Taratasy Handeha Amindrô Romanin̈y aby Io

1 Paoly, mpanompon’i* Kristy Jesosy sady voakaiky hanjary apôstôly, ndreky voataokan̈a han̈ambara vaovao tsaran’ny Zan̈ahary, 2 tsy ino zen̈y fa vaovao tsara efa nambarany tsialohaloha baka tamindrô mpaminan̈inany aby io, amy Soratra Masin̈y ao, 3 vaovao tsara momba Zanany, araiky baka amy taranakan’i Davida, izikoa erakan’ny nôfotro, 4 kanefa baka amin’ny angôvon’ny fan̈ahy masin̈y, izy natsangana tamy maty ke nambara fa Zanakan’ny Zan̈ahary. Tsy azôvy izio fa Jesosy Kristy Tômpontsika. 5 Baka taminany nazahoako* hatsaram-pan̈ahy miavaka* sady nahavy zaho ho voatendry hanjary apôstôly, baka firenena jiaby hino ndreky han̈araka volan̈anany, ke han̈amia voninahitry an̈aran̈anany. 6 Baka tamy firenena aby zen̈y koa nikahian̈a anarô, amy zen̈y anarô hanjary fanan̈anan’i Jesosy Kristy. 7 Zaho manoratra aminarô jiaby a Roma, tsy azôvy zen̈y fa anarô olo aby tian’ny Zan̈ahary ndreky voakaiky hanjary olo masin̈y:

Irarian̈a Zan̈ahary Babantsika ndreky Jesosy Kristy Tômpo han̈aboaka hatsaram-pan̈ahy miavaka aminarô sady han̈amia anarô fiadanan̈a!

8 Voanalohany antsendriky, zaho man̈ano mersy Zan̈aharinaka amin’ny an̈aran̈an’i Jesosy Kristy momba anarô jiaby, fôtony finoan̈anarô malaza man̈eran̈a donia ty. 9 Zaho manompo* Zan̈ahary amy fônaka jiaby, ke mitory vaovao tsara momba Zanany. Aviô Zan̈ahary afaka mitsangana ho vavolombelon̈onaka fa zaho mivavaka momba anarô fo, 10 salakady miangavy baka ho avy soa aman-tsara aminarô an̈y fo zaho, izikoa sitrapôn’ny Zan̈ahary. 11 Zaho baka efa tihahita anarô mare, fôtony zaho tihandrasa fan̈amezan̈a ara-pan̈ahy aminarô, misy ankahirezan̈a anarô, 12 na izikoa atao amy volan̈a hafa, baka atsika hahavita hifampahery. Ke finoan̈anaka hampahery anarô, aviô ninarô koa hampahery zaho.

13 Kanefa tiako ho hainarô, rahalahy aby, fa efa matetiky zaho tihandeha aminarô an̈y, fa misy raha manamban̈a fo firaka iziô. Zaho tihandeha aminarô an̈y baka zaho hahita vokatra tsara izikoa fa mitory an̈y, karaha tamindrô firenena aby io koa. 14 Samby manan̈a traosa aminaka aby na Griky zen̈y na tsy Griky,* na olo nahita fianaran̈a* na olo tsy nahita fianaran̈a.* 15 Ke efa tsy din̈iko koa han̈ambara vaovao tsara aminarô a Roma an̈y. 16 Zaho tsy men̈atra man̈ambara vaovao tsara. Izio baka fomba ampiasain’ny Zan̈ahary han̈aboahan̈a angôvonany misy hamonjian̈a lan̈iany olo mino, Jiosy antsendriky zay vo Griky. 17 Fôtony, baka amy zio* han̈aboahan̈a fa Zan̈ahary man̈ano ny rariny. Raha zen̈y hitan’olo manan̈a finoan̈a, ke mahaimitombo fo finoan̈andrô, eraka raha voasoratra ty: “Olo marin̈y ho velon̈o fôtony izy manan̈a finoan̈a.”

