Taratasy Handeha Amindrô Romanin̈y aby Io
2 Ke ndray azôvy anao, rahalahy, ndray azôvy, anao tsy manan̈a fialan-tsin̈y izikoa anao mitsara olo; anao baka man̈ameloko ain̈inao tômpiny lera anao mitsara olo, fôtony anao mitsara io lastiô mba mpan̈ano raha aby zen̈y koa. 2 Haintsika fa Zan̈ahary mitsara erakan’ny marin̈y sady man̈ameloko lan̈iany olo mpan̈ano raha aby zen̈y.
3 Anao ma, rahalahy, mieritreritry fa anao mitsara irô olo aby man̈ano raha aby zen̈y io hahavita hilefa fitsaran̈an’ny Zan̈ahary, kanefa anao koa mba man̈ano? 4 Sa tsy jirenao fa izy faran-draha tsara fan̈ahy eky ndreky mandefitry aviô mahari-draha? Tsy hainao ma fa tian’ny Zan̈ahary hibebaka anao matoa izy tsara fan̈ahy aminao? 5 Kanefa anao misy mokon-doha aviô fônao tsy mety mibebaka, ke anao tsy maintsy hisazin’ny Zan̈ahary amin’ny andra han̈amparany helokonany ndreky han̈aboahany didim-pitsaran̈anany erakan’ny rariny. 6 Izy hamaly olo tsiaraikiaraiky arakaraka raha nataony. 7 Hahazo fiainan̈a tsisy farany lan̈iany olo mitady* voninahitry ndreky fan̈ajan̈a baka iô vatan̈a tsy mety lò, ke man̈ano ny tsara fo. 8 Fa lan̈iany olo tia ady ndreky tsy man̈araka fahamarin̈ana aviô tsy vôly man̈ano raha tsy marin̈y ndraiky, sazy ndreky helokon’ny Zan̈ahary ho avy aminany. 9 Fahorian̈a ndreky fijalian̈a raha hahazo olo jiaby man̈ano raha ratsy, Jiosy antsendriky vo zay Griky; 10 fa zay olo man̈ano ny tsara ndraiky hahazo voninahitry ndreky fan̈ajan̈a aviô fiadanan̈a, nin’ny Jiosy antsendriky baka iô nin’ny Griky koa, 11 fôtony Zan̈ahary tsy man̈avakavaka.*
12 Ho foaty tsy nanan̈a lalàn̈a zay olo nanota kanefa tsy nanan̈a lalàn̈a, fa hitsarain’ny lalàn̈a ndraiky zay olo nanota tambanin’ny lalàn̈a. 13 Tsy zay olo maharen̈y lalàn̈a baka olo marin̈y man̈oloan̈a Zan̈ahary, fa olo man̈araka lalàn̈a ny hambara fa olo marin̈y. 14 Irô hafa firenena aby io baka tsy manan̈a lalàn̈a, fa irô fo man̈ano raha takin’ny lalàn̈a, fôtony efa voajanahary raha zen̈y. Ke irô ndray tsy manan̈a lalàn̈a, irô manan̈a lalàn̈a an̈atin’ny fôndrô ao. 15 Irô tômpiny fo man̈aboaka fa efa voasoratra an̈atin’ny fôndrô ao raha tian’ny lalàn̈a koran̈iny. Baka iô feon’ny fieritreretan̈andrô koa mba vavolombelon̈on’ny raha zen̈y miaraka amindrô, ke eritreritrindrô tômpiny fo man̈amia tsin̈y irô na man̈amia toky irô fa mety raha nataondrô. 16 Hiboaka raha zen̈y lera Zan̈ahary hampiasa Kristy Jesosy hitsara raha ataon’olo amy misitriky an̈y. Zen̈y an̈isan’ny vaovao tsara toriako.
17 Anao mivolan̈a fa anao Jiosy ndreky milampy amy lalàn̈a aviô mirehareha fa mifandray amy Zan̈ahary; 18 hainao koa sitrapônany, baka iô anao mahay man̈avaka raha ten̈a tsara fôtony anao efa nampianarin̈y* Lalàn̈a, 19 anao koa resy lahatra fa anao mpitariky olo gila sady hazavan̈a nin’olo an̈atin’ny hiziky, 20 mpan̈anatra olo tsy misain̈y, mpampianatra olo man̈ano jerin’ny tsaiky, aviô mazava aminao tsarabe fampianaran̈a fôtotro ndreky fahamarin̈ana amy Lalàn̈a. 21 Fa karaha ty: Anao mampianatra olo io, nan̈ino fo anao tsy mampianatra ain̈inao tômpiny? Anao mitory: “Aza mangalatra” io, nan̈ino fo anao mangalatra? 22 Anao mivolan̈a: “Aza mandiadia vady” io, nan̈ino fo anao mandiadia vady? Anao mankahala sampy io, nan̈ino fo anao mamaky tempoly? 23 Anao mitôron̈o fa manan̈a lalàn̈a io, nan̈ino fo anao mangala baraka Zan̈ahary ke mandika Lalàn̈a? 24 Eraka raha efa voasoratra baka, “baka amy raha ataonarô mahavy an̈aran̈an’ny Zan̈ahary tsy asian̈a fôtiny amindrô olo hafa firenena aby io.”
25 Famosiran̈a io tsy mahatsara anao izikoa anao tsy man̈araka lalàn̈a; fa izikoa ndraiky anao mpandika lalàn̈a, anao ndray efa voavositry, anao manjary tsy voavositry. 26 Fa izikoa misy olo tsy voavositry man̈araka fitsipiky marin̈y takin’ny Lalàn̈a, tsy efa konten̈a voavositry fo izy ndray izy tsy voavositry? 27 Irô olo tsy voavositry aby io koa fa man̈ano raha takin’ny Lalàn̈a, irô hitsara anao,* fôtony ndray anao efa manan̈a lalàn̈a voasoratra aviô anao voavositry, anao mandika lalàn̈a. 28 Ny raha mampa Jiosy ny Jiosy ane tsy raha baka ambelan̈a, ary karaha zen̈y koa famosiran̈a, izio tsy raha baka ambelan̈a, na baka amy nôfotro. 29 Fa baka an̈atin’ny fô ny raha mampa Jiosy ny Jiosy, ke fônany izy nivosirin̈y io aviô fan̈ahy ny raha namosiran̈a izy fa tsy lalàn̈a voasoratra. Ke Zan̈ahary hidera izy fa tsy olo.