Vaovao Tsara Nisoratin’i Marka
1 Fanombohan’ny vaovao tsara momba Jesosy Kristy, Zanakan’ny Zan̈ahary: 2 Ty raha nisoratin’ny mpaminan̈y Isaia: “(Mpitondra hafatranaka hirahako handeha alohanao,* ke izy han̈amboatra lalan̈a himboanao.) 3 Zen̈y misy olo* mandronton̈o baka amy tany paiky an̈y: ‘Amboara lalan̈a handihanan’i Jehovah! Ataova mahitsy lalan̈anany.’” 4 Jaona Mpan̈ano Batisa tamy tany paiky tan̈y. Izy nitory fa tôkony hatao batisa olo araiky, misy han̈aboahany fa izy efa nibebaka, am’izen̈y Zan̈ahary han̈ambela fahotan̈anany. 5 Ke olo jiaby tamy faritry Jodia ndreky olo jiaby ta Jerosalema navy hitandren̈y izy. Irô nataony batisa* tamy Ten̈aranon’i Jordany. Kila olo namaosa fahotan̈anany tamin’olo jiaby tiô. 6 Jaona nisikiny lamba vita tamy volovolon’ny shamô, baka iô tamy vanian̈anany nisy saintiry angôzy, aviô hanin̈inany kijeja ndreky antely* dỳ. 7 Ke izy nitory karaha ty: “Misy olo manan̈a fahifan̈a mandilatra zaho ho avy afaranaka ao. Zaho tsy man̈eva hiôndriky hamaha fehin’ny savatinany foeky! 8 Zaho nan̈ano batisa anarô tamy rano, fa izy ndraiky han̈ano batisa anarô amy fan̈ahy masin̈y.”
9 Tam’izen̈y, Jesosy niala ta Nazareta ta Galilia, ke lôso izy nan̈aton̈o Jaona tamy Ten̈aranon’i Jordany tan̈y, baka izy hataony batisa. 10 Niaraka Jesosy niarin̈y baka tan̈atin’ny rano tao, hitany nibian̈a lan̈itry. Baka iô fan̈ahy masin̈y, karaha pizon in̈y, nijotso ke nandeha tan̈abonany. 11 Aviô nisy feo baka tan-dan̈itry nivolan̈a karaha ty: “Anao Zanako, tiako mare anao, sady ten̈a mamparavoravo zaho raha ataonao.”
12 Direkty izy nampirisihin’ny fan̈ahy masin̈y handeha amy tany paiky an̈y. 13 Izy nidôko tamy tany paiky tan̈y tan̈atin’ny 40 andra. Tan̈y Satana nitsapa jery izy. Nisy biby dỳ koa tan̈y, kanefa nisy anjely nan̈ampy izy.
14 Jaona koa fa navoasambotro, Jesosy nandeha ta Galilia nitory vaovao tsaran’ny Zan̈ahary. 15 Ho izy: “Efa navy fotoan̈a voatôndro, aviô Fanjakan̈an’ny Zan̈ahary efa marikitry. Anarô mibibaha, ke minoa vaovao tsara.”
16 Jesosy koa fa nandeha tamy sisin’ny Ranomasin̈in’i Galilia, izy nahita Simona ndreky Andrea rahalahiny. Irô nan̈atsipy haratondrô tan-dranomasin̈y, fôtony irô mpan̈arato. 17 Ke ho Jesosy tamindrô: “Anarô man̈araha zaho, fa anarô hataoko mpan̈arato olo edy!” 18 Direkty nambelandrô haratondrô, aviô irô nan̈araka izy. 19 Izy koa fa lôso lavidavitry hely, izy nahita Jakoba ndreky Jaona, zanakan’i Zebedio. Irô roe mirahalahy io tam’izen̈y tan̈atin’ny sambondrô, nan̈amboatra raha robaka tamin’ny haratondrô. 20 Direkty Jesosy nikaiky irô, ke ningiandrô tan̈atin’ny sambo tao Zebedio babandrô ndreky irô mpiasandrô aby io, aviô lôso irô nan̈araka izy. 21 Irô baka tiô nandeha ta Kapernaomy.
