Taratasy nisoratin’i Jakoba
3 Rahalahiko aby, tsy tôkony anarô jiaby hanjary mpampianatra fôtony hainarô fa Zan̈ahary handiniky tsarabe raha ataontsika amy maha mpampianatra atsika, ary izy hitsara atsika mifan̈araka amy zen̈y. 2 Atsika jiaby io samby man̈ano hadisovan̈a* aby, ary matetiky koa. Izikoa bakà misy olo tsiary ndraiky diso amy raha volan̈iny, dikan’izen̈y izy olo lavorary sady mahafehy ain̈inany jiaby. 3 Izikoa asiantsika tady* amy vavan’ny sevaly misy hibikoan̈a izy, ho vitantsika hibeko vatan̈anany jiaby. 4 Diniha bakà sambo! Ndray izio maventy be aviô misy tsiko mahery man̈aposy izio, volan hely fo efa ahavitan’olo mitondra izio mampivily izy amy zay tany tiany hampimboan̈a izy.
5 Diniha koa bakà ty: Pitikin’ny môtro hely fo efa mahavita man̈ôro atiala maventy be. Karaha zen̈y koa lela: Izio raha hely amy vatan̈antsika, fa izio fo faran-draha mipoerapoera eky. 6 Lela io koa mitovy amy môtro. Amy raha jiaby amy vatan̈antsika, lela io ny feno raha ratsy.* Izio bakà mahavita mandoto vatan̈a jiaby, aviô izio mahavita mandrobaka fiainan̈an’olo, karaha ataon’ny Gehena* mahavita mandripaka. 7 Mety folahan̈a aby karazan̈a biby jiaby, na bibidỳ zen̈y na vôron̈o na biby mandady na biby an-dranomasin̈y. Ia, vitan’olombelon̈o aby mamehy irô jiaby io. 8 Kanefa tsisy olo mahavita mamolaka lelanany. Izio tsy avoafehy, salakady mandrobaka, baka iô feno poàzon mahafaty. 9 Izio hiderantsika Jehovah Zan̈ahary Babantsika, aviô mbala izio fo koa an̈ozon̈antsika olo, kanefa olombelon̈o namboarin̈y “hitovy endriky amy Zan̈ahary.” 10 Baka amy vava araiky fo iboahan’ny fideran̈a* ndreky ozon̈o.
Rahalahiko aby, tsy pare izikoa zen̈y ny raha misy. 11 Mba pôsibla ma lohatany araiky han̈aboaka rano mamy sady han̈aboaka rano mafaiky? 12 Rahalahiko aby, ndraiky nisy kakazo aviavy ma namoa olivy? Baka iô ndraiky nisy vodin’ny rezain ma namoa aviavy? Karaha zen̈y koa fa, lohatany man̈aboaka rano matraba* tsy mety han̈aboaka rano mamy.
13 Azôvy aminarô ma misy jery salakady misain̈y? Izy tôkony ho tsara fitondran-ten̈a, aviô han̈aboaka amy raha ataony fa izy tsara fan̈ahy* fôtony zen̈y ahitan̈a fa izy manan̈a fahendrena. 14 Izikoa an̈atin’ny fônarô an̈y anarô faran-draha be fô olo eky sady tia ady,* anarô tsy tôkony hipoerapoera fa manan̈a fahendrena, fôtony mavandy anarô izikoa man̈ano zen̈y. 15 Zen̈y tsy fahendrena baka an̈abo fa baka amy donia ty, ndreky erakan’ny nôfotro, aviô baka amy demony. 16 Fôtony zay tany misy olo be fô ndreky tia ady,* io tsy maintsy misy korontan̈a ndreky raha ratsy isan-karazany fo.
17 Fa fahendrena baka an̈abo zen̈y, voanalohany antsendriky, madio, baka iô tia fihavanan̈a, mahay mandanjalanja, vôn̈ono han̈araka volan̈a, be famindram-pô sady man̈ano ny tsara,* tsy man̈avakavaka, aviô tsy mihatsaravelatsihy. 18 Sôsoko zen̈y, mampisy fihavanan̈a lan̈iany olo mifen̈y hifandray tsara amin’olo,* ke man̈ano ny marin̈y irô izikoa man̈ano zen̈y.