Taratasy Handeha Amindrô Romanin̈y aby Io
11 Ke ho zaho: Zan̈ahary ma niala* vahoakanany? Tsisy karaha! Fôtony zaho koa mba Israelita, sady taranakan’i Abrahama, baka amy fokon’i Benjamina. 2 Zan̈ahary tsy niala vahoakanany; irô io nifidiny voanalohany. Tsy hainarô ma raha koran̈in’ny Soratra Masin̈y momba Elia, tamin’izy nitarain̈y tamy Zan̈ahary momba irô Israelita aby io? 3 Ho izy: “A Jehovah e, mpaminan̈inao aby io nivonendrô, aviô alitaranao naronganandrô. Efa zaho fo tavela, kanefa irô mbala mitady han̈adoso fahin̈ananaka* koa.” 4 Kanefa ino raha nivolan̈in’ny Zan̈ahary taminazy? Ho izy: “Zaho mbala manan̈a 7 000 lahy an̈y tsy nandohaliky tamy* Bala.” 5 Karaha zen̈y koa fa, amy ziôty, mbala misy lambiny an̈y; tsy azôvy irô io fa olo voafidy baka amin’ny hatsaram-pan̈ahy miavaka. 6 Ke izikoa raha zen̈y baka tamin’ny hatsaram-pan̈ahy miavaka, dikan’izen̈y tsy baka tamy raha nataondrô nifidianany irô. Izikoa tsy zen̈y baka, efa tsy hatsaram-pan̈ahy miavaka eky hatsaram-pan̈ahy miavaka io.
7 Ke akôry? Raha ten̈a nitadiavin’Israely in̈y tsarabe tsy nazony, fa irô olo voafidy aby io ndraiky nahazo izy. Sasany ndraiky nanjary donto, 8 eraka raha voasoratra ty: “Ziska ziôty, nataon’ny Zan̈ahary tafandry mare irô,* amy zen̈y masondrô tsy hahita, baka iô sofin̈indrô tsy haharen̈y. 9 Aviô koa, karaha ty ho Davida: “Ambilà latabatrandrô* hanjary fandriky, vela-pandriky, vato mampavoatsikon̈o ndreky sazy amindrô. 10 Anò masondrô hanjavon̈o amy zen̈y irô tsy hahita, baka iô ataova mivônkin̈y fo tahezan̈andrô.”
11 Ke ho zaho: Irô ma voatsikon̈o ke lavo aviô tsy tafiangana eky? San̈atria! Kanefa baka amin’ny hadisovan̈andrô nahavy irô hafa firenena aby io hivonjen̈a, ke raha zen̈y hampa be fô irô Jiosy aby io. 12 Izikoa basy baka amin’ny hadisovan̈andrô nahavy fitahian̈a* amy donia ty, aviô izikoa baka amin’irô nahaivitsy nahavy fitahian̈a amin’ny hafa firenena, hahaiho be fo fitahian̈a izikoa feno kôntindrô!*
13 Zaho ziôty ndraiky mikoran̈a aminarô hafa firenena. Fôtony zaho apôstôlin’ny hafa firenena, zaho man̈amia voninahitry fanompoan̈anaka,* 14 misy hahitan̈a tsao mba ho vitako fo handrisiky irô olo firenena araiky aminaka aby io* ho be fô amy zen̈y sasany amindrô io ho avotro. 15 Ke izikoa baka amin’irô narian’ny Zan̈ahary mahavy donia ty mihavan̈a aminany, han̈ano akôry eky lera irô raisiny? Tsy mira efa naty in̈y irô kanefa velon̈o ndraiky? 16 Sôsoko zen̈y, izikoa masin̈y* tapany amy koba atao voaloham-bokatra, dikan’izen̈y masin̈y* koa koba jiaby. Baka iô, izikoa masin̈y vahatran’ny kakazo, masin̈y koa sampan̈an’izio.
