Vaovao Tsara Nisoratin’i Matio

25 “Ke Fanjakan̈an’​ny lan̈itry io mety ampitovisin̈y amy virjiny folo nitondra lalampon̈ondrô sady niboaka hitsena mpan̈ainga. 2 Dimy amindrô io tsy misain̈y, aviô dimy amindrô io misy jery.* 3 Irô tsy misain̈y aby io nitondra lalampon̈ondrô, fa irô fo tsy nitondra menaka.* 4 Irô misy jery aby io ndraiky nitondra lalampon̈ondrô, sady nitondra menaka tan̈atin’​ny tavoangy. 5 Somary mbala elaela mpan̈ainga, ke sokoen-tôro irô jiaby, aviô irô tafandry. 6 Izikoa fa sasakalin̈y, nisy olo nandronton̈o karaha ty: ‘Indriô mpan̈ainga! Miboaha anarô hitsena izy.’​ 7 Ke nitsangana irô virjiny folo aby io, baka iô irô samby nan̈amboamboatra lalampon̈ondrô. 8 Ho irô virjiny tsy misain̈y aby io tamindrô virjiny misy jery aby io: ‘Mba an̈ameza hely amy menakanarô kony zahay fa lalampon̈onay efa ho foaty.’​ 9 Fa ho irô misy jery aby io: ‘Izity donko tsy hahampy atsika jiaby ay, fa mindao sitrany anarô mandeha mivanga amy mpivarotro an̈y.’​ 10 Irô koa fa lôso nivanga menaka, navy mpan̈ainga. Irô virjiny efa vôn̈ono aby io niditry tamy tany han̈anaovan̈a mariazy io niaraka taminany, baka iô nafody varavaran̈a. 11 Tafaran’​izen̈y, navy koa irô virjiny dimy hafa aby in̈y, ke ho irô: ‘A tômpoko anao, a tômpoko anao, mba biafa kony zahay e!’​ 12 Ho izy tamindrô: ‘Ambarako anarô ny marin̈y ay, anarô tsy haiko.’

13 “Ke anarô miambesa fo, fôtony tsy hainarô andra ndreky lera.

14 “Fanjakan̈an’​ny lan̈itry io koa mety ampitovisin̈y amy lelahy araiky handeha an-tany lavitry, ke izy nikaiky mpanomponany, baka iô nankin̈iny tamindrô fanan̈ananany. 15 Hain’​ny lelahy io raha mety ho vitan’​ny* mpanomponany tsiaraikiaraiky, ke araiky voanalohany namezany volafotsy talenta* dimy, araiky faharoe namezany aroe, aviô araiky fahatelo namezany araiky. Izy baka iô lôso an-tany hafa. 16 Direkty nandeha araiky nahazo volafotsy talenta dimy in̈y, ke izikoa fa nampiasainy vola io, nahazo talenta dimy hafa koa izy. 17 Araiky nahazo talenta aroe in̈y koa nahazo talenta aroe hafa. 18 Fa araiky nahazo talenta araiky in̈y ndraiky lôso nandeha nangady lavaka, baka iô naleviny tao volan’​ny* tômponany.

19 “Ela be tafara tatỳ, navy tômpondrô mpanompo aby io, ke nan̈ontaniany irô karakôry fandehan’​ny vola nampitanany irô. 20 Ke nan̈aton̈o izy araiky nahazo talenta dimy in̈y, sady nitondra talenta dimy hafa. Ho izy: ‘A tômpo, zaho nan̈ankin̈anao talenta dimy; zahava baka, zaho nahazo dimy hafa koa.’​ 21 Ho tômponany taminany: ‘Tsara zen̈y, mpanompo tsara sady atokisan̈a! Anao natokisan̈a tamy raha vitsivitsy, ke hitindreko hikarakara raha maro anao. Mavia hiaraka hiravoravo amy tômponao.’​ 22 Nan̈aton̈o koa araiky nahazo talenta aroe in̈y, baka iô ho izy: ‘A tômpo, zaho nan̈ankin̈anao talenta aroe; zahava baka, zaho nahazo aroe hafa koa.’​ 23 Ho tômponany taminany: ‘Tsara zen̈y, mpanompo tsara sady atokisan̈a! Anao natokisan̈a tamy raha vitsivitsy, ke hitindreko hikarakara raha maro anao. Mavia hiaraka hiravoravo amy tômponao.’

