Taratasy handeha amindrô he Letter to the Filipianin̈y aby io
3 Farany, rahalahiko aby, miravoravoa fôtony anarô mpanompon’ny Tômpo. Tsy mampan̈ino zaho foeky ndray raha mitovy fo soratiko aminarô, ary raha zen̈y mahatsara* anarô.
2 Anarô mitandrema amin’ny amboa;* anarô mitandrema amin’olo man̈ano raha havoazan’olo raha; anarô mitandrema amin’olo mandrisiky anarô hivosirin̈y. 3 Atsika bakà ny ten̈a voavositry, fôtony atsika man̈ano fanompoan̈a masin̈y baka amy fitaritan’ny fan̈ahy masin̈in’ny Zan̈ahary, aviô atsika tsy mitôron̈o raha misy amintsika* fa Kristy Jesosy reharehantsika. 4 Kanefa, izikoa misy olo tihirehareha fôtony izy misy raha toraon̈ana, efa zaho edy.
Ia, izikoa misy olo misy raha toraon̈ana mare, zaho mbala mandilatra izy. 5 Zaho nivosirin̈y tamin’ny andra fahavalo; zaho an̈isan’ny firenenan’ny Israely, baka amy fokon’i Benjamina; zaho Hebreo naterakan’ny Hebreo; baka iô izikoa lalàn̈a koran̈iny, zaho Fariseo; 6 izikoa hafanam-pô koran̈iny, zaho nan̈enjiky fiangonan̈a; aviô izikoa momba fan̈arehan̈a raha volan̈in’ny lalàn̈a fa marin̈y koran̈iny, zaho hita fa tsisy tsin̈y. 7 Kanefa irô raha aby io ndray niritriretiko ho raha maventy,* irô io ziô efa tsisy dikany* aminaka, fôtony zaho mpan̈ara-dia Kristy. 8 Aviô, iritriretiko ho fatiantoko aby raha jiaby, fôtony ten̈a valera ankitin̈y mahay Kristy Jesosy Tômponaka. Baka aminany bakà nahavy zaho nahafoe raha jiaby, ndreky mihevitry irô io karaha fako mivôvon̈o in̈y, amy zen̈y zaho hahazo rady amy* Kristy 9 sady ho hita fa mpan̈ara-dia izy. Tsy baka amy fan̈arehako Lalàn̈a an̈ambaran̈a fa zaho marin̈y, fa baka amy zaho mino Kristy. Baka amy finoan̈a an̈ambaran’ny Zan̈ahary fa marin̈y olo araiky. 10 Ty bakà tanjon̈onaka: Hahay Kristy ndreky hahay angôvon’ny Araiky nanangana izy tamy maty,* baka iô hijaly karaha izy ke han̈eky ho foaty karaha izy koa, 11 tsao fo zaho mba ho an̈isan’olo hatsangana amy maty tsialohaloha.
12 Tsy oe zaho efa nahazo zio na efa natao lavorary, fa zaho mifen̈y fo tsao fo zio mba ho azoko, fôtony zen̈y nahavy Kristy Jesosy nifidy* zaho. 13 Rahalahy aby, zaho tsy mihevitry zaho efa nahazo zio, fa ty raha azoko antoko: Zaho man̈adin̈a raha afara ndreky manakatra ny aloha, 14 ke zaho hifen̈y hanakatra tanjon̈o io, tsy ino zen̈y fa valisoa an-dan̈itry handeha hamezan’ny Zan̈ahary lan̈iany olo kahiany, baka amy Kristy Jesosy. 15 Ke, lan̈iany olo matotro amintsika tôkony hanan̈a toe-tsain̈y karaha zen̈y koa; izikoa anarô manan̈a hevitry hafa, na momba ino zen̈y na momba ino, hataon’ny Zan̈ahary raha hahaizanarô toe-tsain̈y zen̈y. 16 Ke na ino na ino raha efa vitantsika tamy fanompoan̈a Zan̈ahary, alô atsika tsy ho vôly fa mbala han̈ano karaha zen̈y.
17 Rahalahy aby, samia mangala tahaka zaho aby anarô jiaby, aviô diniha tsarabe lan̈iany olo man̈araka môdely namezanay anarô. 18 Maro bakà olo amy ziôty mitsangana ho fahavalon’ny hazofijalian̈an’i Kristy. Efa matetiky zaho mikoran̈a momba irô io, fa ziôty ndraiky, tomoan̈y foeky zaho izikoa fa mikoran̈a raha momba irô. 19 Irô io haripaka. Kibondrô manjary zan̈aharindrô. Raha tôkony hampamen̈atra irô ndraiky ataondrô voninahitrindrô, aviô amy raha ambony tany fo andihanan’ny jerindrô. 20 Fa atsika ndraiky olom-pirenenan’ny lan̈itry, ary atsika efa miambin̈y mare favian’ny mpamonjy araiky baka an̈y, tsy azôvy zen̈y fa Jesosy Kristy Tômpo. 21 Izy hampiasa angôvonany mahery ke han̈aova vatan̈antsika tsisy dikany ty hanjary karaha vatan̈anany be voninahitry. Ary angôvonany io handeha hampiasainy baka raha jiaby hanjary ambany fahifan̈anany.