17 Kanefa, izikoa sasany amindrô sampan̈a aby io nitapahan̈a, ke anao ndraiky natao grefy amy sampan̈a tavela iô, ndray anao olivy dỳ zen̈y, ke mba nahazo tamy ranon’ny vahatran’ny olivy io, 18 aza man̈ambony tena* amindrô sampan̈a efa tapaka aby io. Izikoa anao man̈ambony ten̈a* amindrô io, alaiva onon̈o fa tsy anao mitondra vahatra io, fa vahatra io mitondra anao. 19 Ke anao hivolan̈a: “Nisy sampan̈a nitapahan̈a, baka zaho nety natao grefy tiô.” 20 Marin̈y zen̈y. Irô io nitapahan̈a fôtony irô tsy nino, fa anao ndraiky mitsangana fôtony anao mino. Ke anao aza man̈ambony ten̈a, fa mitandrema.* 21 Ndray irô ten̈a sampan’ny kakazo aby io fo tsy nambelan’ny Zan̈ahary nidôko tiô, ke anao mieritreritry fa anao hambelany hidôko iô? 22 Zen̈y ahitanao fa Zan̈ahary io tsara fan̈ahy kanefa mentitry. Izy mentitry amy sampan̈a tapaka, fa tsara fan̈ahy aminao ndraiky izy, izikoa anao mbala mifen̈y fo man̈ano raha han̈aboahany hatsaram-pan̈ahy aminao. Izikoa tsy zen̈y baka, anao koa mba handeha hitapahan̈a. 23 Baka iô koa, izikoa irô man̈aboaka fa irô mino, irô hatao grefy ndraiky koa, fôtony vitan’ny Zan̈ahary man̈ano grefy irô ndraiky. 24 Ndray anao fo nitapahan̈a baka tamin’ny olivy dỳ aviô natao grefy tamin’ny olivy nambolen̈a, natà raha zen̈y tsy fatao aby, ke intsaka eky irô ten̈a sampan̈a aby io? Tsy sarotro aminany foeky han̈ano grefy irô io amin’ny olivy nisy irô taloha.
25 Fôtony rahalahy aby, tiako ho hainarô raha momba sekire masin̈y ty baka anarô tsy hihevi-ten̈a ho misy jery: Sasany tamindrô Israelita aby io tsy taitry foeky izikoa tsy efa feno kôntindrô hafa firenena nampidirin̈y aby io, 26 ary zen̈y fomba han̈avaotan̈a Israely jiaby, eraka raha voasoratra ty: “Mpan̈avotro* io hiboaka baka a Ziona ao ke hampiala Jakoba amy raha ratsy fataony. 27 Aviô zaho han̈ano fifan̈ikian̈a amindrô, lera zaho man̈adoso fahotan̈andrô.” 28 Marin̈y fa irô io fahavalon’ny Zan̈ahary fôtony irô tsy nan̈eky vaovao tsara, ary raha zen̈y nahatsara anarô. Kanefa, nohon’ny fampan̈antinan̈a nataony tamindrô dadilahibendrô aby io, sasany tamindrô io nifidiny hanjary namany. 29 Fôtony Zan̈ahary tsy hanen̈iny amy kadô nataony, baka iô izy tsy hanen̈iny nikaiky irô olo nikahiany aby io. 30 Karaha anarô taloha tsy nan̈araka volan̈an’ny Zan̈ahary in̈y, kanefa anarô ziôty namindran̈a fô baka tamy tsy fan̈arahandrô volan̈a, 31 karaha zen̈y koa fa irô ziôty tsy nan̈araka volan̈a ke anarô hamindran̈a fô, amy zen̈y irô koa mba hamindran̈a fô. 32 Fa irô jiaby nataon’ny Zan̈ahary karaha gadra fôtony irô tsy nan̈araka volan̈a, amy zen̈y izy hamindra fô amindrô jiaby.
33 Ten̈a be* ankitin̈y harian̈an’ny Zan̈ahary ndreky fahendrenanany aviô fahaizan̈anany! Tsy takatran’ny jery foeky didim-pitsaran̈anany baka iô tsisy mahadiniky lalan̈anany!* 34 Ty baka raha voasoratra: “Azôvy nanjary nahay raha an̈atin’ny jerin’i Jehovah, aviô azôvy nanjary mpan̈amia hevitry izy?” 35 Na, “azôvy ma nan̈amia raha izy voanalohany, ke mahavy izy tsy maintsy mamaly raha zen̈y?” 36 Fôtony baka aminany aby raha jiaby, baka iô izy nampisy raha jiaby, aviô nohon’ny sitrapônany nampisy raha jiaby. Izy man̈eva hamezan̈a voninahitry mandrakizay. Ameny.