Taratasy Handeha Amindrô Romanin̈y aby Io
15 Kanefa, atsika matanjaka tôkony hitondra fahalimian̈an’olo tsy matanjaka, fa tsy tôkony han̈ano raha mamparavoravo ain̈intsika. 2 Atsika tsiaraikiaraiky samby tôkony han̈ano raha mamparavoravo olo ndreky han̈ano ny tsara amin’olo, baka hampahery izy. 3 Fôtony ndray Kristy fo tsy nan̈ano raha namparavoravo ain̈inany. Karaha ty baka raha efa voasoratra: “Tihitihy ataondrô olo manihitihy anao aby io mavoa zaho.” 4 Raha jiaby voasoratra taloha tan̈y baka nisoratin̈y misy hampianaran̈a atsika, amy zen̈y atsika hanan̈a fan̈antinan̈a, fôtony Soratra Masin̈y io man̈ampy atsika hiaritry sady man̈amia atsika fankahirezan̈a. 5 Irarian̈a Zan̈ahary man̈amia fiaretan̈a ndreky fankahirezan̈a han̈amia anarô jiaby toe-tsain̈y karaha nin’i Kristy Jesosy, 6 amy zen̈y anarô hiray sain̈y ke ho feo* araiky han̈amia voninahitry Zan̈ahary Baban’i Jesosy Kristy Tômpontsika.
7 Ke karaha nataon’i Kristy nandray tsara anarô, mba raisa tsara* koa olo hafa. Anarô koa fa man̈ano zen̈y aminarô samby anarô, Zan̈ahary hahazo voninahitry. 8 Fôtony zaho man̈ambara anarô fa Kristy nanjary mpanompon’olo voavositry misy han̈aboahan̈a fa Zan̈ahary mivolan̈a ny marin̈y, ke ho voaporofo fa mety atokisan̈a fampan̈antinan̈a nataony tamindrô dadilahibendrô aby io. 9 Amy zen̈y koa irô firenena aby io han̈amia voninahitry Zan̈ahary nohon’izy mamindra fô. Eraka raha voasoratra ty: “Zen̈y mahavy zaho han̈eky anao amason’olo ndreky amindrô firenena aby io, baka iô zaho han̈ano hira hideran̈a an̈aran̈anao.” 10 Aviô koa ho izy: “Miravoravoa miaraka amy vahoakan’ny Zan̈ahary anarô hafa firenena!” 11 Baka iô koa: “Deray Jehovah, anarô firenena jiaby, aviô alô vahoaka jiaby hidera izy.” 12 Karaha ty koa ho Isaia: “Hisy vahatran’i Jese hitsangana ke hitondra firenena, baka iô aminany han̈apitrahandrô firenena aby zen̈y fan̈antinan̈andrô.” 13 Irarian̈a Zan̈ahary man̈amia fan̈antinan̈a hameno fônarô amin’ny haravoan̈a ndreky fiadanan̈a, fôtony anarô matoky izy, amy zen̈y fan̈antinan̈anarô hahaihitombo fo* baka amin’ny angôvon’ny fan̈ahy masin̈y.
14 Zaho tômpin’ain̈y foeky ziô resy lahatra fa anarô io koa, rahalahiko aby, vôn̈ono han̈ano raha tsara sady mahay raha maro koa. Aviô, anarô samby anarô mahavita mifan̈anatra.* 15 Ndray izy man̈ano zen̈y, raha sasany nisoratiko taminarô tan̈atin’ny taratasy ty nipotseriko tsarabe, misy hampatsiaraovan̈a anarô ndraiky koa. Zan̈ahary baka nan̈aboaka hatsaram-pan̈ahy miavaka taminaka, 16 ke nanendry zaho hanjary mpanompon’i Kristy Jesosy,* hitory vaovao tsaran’ny Zan̈ahary amin’olo hafa firenena. Man̈ano asa masin̈y io zaho baka irô hanjary fan̈atitry ankasitrahin̈y, sady ankamasin̈iny baka amy fan̈ahy masin̈y.
