Vaovao Tsara Nisoratin’i Marka
10 Jesosy baka tiô niala tiô, baka iô izy nitsaka tandaforehin’ny Ten̈aranon’i Jordany, ke nandeha tamy sisin-tanin’i Jodia. Vory nan̈odidin̈y izy ndraiky koa vahoaka; ke karaha efa fataony, irô nampianariny. 2 Nisy Fariseo nan̈aton̈o izy fôtony irô tihitsapa jery izy. Ke irô nan̈ontany izy asa lelahy mety misaraka amy vadiny. 3 Ho izy tamindrô: “Ino ma didy namezan’i Mosesy anarô?” 4 Ho irô: “Mosesy nan̈aomba lelahy hanoratra taratasin’ny divorsy hamian̈a vadiny, zay izy vo misaraka aminany.” 5 Fa ho Jesosy tamindrô: “Anarô mierin̈y olo.* Zen̈y nahavy izy nanoratra didy zen̈y taminarô. 6 Fa tamy Zan̈ahary niasa olombelon̈o tamy voanalohany tan̈y, ‘irô io nataony lelahy ndreky man̈angy. 7 Zen̈y mahavy lelahy hiala babany ndreky reniny, 8 ke hanjary nôfotro araiky fo irô roe’, ia, efa tsy aroe eky irô fa nôfotro araiky fo. 9 Olo koa fa natambatran’ny Zan̈ahary lazòko araiky, irô tsy tôkony hisarahan’olo.” 10 Irô koa fa tan-tran̈o ndraiky koa, mpianatranany aby io nan̈ontany izy momba raha zen̈y. 11 Ho izy tamindrô: “Lan̈iany lelahy misaraka amy vadiny ke manambady olo hafa, izy mandiadia vady. 12 Aviô izikoa man̈angy araiky misaraka amy vadiny ke manambady olo hafa, izy misengy.”
13 Nisy tsaiky nindesin’olo taminany tiô baka izy hikasiky irô, fa irô nisiahan’ny mpianatra aby io. 14 Jesosy koa fa nahita raha zen̈y, izy neloko. Ho izy tamindrô: “Ambilànarô irô tsaiky aby io man̈aton̈o zaho, fa aza sakanan̈a, fôtony nin’olo karaha irô io Fanjakan̈an’ny Zan̈ahary. 15 Ambarako anarô marin̈y tsarabe fa, lan̈iany olo tsy man̈eky Fanjakan̈an’ny Zan̈ahary karaha ataon’ny tsaiky hely, izy tsy ho tafiditry ao foeky.” 16 Ke irô tsaiky aby io nitolon̈iny aviô izy nitso-drano irô sady nametra-tan̈ana tamindrô.
17 Izy koa fa nanohy dianany, nisy lelahy nilomoay aviô nandohaliky nan̈oloan̈a izy sady nan̈ontany izy karaha ty: “Mpampianatra Tsara, ino ma raha tsy maintsy ataoko baka zaho handova fiainan̈a tsisy farany?” 18 Ho Jesosy taminany: “Nan̈ino ma zaho kahianao tsara? Tsisy olo tsara izikoa tsy Zan̈ahary zaraiky fo. 19 Hainao didy aby ty: ‘Aza mamono olo, aza mandiadia vady, aza mangalatra, aza mitsangana ho vavolombelon̈o mavandy, aza mikatramo, aviô hajà babanao ndreky reninao.’” 20 Ho lelahy io taminany: “Mpampianatra, efa narehako aby didy jiaby zen̈y rango zaho mbala hely.” 21 Nizahan’i Jesosy lelahy io; tiany izy, ke ho izy taminany: “Raha araiky fo mbala tsy nataonao: Mindao alafaosa fanan̈ananao jiaby, baka iô vola azonao baka am’izin̈y ameza olo masikiny, am’izen̈y anao hanan̈a harian̈a an-dan̈itry an̈y. Aviô, alô han̈araka zaho.” 22 Nalahelo lelahy io izikoa fa naharen̈y raha nambarany zen̈y. Nalahelo izy sady lôso nandeha, fôtony izy nanan-draha mare.
23 Jesosy koa fa baka nizaha nan̈odidin̈y izy, ho izy tamy mpianatranany: “Ten̈a ho sarotro amin’olo manam-bola hiditry amy Fanjakan̈an’ny Zan̈ahary!” 24 Gaga irô mpianatranany aby io izikoa fa naharen̈y raha nivolan̈iny. Ke nampodin’i Jesosy ndraiky: “A ry zanako aby, ten̈a ho sarotro miditry amy Fanjakan̈an’ny Zan̈ahary! 25 Ho moramora amy shamô hiditry amy lavakan’ny fanjaitry, tozay amin’olo mpan̈arivo hiditry amy Fanjakan̈an’ny Zan̈ahary.” 26 Nahailany fan̈ahy fo irô, ke ho irô taminany:* “Ke mbala pôsibla ho hisy olo ho voavonjy edy va?” 27 Nizahavan’i Jesosy tsarabe irô, ke ho izy: “Amin’olombelon̈o fo raha zen̈y tsy pôsibla fa tsy amy Zan̈ahary, fôtony amy Zan̈ahary, tsisy raha tsy pôsibla.” 28 Ke ho Petera taminany: “Zahay efa nahafoe raha jiaby baka iô nan̈araka anao.” 29 Ho Jesosy: “Ambarako anarô marin̈y tsarabe fa, tsisy olo nahafoe tran̈o, na rahalahy, na anabavy, na reny, na baba, na zanaka, na tany, baka aminaka ndreky baka amy vaovao tsara, 30 ke tsy hahazo injaton’izen̈y am’iziôty, tsy ino zen̈y fa tran̈o, rahalahy, anabavy, reny, zanaka, tany, ndreky fan̈injehan̈a, aviô fiainan̈a tsisy farany amy donia* ho avy. 31 Kanefa maro amin’olo voanalohany hanjary farany, fa ny farany ndraiky ho voanalohany.”