18 Zan̈ahary an-dan̈itry an̈y han̈aboaka helokonany amin’olo jiaby tsy mavozo izy ndreky amin’olo tsy man̈ano ny marin̈y ke mampiasa tetiky tsy manjary misy hanakatsakanan̈a olo tsy hahay ny marin̈y. 19 Efa naboaka irô tsarabe raha tôkony ho haindrô momba Zan̈ahary, ary Zan̈ahary lastiô nan̈ano raha hampazava raha zen̈y tamindrô. 20 Fôtony toetrinany tsy hita maso, tsy ino zen̈y fa angôvonany mandrakizay ndreky maha Zan̈ahary izy, hita mazava tsarabe rango niasan̈a donia ty. Toetrinany aby zen̈y hita baka amy raha nataony, ke irô tsisy fialan-tsin̈y. 21 Irô ndray nahay Zan̈ahary, irô tsy nan̈amia voninahitry izy* aviô irô tsy nankasitraka izy, fa irô nanjary tsy misain̈y eky, ke fôndrô efa donto io nanjary latsaka an̈atin’ny hiziky. 22 Irô ndray man̈ano irô misy jery, irô efa nanjary lefaka.* 23 Voninahitry tôkony namezan̈a Zan̈ahary tsy mety lò, namezandrô sarin’olo mety lò ndreky sarin’ny vôron̈o aviô biby misy vitiny efatra baka iô biby mandady.

24 Irô baka tihan̈ano raha nirin’ny fôndrô fo, ke zen̈y nahavy Zan̈ahary nan̈ambela irô han̈araka fomba maloto, amy zen̈y vatan̈andrô ho voabaraka. 25 Fahamarin̈ana momba Zan̈ahary natakalondrô vandy, ke raha niforôn̈iny ndraiky nitompoendrô ndreky nivavahandrô,* fa tsy araiky Mpamôron̈o, araiky derain̈a mandrakizay. Ameny. 26 Zen̈y nahavy Zan̈ahary nan̈ambela irô han̈eram-pô amy fan̈anaovan̈a firaisan̈a mampangaroharo, fôtony man̈angy tamindrô tao niala tamy fan̈anaovan̈a firaisan̈a voajanahary, fa nan̈ano firaisan̈a tsy voajanahary. 27 Karaha zen̈y koa fa lelahy tsy nan̈ano firaisan̈a voajanahary tamy man̈angy eky, fôtony naresaka loatra fan̈irian̈andrô tihan̈ano firaisan̈a amy lelahy miran̈a irô, ke irô nanjary nan̈ano raha tsy fatao tamindrô samby irô. Irô io tsy maintsy hahazo sazy* fanaoko irô, baka amin’ny hadisovan̈andrô.

28 Azon’irô nihevitry fa tsy ilain̈a mahay Zan̈ahary zen̈y,* irô nambelan’ny Zan̈ahary hieritreritry raha tsy manjary ke han̈ano raha tsy fatao. 29 Tamy raha jiaby nataondrô, irô nan̈ano raha tsy marin̈y, ratsy fan̈ahy, tsy nety afa-pô,* sady nan̈ano raha ratsy. Irô koa feno fitsiriritan̈a, mamono olo, tia mankàny, mamitaka, tia man̈isy ratsy olo. Irô io mpitsikotsiko,* 30 mpan̈aratsy olo, mankahala Zan̈ahary, mpanihitihy olo, mpan̈ambony ten̈a, werawera,* mpan̈ano teti-dratsy,* tsy tia man̈araka volan̈an’ny raimandreny, 31 tsy misain̈y, tsy man̈aja fifan̈ikian̈a, tsy tia havan̈a, aviô tsisy hinakinaka. 32 Haindrô tsarabe didin’ny Zan̈ahary erakan’ny rariny ty: Lan̈iany olo man̈ano raha aby io man̈eva ho foaty. Kanefa, irô tsy vitany man̈ano irô raha aby io fo fa, irô koa mbala mankasitraka olo mpan̈ano raha aby io.