Taratasy handeha amindrô Hebreo aby io
5 Letry zay bakà, Zan̈ahary nifidy mpisôron̈obe baka tamin’olombelon̈o. Izio nitindreny hanompo izy misy hahatsara olo, amy zen̈y mpisôron̈obe io afaka han̈ano fan̈atitry ndreky sôron̈o nohon’ny fahotan̈a. 2 Ndraikindraiky misy olo man̈ano hadisovan̈a* na manota kanefa tsy hainy aby. Ke mpisôron̈obe io mahay mahinakinaka olo karaha zen̈y, fôtony izy koa mba mpanota. 3 Nohon’izy mpanota zen̈y, izy tsy maintsy man̈ano sôron̈o nohon’ny fahotan̈anany, karaha ataony amy nin’olo hafa.
4 Tsy baka amy sitrapôn’olo araiky mahavy izy mpisôron̈obe, fa karaha tamin’i Arona in̈y, Zan̈ahary mifidy izy.* 5 Karaha zen̈y koa tamy Kristy. Tsy izy tômpiny nan̈amia voninahitry ain̈inany hanjary mpisôron̈obe, fa araiky nivolan̈a karaha ty in̈y: “Anao zanako; niany zaho manjary babanao.” 6 Karaha ty koa ho izy amin’ny andininy hafa: “Anao mpisôron̈o karaha Melkizedeka, ary anao mpisôron̈o mandrakizay.”
7 Tamy Kristy tambony tany teto, izy niafatrafatra mare nitomoan̈y izikoa fa nilafidafiky ndreky niangavy Zan̈ahary han̈ampy izy. Zan̈ahary bakà mahavita man̈avotro izy amy fahafatesan̈a. Nitandrin̈esan’ny Zan̈ahary vavakanany fôtony izy navozo Zan̈ahary. 8 Ke ndray izy zanany, izy nianatra nan̈araka volan̈a baka tamy raha niaretany. 9 Izy koa fa baka natao lavorary, izy nampiasain’ny Zan̈ahary hamonjian̈a lan̈iany olo man̈araka volan̈anany,* ndreky han̈amia irô fiainan̈a tsisy farany. 10 Fôtony bakà, izy nifidin’ny Zan̈ahary hanjary mpisôron̈obe karaha Melkizedeka.
11 Maro raha mety koran̈inay momba izy, kanefa lôso sarotro han̈azava raha aby zen̈y aminarô, fôtony anarô tsy tihiezaka hahay dikan’ny raha aby zen̈y foeky. 12 Ke ndray anarô ziô efa tôkony ho mpampianatra izikoa fandihanan’ny fotoan̈a dinihin̈y, anarô mbala mila olo fo hampianatra anarô fampianaran̈a fôtotro efa nianaranarô baka tamy volan̈an’ny Zan̈ahary. Anarô bakà nanjary nimpody mila ronono ndraiky, karaha zazamena, fa tsy hanin̈y mahery fohanin’olobe. 13 Fôtony bakà, lan̈iany olo mivelon̈o amy ronono mbala tsaiky aby, ke tsy haindrô foeky volan̈an’ny fahamarin̈ana zen̈y. 14 Fa hanin̈y mahery ndraiky nin’olobe, tsy nin-jôvy zen̈y fa nin’olo mahay mandiniky, fôtony irô zatra mampiasa jerindrô ke mahay man̈avaka ny tsara ndreky ny ratsy.