby zen̈y koa atsika. 18 Iràha irô han̈ano ny tsara, ndreky hazoto han̈ano asa tsara, aviô tsy hatity, baka iô hazoto handrasa. 19 Izikoa irô man̈ano zen̈y, irô hamory harian̈a baka amy Zan̈ahary ke ho azo antoko hoavindrô. Ia, irô hahazo fiainan̈a nampan̈antinain’ny Zan̈ahary.*
20 A Timoty, araova raha nankin̈in’ny Zan̈arahy taminao. Aza mitandren̈y koran̈a tsisy dikany ataondrô olo manohitry Zan̈arahy aby io, aviô aza mitandren̈y koran̈a ataon’olo mieritreritry fa irô mahay raha kanefa raha haindrô io mifanohitry amy raha marin̈y. 21 Olo sasany nanjary nan̈araka fampianaran̈a aby zen̈y, ke irô niala tamy raha inoantsika.
Irarian̈a anao han̈aboahan’ny Zan̈ahary hatsaram-pan̈ahy miavaka.