Taratasy Voanalohany Handeha Amindrô Korintianin̈y aby Io
2 Ke zaho koa fa navy taminarô tan̈y handeha han̈ambara sekire masin̈in’ny Zan̈ahary taminarô, rahalahy aby, zaho tsy nampiasa volan̈a mampiafatra na nan̈aboaka fa zaho ny ten̈a misy jery. 2 Fôtony zaho tapa-kevitry tsy hikoran̈a momba raha hafa taminarô foeky* izikoa tsy raha momba Jesosy Kristy ndreky izy nivonen̈a tamin’ny hazofijalian̈a. 3 Zaho koa fa navy taminarô tan̈y, zaho nalemy, navozo, baka iô nangôrohôro mare; 4 aviô zaho koa fa nivolan̈a ndreky nitory, zaho tsy nampiasa volan̈an’olo manam-pahaizan̈a handrisian̈a lahatra anarô,* fa naboakako baka tamy raha nivolan̈iko fa mahery fan̈ahy masin̈y, 5 amy zen̈y tsy baka amy fahendrenan’olombelon̈o mahavy anarô manan̈a finoan̈a, fa baka amin’ny angôvon’ny Zan̈ahary.
6 Atsika mikoran̈a momba fahendrena amin’olo matotro, fa izy fo tsy fahendrenan’ny donia ty na nin’ny mpitondra aby amy donia ty;* irô io efa tsy ho hisy eky. 7 Fa atsika mikoran̈a momba fahendrenan’ny Zan̈ahary an̈atin’ny sekire masin̈y, tsy ino zen̈y fa fahendrena nasitriky, araiky efa noman̈in’ny Zan̈ahary tsialohaloha talohan’ny nisian’ny donia ty,* misy hazahoantsika voninahitry. 8 Tsisy amindrô mpitondra aby amy donia ty* nahay fahendrena io, fôtony izikoa irô nahay izio, ôtrizay Tômpo be voninahitry tsy nivonendrô.* 9 Fa eraka raha voasoratra ty: “Mbala tsy hitan’ny maso na ren̈in’ny sofin̈y na nidinihin’olo tan̈atin’ny fôndrô tao irô raha noman̈in’ny Zan̈ahary nin’olo tia izy aby io.” 10 Tamintsika baka nan̈aboahan’ny Zan̈ahary raha zen̈y, baka tamy fan̈ahinany. Fan̈ahy io mitsakaraka an̈atin’ny raha jiaby, firaka amy raha lalin̈y momba Zan̈ahary.
11 Azôvy ma olo mahay raha iritriretin’olo araiky izikoa tsy izy* tômpiny fo? Karaha zen̈y koa fa, tsisy olo mahay raha iritriretin’ny Zan̈ahary izikoa tsy fan̈ahin’ny Zan̈ahary. 12 Kanefa, atsika tsy nahazo fan̈ahin’ny donia ty, fa fan̈ahy baka amy Zan̈ahary, misy ahaizantsika raha namezan’ny Zan̈ahary atsika nohon’izy tsara fan̈ahy. 13 Mikoran̈a raha aby zen̈y koa atsika, kanefa atsika tsy mampiasa volan̈a ampianarin’olo manam-pahaizan̈a, fa mampiasa volan̈a ampianarin’ny fan̈ahy. Volan̈a erakan’ny fan̈ahy baka han̈azavantsika raha erakan’ny fan̈ahy.
14 Kanefa olo erakan’ny nôfotro tsy man̈eky* raha baka amy fan̈ahin’ny Zan̈ahary, fôtony halifahan̈a fahitany irô io; tsy ho vitany hahay raha aby zen̈y, fôtony ilàn̈a fan̈ampian’ny fan̈ahin’ny Zan̈ahary fandinihan̈a irô io. 15 Olo erakan’ny fan̈ahy ndraiky mandiniky raha jiaby, fa izy fo tsisy olo mandiniky izy. 16 Fôtony “azôvy nanjary nahay raha an̈atin’ny jerin’i Jehovah, ke afaka mampianatra Izy?” Fa atsika ndraiky manan̈a jerin’i Kristy.