Taratasy Handeha Amindrô Romanin̈y aby Io
6 Ke ino basy raha hivolan̈intsika? Tôkony hanohy hanota fo ma atsika baka hitombo hatsaram-pan̈ahy miavaka haboaka amintsika? 2 San̈atria! Izikoa fahotan̈a koran̈iny, atsika efa maty; ke atsika mbala hanohy hiain̈y an̈atin’ny fahotan̈a fo? 3 Sa tsy hainarô fa atsika jiaby natao batisa tamy Kristy Jesosy io natao batisa tamy fahafatesan̈anany? 4 Ke niaraka nalevin̈y taminany atsika izikoa fa natao batisa tamy fahafatesan̈anany, amy zen̈y atsika hanan̈a fiainan̈a vaovao, karaha nataon’i Kristy natsangana tamy maty baka tamin’ny angôvo be voninahitrin’ny Baba. 5 Izikoa atsika tafikamban̈a aminany lera atsika maty karaha izy naty in̈y, ho tafikamban̈a aminany koa atsika lera atsika hatsangana amin’ny maty karaha izy. 6 Haintsika baka fa toetrintsika taloha nifantsihin̈y tamin’ny hazofijalian̈a niaraka taminany, amy zen̈y fahotan̈a tsy hanan̈a fahifan̈a amy vatan̈antsika, aviô koa atsika tsy ho andevon’ny fahotan̈a eky. 7 Fôtony olo maty afaka madiodio* amy fahotan̈anany.
8 Aviô koa, izikoa atsika miaraka maty amy Kristy, atsika mino fa atsika ho velon̈o miaraka aminany koa. 9 Haintsika baka fa Kristy natsangana tamy maty in̈y efa tsy ho foaty eky. Fahafatesan̈a efa tsy manan̈a fahifan̈a* aminany eky. 10 Izy naty indraiky fo baka han̈adoso fahotan̈a. Fa amin’izy velon̈o ziôty ndraiky, izy velon̈o han̈ano sitrapôn’ny Zan̈ahary. 11 Karaha zen̈y koa anarô: Ataova karaha raha efa maty in̈y anarô izikoa fahotan̈a koran̈iny, fa velon̈o ndraiky baka han̈ano sitrapôn’ny Zan̈ahary amy maha mpan̈ara-dia Kristy Jesosy anarô.
12 Ke fahotan̈a io aza ambela hanohy hanjaka amy vatan̈anarô mety maty, baka anarô tsy han̈atanteraka fan̈irian̈an’ny vatan̈anarô. 13 Vatan̈anarô* io aza amezan̈a hifihezin’ny fahotan̈a eky baka izio tsy ho fitaovan̈a indesin̈y man̈ano raha tsy manjary,* fa ain̈inarô karaha raha efa naty kanefa efa velon̈o amy ziôty io ameza Zan̈ahary. Ameza izy vatan̈anarô* io ho fitaovan̈a han̈anaovan̈a raha tsara.* 14 Aza ambela hanjaka aminarô fahotan̈a io, fôtony anarô tsy ambanin’ny lalàn̈a fa nan̈aboahan̈a hatsaram-pan̈ahy miavaka.
15 Ke akôry? Atsika ma handeha hanota fôtony tsy ambanin’ny lalàn̈a fa nan̈aboahan̈a hatsaram-pan̈ahy miavaka? San̈atria! 16 Izio ma tsy hainarô fa anarô koa man̈eky ho andevon’olo araiky ke man̈araka volan̈anany, anarô manjary andevon’olo arehanarô volan̈a io? Ke na anarô ho andevon’ny fahotan̈a ke ho foaty, na anarô ho andevon’ny Zan̈ahary ndreky man̈araka volan̈anany ke hanjary olo marin̈y. 17 Fa isaoran̈a Zan̈ahary, fôtony ndray anarô taloha andevon’ny fahotan̈a, narehanarô tamy fô jiaby fampianaran̈a namezan̈a anarô. 18 Ia, azon’ny anarô nivotsaoran̈a tamy fahotan̈a, anarô nanjary andevon’ny fahamarin̈ana. 19 Mampiasa volan̈a mazava amin’olombelon̈o zaho, fôtony nôfotronarô malemy. Vatan̈anarô* baka nataonarô andevon’ny fahalotoan̈a ndreky fandikan-dalàn̈a amy zen̈y anarô handika lalàn̈a, fa ziôty ndraiky vatan̈anarô* ataova andevon’ny fahamarin̈ana amy zen̈y anarô ho masin̈y. 20 Fôtony tamin’ny anarô andevon’ny fahotan̈a, anarô tsy nifihezin’ny fahamarin̈ana.
21 Ke ino basy vokatran’ny fitondran-ten̈anarô tamy zen̈y? Raha mampamen̈atra anarô amy ziôty. Fôtony raha aby zen̈y mitariky amy fahafatesan̈a. 22 Ke nohon’ny anarô ziô efa nivotsaoran̈a tamy fahotan̈a ndreky efa nanjary andevon’ny Zan̈ahary, man̈anaova raha masin̈y, fa raha zen̈y hitondra anarô amy fiainan̈a tsisy farany. 23 Fôtony, fahafatesan̈a karama azo baka amy fahotan̈a, fa fiainan̈a mandrakizay baka tamy raha nataon’i Kristy Jesosy Tômpontsika ndraiky kadô amezan’ny Zan̈ahary.