Niaraka andra sabata nanomboko, Jesosy niditry tamy synagoga tao, aviô izy nanomboko nampianatra. 22 Ke lany fan̈ahy irô tamy fomba fampianarany, fôtony naboakany tsarabe fa baka amy Zan̈ahary raha nampianariny,* fa tsy karaha zen̈y ndraiky nataondrô mpanoratra lalàn̈a aby io. 23 Tam’izen̈y tsarabe, nisy lelahy araiky nisazaohan’ny demony* tamy synagoga tao. Izy nandronton̈o karaha ty: 24 “Ino ma dianao atỳ Jesosy baka a Nazareta? Handeha handripaka zahay ma navianao atỳ? Haiko tsarabe fa anao irakan’ny Zan̈ahary!”* 25 Kanefa izio nisiahan’i Jesosy karaha ty: “Mangìna! Miboaha baka aminany ao anao!” 26 Ke lelahy io nataon’ny demony io nitsipatsipaka, baka iô demony io niafatrafatra angôvo jiaby, aviô izy niboaka baka tamy lelahy io. 27 Lany fan̈ahy olo jiaby, ke irô nifampikoran̈a karaha ty: “Ino loatra ty zalahy? Fampianaran̈a vaovao ay! Ndraiky firaka amy demony mbala amezany beko ndreky anan̈any fahifan̈a, ke man̈eky raha volan̈iny!” 28 Betibetiky fo, lazanany efa niparitaka tamy faritry jiaby ta Galilia.
29 Irô baka tiô niala tamy synagoga tao, ke lôso irô nandeha tan-tran̈on’i Simona ndreky Andrea, niaraka tamy Jakoba ndreky Jaona. 30 Rafozambavin’i Simona tam’izen̈y nilopaka be tan̈abon’ny fandrian̈a fôtony izy nazon’ny lafievra.* Direkty nivolan̈indrô tamy Jesosy raha nahazo man̈angy io. 31 Ke Jesosy nan̈aton̈o man̈angy io, baka iô nisambôriny tan̈anany, aviô nitahitahiny izy hitsangana. Ke nafaka lafievran’ny man̈angy io, baka iô izy nandeha nandoky hanin̈indrô.
32 Andra koa fa tsôfotro, nindesin’olo taminany tiô lan̈iany olo narary ndreky olo nisy demony; 33 ke olo jiaby tan-tanàna tao vory tam-baravaran̈andrô tiô. 34 Ke izy nampajanga olo marobe nisy aretin̈y isan-karazany, aviô nan̈aboaka demony marobe; kanefa irô demony aby io tsy nambelany nivolan̈a foeky, fôtony haindrô fa izy Kristy.*
35 Maraindrain̈y mbala mahizikiziky in̈y, nifaoha izy, baka iô lôso izy nandeha tamy tany mitaokan̈a. Tan̈y izy nivavaka. 36 Kanefa Simona ndreky irô olo dia araiky taminany aby io nitady izy eraka tany jiaby. 37 Izy koa fa hitandrô, ho irô taminany: “Olo jiaby mitady anao.” 38 Kanefa ho izy tamindrô: “Alô atsika handeha amy tany hafa, amy tanàna man̈odidin̈y eto, am’izen̈y zaho ho afaka hitory an̈y koa, fôtony zen̈y antony naviako.” 39 Ke lôso izy nitory tamy synagoga tamy faritry jiaby ta Galilia ndreky nan̈aboaka demony.
40 Nisy lelahy boka araiky koa nan̈aton̈o izy, baka iô nandohaliky sady niangavy izy karaha ty: “Izikoa tianao hampadio zaho, ho vitanao raha zen̈y.” 41 Nahinakinaka Jesosy nahita izy, ke nampariny tan̈anany, baka iô lelahy io nikasihiny; ho izy taminany: “Ia, tiako han̈ano zen̈y! Hadio anao.” 42 Tiô ny iô, nafaka habokan̈an’ny lelahy io, ke nadio izy. 43 Direkty lelahy io nirahiny nandeha, fa talohan’izen̈y izy nifeperiny mare, 44 ke ho izy taminany: “Aza ambarambara olo raha tiô in̈y, fa mindao anao mandeha amy mpisôron̈o an̈y, aviô fôtony anao nidiovin̈y, mitondrasa fan̈atitry eraka raha nan̈irahan’i Mosesy, am’izen̈y ho hitandrô fa anao efa janga.” 45 Kanefa niaraka lelahy io lôso, nitantarainy tamin’olo jiaby raha nandalo in̈y, ke tsisy tanàna afaka nidiran’i Jesosy eky fôtony izy direkty hain’olo. Izy nidôko tamy tany mitaokan̈a tambelan̈a tanàna tan̈y. Kanefa nisy olo fo nan̈aton̈o izy baka amy tany jiaby.