Vaovao Tsara Nisoratin’i Lioka

19 Baka iô izy niditry ta Jerikô ke namakivaky tanàna io. 2 Nisy lelahy nanan̈a an̈aran̈a Zakaiosy zay tao. Izio sefon’ny mpamory hetra, aviô izy mpan̈arivo. 3 Tiany ho hita mare azôvy Jesosy zen̈y, fa izy tsy nahita fôtony naro loatra olo, kanefa izy fôhiky. 4 Ke lôso izy nilomoay tsialohaloha aviô nan̈aniky tamin’ny aviavy dỳ baka izy hahita Jesosy, fôtony Jesosy handalo amy lalan̈a iô. 5 Jesosy koa fa navy tiô, izy nisan̈andra baka iô ho izy taminany: “Zakaiosy, mijotsoa malaky anao fa zaho niany ty tsy maintsy midôko an-tran̈onao.” 6 Niraparapa izy nijotso, aviô ravoravo mare izy nan̈ano karibo an-tran̈o Jesosy. 7 Irô koa fa nahita zen̈y, irô jiaby nin̈on̈on̈o karaha ty: “Izy handeha han̈ano vahiny an-tran̈on’ny lelahy mpanota.” 8 Fa Zakaiosy nitsangana aviô ho izy tamy Tômpo: “Hitanao Tômpo, antsasakan’ny fanan̈ananaka hamezako olo masikiny, baka iô zay raha nalaiko forse tamin’olo,* inefatran’izin̈y izy hampodiko aminany.” 9 Ke ho Jesosy taminany: “Niany ty fan̈avaotan̈a avy amy tran̈o ty, fôtony izy koa mba zanakan’i Abrahama. 10 Zanak’olo baka navy hitady ndreky han̈avotro olo very.”

11 Irô mbala nitandren̈y raha aby zen̈y fo, nan̈ano fan̈oharan̈a hafa izy fôtony izy efa narikitry Jerosalema, aviô irô nieritreritry fa Fanjakan̈an’ny Zan̈ahary io hiboaka iô ny iô. 12 Ke ho izy: “Nisy lelahy andriana araiky nandeha tamy tany lavitry baka izy ho voatendry mpanjaka,* baka iô izy himpody. 13 Ke izy nikaiky folo tamy mpanomponany, aviô irô namezany vola folo mina.* Ho izy tamindrô: ‘Ampiasainarô irô io parapaviako.’ 14 Kanefa halandrô olo firenena araiky aminany aby io izy ke tafaran’izy nandeha, irô nan̈iraka ambasadera hivolan̈a karaha ty: ‘Zahay tsy mila lelahy in̈y hanjary mpanjakanay.’

15 “Farany, izy koa fa nanjary mpanjaka,* izy nimpody. Ke nikahiany aby irô mpanompo namezany vola* aby in̈y, misy ahaizany ôtrino nazondrô irô koa fa nampiasa vola. 16 Ke araiky voanalohany nan̈aton̈o, aviô ho izy: ‘Tômpo, mina namezanao in̈y nazahoan̈a mina folo aby.’ 17 Ho izy taminany: ‘Tsara zen̈y, mpanompo tsara. Fôtony anao natokisan̈a tamy raha farany madiniky, anao hamezako fahifan̈a hamehy tanàna folo.’ 18 Navy koa araiky faharoe nivolan̈a: ‘Tômpo, mina namezanao in̈y nazahoan̈a mina dimy.’ 19 Ho izy tamin’ny araiky io koa: ‘Anao hamezako fahifan̈a hamehy tanàna dimy.’ 20 Fa araiky hafa ndraiky navy, ke nivolan̈a: ‘Tômpo, indriô mina namezanao. Izy ty nasitriko tan̈atin’ny lamba. 21 Hitanao, zaho kony navozo anao, fôtony anao olo sarôtin-draha, baka iô anao mangala raha tsy napetrakanao, aviô anao mijinja amy tany tsy namafazanao.’ 22 Ho izy taminany: ‘Mpanompo ratsy fan̈ahy ty, baka amy volan̈anao fo hitsaràko anao. Tsy efa hainao ma zaho olo sarôtin-draha, aviô zaho mangala raha tsy napetrako ndreky mijinja amy tany tsy namafazako? 23 Ke nan̈ino fo basy volanaka* tsy napetrakanao tamy banky? Ôtrizay, zaho avy in̈y, mangala izy miaraka amy zanabola.’

