Taratasy Voanalohany Handeha Amindrô Korintianin̈y aby Io

9 Zaho ma tsy olo afaka? Zaho ma tsy apôstôly? Zaho ma tsy nahita Jesosy Tômpontsika? Anarô ma tsy vokatran’ny asanaka amy Tômpo ao? 2 Ary ndray zaho tsy apôstôlin’olo hafa, azoko antoko fa zaho apôstôlinarô, fôtony anarô tombo-kase mankamarin̈y fa zaho apôstôly amy Tômpo ao.

3 Ty fiaraovan-ten̈anaka amindrô olo man̈aratsy zaho aby io: 4 Zahay ma tsy manan̈a zò* hihinan̈a ndreky higiaka? 5 Zahay ma tsy manan̈a zò hanambady man̈angy mpino ndreky hitondra izy miaraka aminay, karaha ataon’ny apôstôly hafa ndreky rahalahin’ny Tômpo aviô Kefasy?* 6 Sa Barnabasy ndreky zaho fo mila miasa misy hamilaomanay ten̈a?* 7 Ndraiky misy maramila ma miantoko depansinany tômpiny? Azôvy olo nambôly rezain ke tsy mihinan̈a amy voan’izio? Na, azôvy olo miambin̈y andian’ôndrikôndriky ke tsy migiaka amy rononon’ôndrikôndriky aby io?

8 Raha volan̈iko zen̈y ma hevitrin’olombelon̈o? Tsy zen̈y koa ma raha volan̈in’ny Lalàn̈a? 9 Ty baka raha voasoratra amy Lalàn̈an’i Mosesy ao: “Aza fihezin̈y vavan’ny aomby man̈itsaka vary.”* Izio ma aomby aby io izy mampiasaloha Zan̈ahary io? 10 Sa nintsika nivolan̈any izy in̈y? Ia, nintsika ankitin̈y nanoratan̈a izy in̈y, fôtony olo araiky miasa tany ndreky mamango vary tôkony man̈ano zen̈y sady man̈anten̈a hahazo anjaranany.

11 Izikoa zahay namafy raha ara-pan̈ahy taminarô, diso ma zahay koa mijinja fan̈ampian̈a baka aminarô? 12 Izikoa olo hafa manan̈a zò hitaky raha zen̈y aminarô, ke tsy intsaka eky zahay? Kanefa zahay tsy man̈araraotro zònay* zen̈y, fa zahay miaritry raha jiaby amy zen̈y vaovao tsara momba Kristy tsy avoasakatsakana. 13 Tsy hainarô ma fa irô olo man̈ano fanompoan̈a masin̈y amy tempoly ao mihinan̈a raha ao, baka iô irô olo manompo tsy tapaka amin’ny alitara iô mahazo anjara baka amin’ny alitara? 14 Karaha zen̈y koa, Tômpo nan̈amia didy fa lan̈iany olo mitory vaovao tsara tôkony hivelon̈o amy vaovao tsara.

15 Zaho tsiary nan̈araraotro nampiasa araiky amy zò aby zen̈y. Aviô koa, zaho tsy manoratra raha aby ty misy han̈anaovan̈a raha aby zen̈y aminaka. Sitrany aby zaho maty tozay... Tsisy olo hambelako han̈adoso antony mampirehareha zaho! 16 Ke izikoa zaho man̈ambara vaovao tsara, tsisy antony tôkony hampirehareha zaho, fôtony zaho tsy maintsy man̈ano raha zen̈y. Ia, hidiran’andra zaho izikoa tsy mitory vaovao tsara! 17 Izikoa zaho man̈ano raha zen̈y an-tsitrapô, zaho hahazo valisoa. Fa ndray forse an̈anaovako raha zen̈y, izio ataoko fo fôtony izio efa nankin̈iny taminaka. 18 Ino basy valisoa ho azoko? Lera zaho man̈ambara vaovao tsara, zaho afaka man̈amia izio bôjo, sady zaho tsy man̈araraotro fahifan̈anaka* amy maha mpitory vaovao tsara zaho.

19 Fa ndray zaho afaka adidy amin’olo jiaby, ain̈inaka nataoko mpanompon’olo jiaby, misy hazahoako olo faran’izay maro. 20 Tamy Jiosy, zaho nanjary karaha Jiosy, misy hazahoako irô Jiosy aby io; tamin’olo ambanin’ny lalàn̈a, zaho nanjary karaha olo ambanin’ny lalàn̈a, ndray zaho tsy ambanin’ny lalàn̈a, misy hazahoako irô olo ambanin’ny lalàn̈a aby io. 21 Tamin’olo tsy manan̈a lalàn̈a, zaho nanjary karaha olo tsy manan̈a lalàn̈a, ndray zaho manan̈a lalàn̈an’ny Zan̈ahary sady ambanin’ny lalàn̈an’i Kristy, misy hazahoako olo tsy man̈ana lalàn̈a. 22 Tamin’olo malemy, zaho nanjary malemy, misy hazahoako olo malemy. Zaho nanjary raha jiaby tamy karazan̈an’olo jiaby, baka hisy amindrô io havaotako na amy fomba akôry na amy fomba akôry. 23 Nohon’ny vaovao tsara han̈anaovako raha jiaby zen̈y, misy hitoriako izio amin’olo hafa.

24 Tsy hainarô ma fa izikoa fa misy lakorsy, mpilomoay jiaby milomoay, kanefa araiky fo mahazo lakopy? Milomahiza koa misy hazahoanarô lakopy. 25 Lan̈iany olo mandray anjara amy lakorsy* mifehy ten̈a amy raha jiaby. Ia, man̈ano zen̈y irô misy hazahoandrô satroboninahitry mety robaka, fa atsika ndraiky man̈ano zen̈y misy hazahoantsika satroboninahitry tsy mety robaka. 26 Ke zaho koa fa milomoay, zaho tsy raha milomolomoay be karaha io fo; aviô zaho koa fa man̈ôndry, zaho tsy karaha raha mamango tsiko; 27 fa vangovangoako mare* vatan̈anaka baka iô izio andivôziko, tsao zaho ndraiky ny tsy hankasitrahan̈a,* kanefa zaho efa mba nitory tamin’olo hafa.