Taratasy Handeha Amindrô Galatianin̈y aby Io
5 Kristy nankafaka atsika baka atsika hanan̈a fahafahan̈a zen̈y. Ke anarô mioren̈a tsarabe, aviô aza man̈eky hasian̈a lazòkon’ny fan̈andivaozan̈a ndraiky koa.
2 Hitanarô, zaho Paoly man̈ambara anarô fa izikoa anarô vosirin̈y, Kristy tsy hahatsara anarô foeky natà ny hely. 3 Ampatsiarôviko ndraiky koa amy lan̈iany olo hivosirin̈y fa izy tsy maintsy man̈araka Lalàn̈a jiaby. 4 Anarô, tsy azôvy zen̈y fa anarô mifen̈y mare beka hambara fa marin̈y baka amy fan̈arehan̈a lalàn̈a io, tafasaraka amy Kristy. Baka aminarô fo mahavy anarô tsy han̈aboahan̈a hatsaram-pan̈ahy miavaka eky. 5 Fa zahay ndraiky, baka amy fan̈ahy mahavy zahay hifen̈y mare hiambin̈y ndreky han̈anten̈a fa hambara fa marin̈y baka amy finoan̈a. 6 Fôtony bakà, amin’olo tafikamban̈a amy Kristy Jesosy, ny raha maventy tsy oe irô voavositry na irô tsy voavositry, fa irô mino fôtony irô manan̈a fitiavan̈a.
7 Anarô karaha mba efa nilomoay tsara! Ke azôvy nisakana anarô tsy han̈araka fahamarin̈ana eky? 8 Tsy honohono Araiky nikaiky anarô in̈y foeky nandresy lahatra anarô handeha han̈ano zen̈y. 9 Levira hely fo efa mampivoha koba jiaby. 10 Zaho matoky tsarabe fa anarô tafikamban̈a amy Tômpo io tsy handeha hieritreritry raha mifanohitry amy zen̈y. Kanefa araiky mampialamboetry anarô, ndray azôvy izy ndray azôvy, hahazo sazy man̈eva izy. 11 Fa izikoa zaho, rahalahy aby, mbala mitory momba famosiran̈a, nan̈ino fo zaho mbala hinjehin̈y? Izikoa zen̈y bakà, efa tsy tôkony ho sakan̈a eky raha momba hazofijalian̈a.* 12 Tiako izikoa irô olo mitady hamositry anarô aby io hamositry ain̈indrô tômpiny.*
13 Rahalahy aby, anarô nikahian̈a hanjary olo afaka; ke fahafahan̈a namezan̈a anarô io aza ampiasain̈a han̈amezan̈a fahafaham-pô fan̈irian̈an’ny nôfotro, fa ambilà fitiavan̈a handrisiky anarô hifanompo. 14 Fôtony Lalàn̈a jiaby voafehin’ny* didy araiky ty: “Anao mila tia olo karaha ataonao tia ain̈inao.” 15 Fa izikoa anarô tsy vôly miady aminarô samby anarô, anarô zalahy hifandripaka ay!
16 Mifen̈a fo han̈eky hitaritin’ny fan̈ahy amy zen̈y anarô tsy han̈atanteraka fan̈irian̈an’ny nôfotro foeky. 17 Nôfotro ndreky fan̈irian̈anany bakà manohitry fan̈ahy, baka iô fan̈ahy manohitry nôfotro. Irô io mifanohitry, ke zen̈y mahavy anarô tsy afaka man̈ano raha tianarô hatao. 18 Aviô, izikoa anarô taritin’ny fan̈ahy, anarô tsy ambanin’ny lalàn̈a.
19 Mibaribary asan’ny nôfotro, tsy ino zen̈y fa fijangajangan̈a,* fahalotoan̈a, fitondran-ten̈a tsisy hen̈amaso,* 20 fanompoan-tsampy, fisoman̈a aody,* fankahalan̈a, ady, olo be fô, heloko dila loatra, ankany, fisaratsarahan̈a, fananganan̈a antokom-pinoan̈a,* 21 fitsiriritan̈a, figiahan̈a toaka dila loatra, fety tsy voafehy,* ndreky raha miramira amy zen̈y. Zaho mampitandrin̈y anarô tsialohaloha, karaha nataoko efa nampitandrin̈y anarô in̈y, fa lan̈iany olo mpan̈ano irô raha aby io tsy handova Fanjakan̈an’ny Zan̈ahary.
22 Fa vokatran’ny fan̈ahy ndraiky: Fitiavan̈a, haravoan̈a, fiadanan̈a,* faharetan̈a,* hatsaram-pan̈ahy, hatsaran-toetry, finoan̈a, 23 fahalimiam-pan̈ahy, fifihezan-ten̈a. Tsisy lalàn̈a manohitry irô raha aby io. 24 Sôsoko zen̈y koa, irô mpianatran’i Kristy Jesosy aby io namantsiky nôfotro tamy pôtô, ary tsy nôfotro fo fa mboàny fan̈irian̈an’izio mare han̈ano raha ratsy ndreky fan̈irian̈an’izio.
25 Izikoa fan̈ahy masin̈y ambelantsika hitariky fiainan̈antsika, tôkony hifen̈y fo atsika hitondra ten̈a tsara mifan̈araka amy fitaritan’ny fan̈ahy io. 26 Atsika tsy tôkony hipoerapoera ke han̈ano raha hahavy atsika samby atsika hifan̈oesa ndreky ho be fô.