24 “Ke ho izy tamin’olo aby nitsangana tiô: ‘Alaiva aminany mina io, baka iô izio ameza araiky manan̈a mina folo.’ 25 Fa ho irô taminany: ‘Tômpo, izy kony efa manan̈a mina folo ay!’ 26 Ke ho izy: ‘Zaho man̈ambara anarô fa, lan̈iany olo manan̈a, mbala hamezan̈a beben’ny efa anan̈any, fa lan̈iany olo tsy manan̈a ndraiky, ndray raha anan̈any fo mbala hadoso aminany. 27 Aviô, indesa atỳ irô fahavalonaka tsy man̈eky zaho hanjary mpanjakandrô aby in̈y, baka iô vonia man̈oloan̈a zaho eto irô.’”

28 Izy koa fa baka nivolan̈a raha aby zen̈y, izy nanohy dianany handeha a Jerosalema, ke izy nitariky dia. 29 Izy koa fa navy narikitry Betifaga ndreky Betania, tamy bongo kahian̈a Bongo Olivy, izy nan̈iraka aroe tamindrô mpianatra aby io; 30 ho izy: “Mindao anarô mandeha amy tanàna hely irỳ. Anarô koa fa tafiditry ao, anarô hahita zanakan’ny borìky mbala tsiary nitingenan’olo. Vahà izio, baka iô indesa atỳ. 31 Izikoa misy olo man̈ontany anarô: ‘Nan̈ino ma izio vahanarô?’, karaha ty volàn̈a: ‘Ilain’ny Tômpo izy ty.’” 32 Ke lôso irô olo nirahiny aby io, aviô hitandrô aby raha nivolan̈iny tamindrô. 33 Kanefa, irô mbala namaha zanakan’ny borìky io fo, tômpin’izio nivolan̈a tamindrô: “Nan̈ino ma zanakan’ny borìky io vahanarô?” 34 Ho irô: “Ilain’ny Tômpo izy ty.” 35 Ke izio nindesindrô tamy Jesosy tan̈y, baka iô napetrakandrô tan̈abon’ny zanakan’ny borìky io lambandrô ambelan̈a, ke Jesosy nitenginy tiô.

36 Arakaraka izy niteky, nivilarindrô olo aby io tamy lalan̈a tiô lambandrô ambelan̈a. 37 Niaraka izy navy narikitry lalan̈a mijotso amy Bongo Olivy, ravoravo mare mpianatranany jiaby. Naro mare irô tamy zen̈y. Nataondrô naresaka feondrô irô koa fa nidera Zan̈ahary nohon’ny fahagagan̈a jiaby hitandrô. 38 Ho irô: “Irarian̈a hahazo hatsaran̈a Mpanjaka avy amin’ny an̈aran̈an’i Jehovah! Fiadanan̈a an-dan̈itry an̈y, aviô voninahitry amy lan̈itry farany an̈abo an̈y.” 39 Kanefa, sasany tamindrô Fariseo niaraka tamy vahoaka aby io nivolan̈a taminany: “Mpampianatra, volàn̈a irô mpianatranao aby io.” 40 Fa ho izy tamindrô: “Zaho man̈ambara anarô fa irô koa mangin̈y, irô vato aby io hivolan̈a.”

41 Izy koa fa navy narikitry Jerosalema, tsinjony tanàna io, ke izy nitomoan̈y izio mare; 42 ho izy: “Izikoa mba azon’ny dinikinao edy amin’ny andra niany ty ino raha hazahoan̈a fiadanan̈a! Kanefa nasitriky masonao raha zen̈y ziôty. 43 Fa ho avy andra hananganandrô fahavalonao aby io lakoro kakazo marangitry man̈odidin̈y anao. Hikodidin̈andrô anao, ke irô hampijaly anao* baka amy lafiny jiaby. 44 Anao ndreky zanakanao hatrekindrô amy tany, aviô tsisy vato ambelandrô hifampitenginy foeky aminao ao, fôtony tsy azon’ny dinikinao foeky lera karakôry nitsaran̈a anao.”

45 Baka iô izy niditry tamy tempoly tao, ke nanomboko nanaora olo jiaby nivarotro tao. 46 Ho izy tamindrô: “Ty raha efa voasoratra: ‘Tran̈onaka hatao tran̈o fivavahan̈a’, kanefa ndraiky izy ty nataonarô lavaka fisitrihan’ny mpangalatra.”

47 Nanohy nampianatra tamy tempoly tao fo izy isan’andra. Kanefa irô lohandohan’ny mpisôron̈o ndreky irô mpanoratra lalàn̈a aviô irô sefon’ny vahoaka aby io nitady hamono izy. 48 Fa irô tsy nahita fomba han̈anaovan̈a zen̈y foeky fôtony vahoaka jiaby rikian̈a nitandren̈y izy.