Taratasy Voanalohany Handeha Amindrô Korintianin̈y aby Io
10 Tiako hainarô, rahalahy aby, fa irô dadilahibentsika aby io jiaby nandeha tambanin’ny rôndro baka iô irô jiaby namakivaky ranomasin̈y, 2 aviô irô jiaby natao batisa tamy rôndro ndreky tamy ranomasin̈y tamin’irô nan̈araka Mosesy; 3 baka iô koa nitovy hanin̈y ara-pan̈ahy nihoanindrô jiaby, 4 sady nitovy fo koa rano ara-pan̈ahy nigiahandrô. Irô nigiaka rano baka tamy lampimbato ara-pan̈ahy nan̈araka irô, ary lampimbato io* Kristy. 5 Ndray zen̈y, ankamaraozandrô io tsy nankasitrahan’ny Zan̈ahary, ke zen̈y nahavy irô ripaka tamy tany paiky tan̈y.
6 Raha nandalo aby zen̈y afaka hangalantsika fianaran̈a, amy zen̈y atsika tsy han̈iry raha ratsy, karaha nataondrô nan̈iry raha aby zen̈y. 7 Anarô aza manompo sampy, karaha nataon’ny sasany tamindrô; ty baka raha voasoratra momba irô: “Vahoaka io nipetraka hihinan̈a ndreky higiaka. Irô baka tiô nitsangana han̈ano fety.” 8 Aviô, atsika tsy tôkony hijangajanga,* karaha nataon’ny sasany tamindrô nijangajanga,* ke nisy 23 000 tamindrô naty tan̈atin’ny andra araiky. 9 Baka iô atsika tsy tôkony hitsapa jery Jehovah, karaha nataon’ny sasany tamindrô nitsapa jery izy, ke irô natin’ny bibilava. 10 Aviô aza min̈on̈on̈o, karaha nataon’ny sasany tamindrô nin̈on̈on̈o, ke irô naty nivonen’ny mpandripaka. 11 Nandalo tamindrô raha aby zen̈y misy hangalantsika fianaran̈a. Irô io nisoratin̈y baka hampitandreman̈a atsika, tsy azôvy zen̈y fa atsika miain̈y amy fotoan̈a avian’ny faran’ny donia ty.
12 Ke lan̈iany olo mieritreritry fa izy efa mitsangana tôkony hitandrin̈y tsao izy ho lavo. 13 Tsisy fakam-pan̈ahy mahazo anarô ke tsy mpahazo olo. Kanefa Zan̈ahary tsy mivadiky, izy tsy han̈ambela anarô ho tôjy fakam-pan̈ahy tsy din̈inarô. Fa izikoa fa misy fakam-pan̈ahy, izy han̈abian̈a lalan̈a baka izio ho din̈inarô.
14 Ke lifàsa fijangajangan̈a, rahalahiko tiako aby. 15 Zaho mikoran̈a aminarô zen̈y karaha mikoran̈a amin’olo manan̈a fahendrena, ke ambilà anarô tômpiny fo hitsara raha volan̈iko zen̈y. 16 Atsika ma tsy mahazo hatsaran̈a amy lion’i Kristy, atsika koa fa migiaka amy kôpin’ny fisaoran̈a an̈anaovantsika fisaoran̈a? Atsika ma tsy mahazo hatsaran̈a amy vatan̈an’i Kristy, atsika koa fa mihinan̈a môfo tapahantsika? 17 Araiky fo môfo; ke ndray atsika maro, atsika vatan̈a araiky fo, fôtony atsika jiaby mihinan̈a amy môfo araiky io.
18 Diniha baka irô Israely erakan’ny nôfotro aby io: Izio ma irô olo mihinan̈a hanin̈y natao sôron̈o tamin’ny alitara tiô tsy karaha raha miaraka mihina amy Zan̈ahary in̈y? 19 Zaho ma tihivolan̈a fa misy dikany raha natao sôron̈o amy sampy, na misy dikany sampy? 20 Aha, fa ty raha tiako havian̈a: Raha ataon’ny firenena aby io sôron̈o, irô io ataondrô sôron̈o amy demony fa tsy amy Zan̈ahary. Ke tsy tiako anarô han̈ano raha misy ifandraisany amy demony. 21 Anarô tsy afaka migiaka amy kôpin’i Jehovah sady migiaka amy kôpin’ny demony; anarô tsy afaka mihinan̈a amy latabatran’i Jehovah sady mihinan̈a amy latabatran’ny demony. 22 Sa “atsika han̈ano raha hampamaraha Jehovah”? Atsika ma matanjaka mandilatra izy?
23 Azo atao aby raha jiaby, kanefa tsy raha jiaby mahatsara. Azo atao aby raha jiaby, kanefa tsy raha jiaby mankahery. 24 Olo tsiaraikiaraiky tôkony tsy vôly mitady raha mahatsara olo hafa, fa tsy raha mahatsara ain̈inany tômpiny.
25 Amy feon’ny fieritreretan̈a madio, hoana hena alafo a bazary; anao tsy mila man̈ontany baka taia navian’izio, 26 fôtony “tany ty ndreky raha jiaby amin’izy ty nin’i Jehovah.” 27 Izikoa misy olo tsy mpino mikaiky anarô hihina ke anarô tihandeha, amy feon’ny fieritreretan̈a madio, ahana zay raha ambelany man̈oloan̈a anarô; anarô tsy mila man̈ontany baka taia navian’izio. 28 Fa izikoa ndraiky misy olo mivolan̈a aminarô: “Raha ty baka natao sôron̈o”, aza mihinan̈a izio, amy zen̈y anarô tsy hanafintohin̈y izy baka iô tsisy feon’ny fieritreretan̈a ho voahelingelin̈y. 29 Tsy feon’ny fieritreretan̈anarô tômpiny izy tiako volan̈iny zen̈y fa feon’ny fieritreretan̈an’olo araiky io. Nan̈ino ma fahafahan̈a anan̈ako tôkony hitsarain’ny feon’ny fieritreretan̈an’olo hafa? 30 Ke izikoa zaho mihinan̈a sady man̈ano mersy Zan̈ahary amin’ny hanin̈y hoaniko io, nan̈ino ma zaho hamezan̈a tsin̈y amin’ny hanin̈y an̈anaovako mersy Zan̈ahary io?
31 Ke na mihinan̈a anarô na migiaka, na ino na ino raha ataonarô, ataova han̈amezan̈a voninahitry Zan̈ahary raha jiaby. 32 Aza man̈ano raha manafintohin̈y olo, na Jiosy zen̈y, na Griky, na olo an̈atin’ny fiangonan̈an’ny Zan̈ahary, 33 karaha ataoko mifen̈y hamparavoravo olo jiaby amy raha jiaby, ke tsy mitady raha hahatsara zaho tômpiny fa mitady raha hahatsara ny maro, amy zen̈y irô ho avotro.