32 Irô nanonga ta Jerosalema. Jesosy nandeha talohandrô, ke irô lany fan̈ahy, fa irô olo nan̈araka izy aby io ndraiky navozo. Nindesiny nihataka hely ndraiky koa irô 12 Lahy, ke nikoran̈iny tamindrô raha handeha havoa izy ty: 33 “Hitanarô, atsika iziô handeha a Jerosalema, ke hisy olo hanolotro Zanak’olo amindrô lohandohan’ny mpisôron̈o ndreky amindrô mpanoratra lalàn̈a aby io. Irô hivolan̈a fa izy tsy maintsy vonen̈a; hatolotrondrô amin’olo hafa firenena aby io izy, 34 ke irô han̈adroadro izy, handraora aminany, hamango karavasy izy, aviô hamono izy. Fa afaka telo andra, izy hatsangana.”
35 Nan̈aton̈o izy Jakoba ndreky Jaona zanakan’i Zebedio, ke ho irô taminany: “A Mpampianatra, tianay izikoa hataonao aminay raha angatahanay aminao.” 36 Ho izy tamindrô: “Ino ma raha tianarô hataoko aminarô?” 37 Ho irô: “Lera anao mahazo voninahitry, mba ambilà kony zahay hipetraka ankilanao, ke araiky ankavanan̈anao aviô araiky ankavianao.” 38 Kanefa ho Jesosy tamindrô: “Tsy hainarô raha angatahanarô. Ho vitanarô ma higiaka amy kôpy handeha higiahako, na hatao batisa amy batisa an̈anaovan̈a batisa zaho?” 39 Ho irô taminany: “Ia, vitanay.” Ke ho Jesosy tamindrô: “Higiaka amy kôpy handeha higiahako ankitin̈y anarô, aviô anarô hatao batisa amy batisa an̈anaovan̈a batisa zaho. 40 Fa izy fo, tsy andraikitrinaka hanendry olo hipetraka ankavanan̈anaka na ankavianaka, fa zay olo voafidy fo hahazo plasy aby zen̈y.”
41 Izikoa fa ren̈indrô folo lahy aby io raha zen̈y, irô neloko tamy Jakoba ndreky Jaona. 42 Kanefa irô nikahian’i Jesosy han̈aton̈o izy, aviô ho izy: “Hainarô fa irô olo niken̈a ho mpitondra aby io manjikiziky amy firenena indesindrô, aviô olo an̈abo mitôron̈o fahifan̈andrô. 43 Fa anarô ndraiky tsy tôkony han̈ano karaha zen̈y; zay olo tiho be aminarô tsy maintsy manjary mpanomponarô, 44 aviô zay olo tiho voanalohany aminarô tsy maintsy manjary mpanomponarô jiaby. 45 Fôtony ndray Zanak’olo fo tsy navy handeha hitompoen̈a fa hanompo, ndreky han̈amia ain̈inany hatao vidim-pan̈avaotan̈a hatao takalon’olo maro.”
46 Irô baka tiô navy ta Jerikô. Tamy Jesosy ndreky mpianatranany aby io aviô olo marobe niala ta Jerikô, Bartimeo (zanakan’i Timeo), lelahy gila sady mpangataka zay, nipetraka tamôron-dalan̈a. 47 Izikoa fa ren̈iny fa Jesosy baka a Nazareta nandalo, izy nandronton̈o mare karaha ty: “A Jesosy Zanakan’i Davida, mamindrà fô aminaka e!” 48 Maro olo nasiaka izy sady nan̈iraka izy hangin̈y, kanefa izy nahainandronton̈o mare fo: “A Zanakan’i Davida e, mamindrà fô aminaka!” 49 Ke Jesosy nidôko, aviô ho izy: “Kahia aminaka atỳ izy.” Lelahy gila io nikahiandrô, ke ho irô taminany: “Korazy anao! Mitsangàna, fa izy mikaiky anao.” 50 Natsipiny tan̈y lambanany ambelan̈a, aviô izy nitsangana nalaky ke nandeha tamy Jesosy tarỳ. 51 Ke ho Jesosy taminany: “Ino ma raha tianao hataoko aminao?” Ho lelahy gila io taminany: “Rabòny,* ataova mimpody mahita ndraiky zaho ô!” 52 Ho Jesosy taminany: “Mindao. Finoan̈anao nampajanga anao.” Tiô ny iô lelahy io nimpody nahita ndraiky, aviô izy nanomboko nan̈araka Jesosy.