17 Ke ravoravo zaho fôtony zaho mpanompon’i Kristy Jesosy sady man̈ano asan’ny Zan̈ahary. 18 Zaho tsy hikoran̈a raha hafa, izikoa tsy raha nataon’i Kristy Jesosy tamin’izy nampiasa zaho, amy zen̈y irô hafa firenena aby io han̈araka volan̈anany baka amy raha volan̈iko ndreky raha ataoko, 19 ndreky baka amin’ny angôvon’ny famantaran̈a ndreky fahagagan̈a, baka iô baka amin’ny angôvon’ny fan̈ahin’ny Zan̈ahary. Ke zaho nahavita nitory vaovao tsara momba Kristy tamy fomba feno, nanomboko ta Jerosalema ndreky man̈odidin̈y, firaka ta Ilyrikiona. 20 Tanjon̈onaka tamy zen̈y tsy han̈ambara vaovao tsara amy tany efa mahay an̈aran̈an’i Kristy, fôtony zaho tsy tihan̈ôrin̈y an̈abon’ny fôtotro nataon’olo hafa, 21 eraka raha voasoratra ty: “Lan̈iany olo mbala tsy nitantaràn̈a momba izy, hahita izy; aviô lan̈iany olo mbala tsy naharen̈y, hahay.”
22 Zen̈y koa nahavy zaho matetiky voasakana, ke tsy navy taminarô tan̈y. 23 Kanefa ziôty zaho efa tsy manan̈a faritany mbala tsiary nitorian̈a amindrô faritry aby io, aviô efa tan̈atin’ny taon̈o maro* zaho nan̈iry mare tihandeha aminarô an̈y. 24 Ke lera zaho mandeha an’Espan̈y, zaho man̈anten̈a hahita anarô ndreky hateterinarô, zaho koa fa baka miarakaraka hely aminarô. 25 Fa zaho ziô efa handeha a Jerosalema hanompo* irô olo masin̈y aby io. 26 Ravoravo irô rahalahy aby a Makedonia ndreky a Akaia nandrasa raha anan̈andrô misy han̈ampian̈a lan̈iany olo masikiny amindrô olo masin̈y aby a Jerosalema an̈y. 27 Marin̈y ndraiky fa ravoravo irô nan̈ano raha zen̈y, kanefa ny marin̈y aminany koa, izio traosa tôkony hifaindrô amindrô. Irô hafa firenena aby io baka mba nahazo tamin’ny harian̈a ara-pan̈ahindrô olo masin̈y aby io, ke adidindrô ndraiky ziôty mikarakara* irô olo masin̈y aby io ke man̈ampy irô amy raha ilaindrô andavanandra. 28 Ke lera raha zen̈y vitako aviô lera zaho baka man̈atitry fan̈amezan̈a* zen̈y soa aman-tsara amindrô olo masin̈y aby an̈y, zaho handeha an’Espan̈y ke amy zen̈y zaho handalo hely aminarô an̈y. 29 Baka iô koa, haiko fa lera zaho avy aminarô an̈y, anarô hitondrasako fitahian̈a marobe baka amy Kristy.
30 Ke, fôtony atsika mino Jesosy Kristy Tômpontsika sady mifankatia nohon’ny angôvon’ny Zan̈ahary, mampirisiky anarô zaho, rahalahy aby, baka anarô hifen̈y mare hivavaka ninaka amy Zan̈ahary, karaha efa ataoko. 31 Amy zen̈y zaho tsy ho azondrô olo tsy mpino aby a Jodia an̈y, aviô mba hankasitrahandrô olo masin̈y aby a Jerosalema an̈y fanompoan̈a hataoko nindrô. 32 Ke ho ravoravo zaho lera zaho avy aminarô an̈y, izikoa sitrapôn’ny Zan̈ahary, baka iô samby ho velombelon̈o* atsika jiaby. 33 Irarian̈a Zan̈ahary man̈amia fiadanan̈a hiaraka aminarô jiaby! Ameny.