Taratasy voanalohany nisoratin’i Jaona
4 Rahalahy ndreky ranabavy tiako aby, aza direkty mino hafatra zahan̈a karaha baka amy Zan̈ahary,* fa alaiva antoko antsendriky izikoa izio ten̈a baka aminany ankitin̈y, fôtony efa maro mpaminan̈y sandoko amy donia ty.
2 Ty ahaizanarô hafatra baka amy Zan̈ahary: Baka amy Zan̈ahary aby kila hafatra mankamafy fa nôfotro ndreky lio i Jesosy Kristy tamin’izy navy tambony tany teto. 3 Fa tsy baka amy Zan̈ahary ndraiky zay hafatra tsy man̈eky Jesosy. Ny marin̈y aminany, hafatra karaha zen̈y baka amin’ny antikristy, araiky efa ren̈inarô fa ho avy sady efa misy amy donia ty.
4 Anarô zanako tiako aby, anarô baka amy Zan̈ahary, aviô anarô nandresy irô mpaminan̈y sandoko aby io, fôtony araiky* tafikamban̈a aminarô mbala matanjaka mandilatra araiky* tafikamban̈a amy donia ty. 5 Irô mpaminan̈y sandoko aby io baka amy donia ty, zen̈y mahavy irô mivolan̈a raha baka amy donia ty, ary donia ty mitandren̈y irô. 6 Fa atsika ndraiky baka amy Zan̈ahary. Mitandren̈y atsika aby lan̈iany olo mahay Zan̈ahary, fa tsy mitandren̈y atsika ndraiky lan̈iany olo tsy baka amy Zan̈ahary. Baka amy zen̈y ahaizantsika izikoa marin̈y hafatra araiky na diso.
7 Rahalahy ndreky ranabavy tiako aby, alô atsika hifankatia fo, fôtony fitiavan̈a io baka amy Zan̈ahary. Ary lan̈iany olo manan̈a fitiavan̈a, izy tsy basiny naterakan’ny Zan̈ahary fo fa mahay Zan̈ahary koa. 8 Tsy mahay Zan̈ahary lan̈iany olo tsy manan̈a fitiavan̈a, fôtony Zan̈ahary io fitiavan̈a. 9 Karaha ty nan̈aboahan’ny Zan̈ahary fa atsika tiany: Izy nan̈iraka Zanany lahitaokan̈a nandeha tamy donia ty, amy zen̈y baka amy Zanany io hazahoantsika fiainan̈a tsisy farany. 10 Ia izy nandefa Zanany hatao sôron̈o fampihavanan̈a nohon’ny fahotan̈antsika. Tsy nohon’ny atsika tia izy nahavy izy nan̈ano zen̈y, fa nohon’ny atsika tiany.
11 Rahalahy ndreky ranabavy tiako aby, izikoa karaha zen̈y nataon’ny Zan̈ahary nankatia atsika, dikan’izen̈y atsika samby atsika koa tsy maintsy mifankatia. 12 Tsiary nisy olo nahita Zan̈ahary. Izikoa atsika mifankatia fo, Zan̈ahary tsy hiala atsika foeky aviô fitiavan̈anany natao lavorary an̈atin’ny fôntsika ao. 13 Ty ahaizantsika fa atsika tafikamban̈a aminany fo aviô izy tafikamban̈a amintsika: Fan̈ahy masin̈inany namezany atsika. 14 Tsy basin’izen̈y fa, atsika lastiô nahita sady mitsangana vavolombelon̈o man̈ambara fa Baba nan̈iraka Zanany han̈avotro donia ty. 15 Izikoa olo araiky man̈eky fa Jesosy io Zanakan’ny Zan̈ahary, Zan̈ahary ho tafikamban̈a aminany fo, aviô izy ho tafikamban̈a amy Zan̈ahary. 16 Nanjary haintsika sady inoantsika fa atsika tian’ny Zan̈ahary.
Zan̈ahary io fitiavan̈a, ke izikoa olo araiky tsy vôly man̈aboaka fitiavan̈a, izy ho tafikamban̈a amy Zan̈ahary fo, aviô Zan̈ahary ho tafikamban̈a aminany fo. 17 Karaha zen̈y nahavy fitiavan̈a io natao lavorary an̈atin’ny fôntsika ao, amy zen̈y atsika hasaky hivolan̈a izikoa fa avy andra fitsaran̈a, fôtony karaha Kristy koa atsika amy donia ty. 18 Tsisy tahotro foeky an̈atin’ny fitiavan̈a, fôtony tahotro io mahavy atsika tsy hahavita raha tiantsika hatao. Fa fitiavan̈a lavorary ndraiky mahavy atsika tsy havozo. Matoa bakà olo araiky mavozo, dikan’izen̈y fitiavan̈anany mbala tsy natao lavorary. 19 Atsika tia, fôtony izy nankatia atsika voanalohany.
20 Izikoa misy olo mivolan̈a fa izy tia Zan̈ahary, kanefa rahalahiny ndraiky halany, dikan’izen̈y izy mpavandy. Izikoa bakà izy tsy tia rahalahiny kanefa rahalahiny io hitany be iô, akôry ma ataony ho tia Zan̈ahary tsy hitany an̈y? 21 Ary ty didy nazontsika baka taminany: Lan̈iany olo tia Zan̈ahary tsy maintsy tia rahalahiny.