24 “Farany, nan̈aton̈o mpanompo nahazo talenta araiky in̈y, ke ho izy: ‘Tômpo, haiko fa anao olo sarôtin-draha, baka iô anao mijinja amy tany tsy namafazanao, aviô olo hafa mikorôko kanefa anao ndraiky mamory. 25 Zaho navozo, ke lôso zaho nangady lavaka aviô naleviko tao talentanao. Ty oe rahanao.’​ 26 Ho tômponany taminany: ‘Mpanompo ratsy fan̈ahy sady kamo! Hainao tsarabe fa zaho mijinja amy tany tsy namafazako, aviô olo hafa mikorôko kanefa zaho mamory, 27 ke nan̈ino fo basy volanaka tsy nadôkonao tamy banky tan̈y, misy angalako izy miaraka amy zanabola lera zaho avy?

28 “ ‘Adosoa aminany talenta araiky in̈y, baka iô izio ameza araiky nahazo talenta folo in̈y. 29 Fôtony lan̈iany olo manan̈a, mbala hamezan̈a beben’​ny efa anan̈any, ke ho maro ankitin̈y raha hanan̈any; fa lan̈iany olo tsy manan̈a ndraiky, ndray raha hely anan̈any fo mbala hadoso aminany. 30 Baka iô atsipia amin’​ny hiziky ambelan̈a an̈y mpanompo tsisy raha ilàn̈a izy io. An̈y izy hitomoan̈y aviô ho meloko ndreky ho diso fan̈antinan̈a.’​*

31 “Lera Zanak’​olo ho avy amy voninahitrinany, miaraka amin’​ny anjely jiaby, izy hipetraka amy sezy fiandrianan̈anany be voninahitry. 32 Firenena jiaby havory man̈oloan̈a izy iô, ke izy han̈avaka olo, karaha ataon’​ny mpiambin̈y ôndrikôndriky man̈avaka ôndrikôndriky amy bengy. 33 Ke ôndrikôndriky hataony ankavanan̈anany, fa bengy ndraiky hataony ankavianany.

34 “Mpanjaka io baka iô hivolan̈a amindrô ankavanan̈anany aby io: ‘Mavia anarô lan̈iany nahazo hatsaran̈a baka tamy Babako, izy efa nan̈oman̈a Fanjakan̈a ninarô rango nisian’​olombelon̈o,* ke alaiva lovanarô. 35 Fôtony tamy zaho silaon̈o, zaho namezanarô raha hoanin̈y; tamy zaho tihigiaka, zaho namezanarô raha higiahan̈a; vahiny zaho, nataonarô karibo an-tran̈o; 36 tamy zaho tsisy lamba sikinin̈y,* zaho nampisikininarô; tamy zaho narary, zaho nikarakarainarô; aviô tamy zaho nigadra, zaho nivangianarô.’​ 37 Ke irô olo marin̈y aby io hivolan̈a aminany karaha ty: ‘Tômpo, ndraiky ombian̈a ma anao hitanay silaon̈o ke namezanay raha hoanin̈y, na tihigiaka ke namezanay raha higiahan̈a? 38 Ndraiky ombian̈a ma anao vahiny ke nataonay karibo an-tran̈o, na tsisy lamba sikinin̈y ke nampisikininay? 39 Ndraiky ombian̈a ma anao hitanay narary na nigadra ke nivangianay?’​ 40 Ke Mpanjaka io hivolan̈a amindrô karaha ty: ‘Ambarako anarô mazava tsarabe fa, zay raha nataonarô tamin’​ny araiky tamindrô farany madiniky amy rahalahiko aby ty, nataonarô taminaka koa.’

41 “Karaha ty ndraiky raha hivolan̈iny amindrô ankavianany aby io: ‘Mialà aminaka eto, anarô voaozon̈o aby ty, ke mandihana amy môtro mirehitry mandrakizay nataokan̈a nin’​i Devoly ndreky nindrô anjelinany aby io. 42 Fôtony tamy zaho silaon̈o, zaho tsy namezanarô raha hoanin̈y; aviô tamy zaho tihigiaka, zaho tsy namezanarô raha higiahan̈a. 43 Vahiny zaho, tsy nataonarô karibo an-tran̈o; tamy zaho tsisy lamba sikinin̈y, zaho tsy nampisikininarô; aviô tamy zaho narary ndreky nigadra, zaho tsy nikarakarainarô.’​ 44 Ke irô io koa mba hivolan̈a aminany karaha ty: ‘Tômpo, ndraiky ombian̈a ma anao hitanay silaon̈o, na tihigiaka, na vahiny, na tsisy lamba sikinin̈y, na narary, na nigadra, ke tsy nikarakarainay?’​ 45 Karaha ty raha handeha hivolan̈iny amindrô: ‘Ambarako anarô mazava tsarabe fa, zay raha tsy nataonarô tamin’​ny araiky tamindrô farany madiniky aby ty, tsy nataonarô taminaka koa.’​ 46 Irô io haripaka* mandrakizay, fa olo marin̈y ndraiky hahazo fiainan̈a tsisy farany.”