Taratasy Faharoe Handeha Amindrô Korintianin̈y aby Io

13 Ty fan̈intelony zaho handeha aminarô an̈y. “Tsy maintsy mila volan̈an’ny* vavolombelon̈o aroe na telo zay vo voamarin̈y tsarabe raha jiaby.” 2 Ndray zaho iziô mbala tsy an̈y, ataovanarô karaha efa an̈y fan̈indroeny in̈y zaho, ary efa ampitandremiko lasandra irô olo nanota taloha aby in̈y ndreky irô olo hafa jiaby fa lera zaho mimpody an̈y, zaho tsy hitsitsitsitsy amindrô zen̈y foeky. 3 Fôtony anarô mitady porofo mankamarin̈y fa Kristy, araiky tsy malemy izikoa fa man̈ano raha aminarô fa man̈aboaka angôvonany aminarô, mampiasa zaho izikoa fa hivolan̈a. 4 Ia, izy baka nahanton̈o tamy pôto tamin’izy nalemy, kanefa izy iziô velon̈o baka amin’ny angôvon’ny Zan̈ahary. Marin̈y fa zahay io malemy karaha izy koa, kanefa zahay ho velon̈o hiaraka aminany baka amin’ny angôvon’ny Zan̈ahary miasa aminarô.

5 Anarô aza vôly mandini-ten̈a misy hahitan̈a izikoa anarô mbala an̈atin’ny finoan̈a sa tsy an̈atiny. Sa tsy ikenarô fa anarô tafikamban̈a amy Jesosy Kristy? Tôkony hikenarô raha zen̈y, izikoa tsy raha tsy ankasitrahan̈a anarô. 6 Zaho man̈anten̈a mare baka anarô han̈eky fa zahay olo ankasitrahan̈a.

7 Zahay mivavaka amy Zan̈ahary baka anarô tsy han̈ano raha ratsy. Zahay amy zen̈y edy tsy raha tihahazo rady amin’olo, fa tianay izikoa anarô man̈ano raha tsara, ndray baka amy zen̈y mahavy zahay zahan̈a karaha olo tsy ankasitrahan̈a in̈y. 8 Fôtony tsisy raha vitanay hanoheran̈a fahamarin̈ana, fa hampandrosoan̈a* fahamarin̈ana fo. 9 Ravoravo mare zahay lera zahay malemy kanefa anarô matanjaka. Aviô zahay mivavaka baka anarô han̈itsy raha tôkony hahitsy. 10 Zen̈y mahavy zaho manoratra raha aby zen̈y aminarô ndray zaho tsy an̈y, amy zen̈y lera zaho avy an̈y, zaho tsy voatery ho mentitry be aminarô izikoa fa hampiasa fahifan̈a namezan’ny Tômpo zaho, ke zaho hampahery* anarô fa tsy han̈asazy* anarô.

11 Farany, rahalahy aby, mifen̈a fo ho ravoravo, han̈itsy raha tôkony hahitsy, han̈eky hankahirezin̈y, ho jery araiky, ndreky hihavan̈a tsarabe. Zan̈aharin’ny fitiavan̈a ndreky fiadanan̈a* hiaraka aminarô. 12 Mifan̈anaova ôroko masin̈y izikoa fa mifan̈ano mbalatsara. 13 Sambitsara zen̈y anarô, ho irô olo masin̈y jiaby.

14 Irarian̈a anarô jiaby han̈aboahan’i Jesosy Kristy Tômpo hatsaram-pan̈ahy miavaka ndreky han̈aboahan’ny Zan̈ahary fitiavan̈anany aviô samby hahazo hatsaran̈a baka amy fan̈ahy masin̈y!