Taratasy Voanalohany Handeha Amindrô Korintianin̈y aby Io

8 Momba hanin̈y natao sôron̈o tamy sampy ndraiky, haintsika fa atsika jiaby samby misy raha haintsika momba raha zen̈y. Kanefa fahaizan̈a io mampipoerapoera, fa fitiavan̈a ndraiky mankafatatra. 2 Izikoa misy olo mihevitry fa izy mahay raha araiky, izy mbala tsy ten̈a mahay raha zen̈y erakan’ny tôkony hahaizany izy. 3 Fa izikoa ndraiky misy olo tia Zan̈ahary, izy hain’ny Zan̈ahary.

4 Momba fihinanan̈a hanin̈y natao sôron̈o tamy sampy ndraiky, haintsika fa sampy zen̈y tsisy dikany, baka iô tsisy Zan̈ahary izikoa tsy araiky fo. 5 Ndray maro baka raha kahian’olo zan̈ahary, na an-dan̈itry an̈y zen̈y na ambony tany eto, ary marin̈y ankitin̈y fa misy “zan̈ahary” maro ndreky “tômpo” maro, 6 amintsika ndraiky tsisy Zan̈ahary izikoa tsy araiky fo, tsy azôvy zen̈y fa Baba; izy navian’ny raha jiaby aviô atsika io ninany. Araiky fo koa Tômpo, tsy azôvy zen̈y fa Jesosy Kristy. Izy nampiasain̈a hampisy raha jiaby sady nampiasain̈a hampisy atsika koa.

7 Kanefa, raha zen̈y tsy mazava amin’olo jiaby. Sasany baka nanompo sampy taloha. Ke irô koa fa mihina hanin̈y natao sôron̈o tamy sampy, fahitandrô izio mbala misy ifandraisany amy sampy fo, ke tsy milamin̈y* feon’ny fieritreretan̈andrô fôtony izio malemy. 8 Kanefa hanin̈y tsy han̈ampy atsika hahaiharikitry Zan̈ahary. Tsy matiantoko atsika ndray tsy mihina, baka iô tsisy tombony azontsika ndray atsika mihina. 9 Fa mitandrema tsao fo zònarô hisafidy io hanjary karaha vato mampavoatsikon̈o olo malemy. 10 Natà hainarô fa tsisy dikany irô sampy aby io, izikoa anarô mihina an̈atin’ny tempolin’ny sampy ke hitan’olo manan̈a feon’ny fieritreretan̈a malemy, tsy ndraiky hahavy izy hihinan̈a raha natao sôron̈o tamy sampy edy raha zen̈y va? 11 Ndray efa hainao fa tsy man̈ino mihinan̈a hanin̈y zen̈y, anao handrobaka finoan̈an’ny araiky malemy io, kanefa izy rahalahinao aviô Kristy naty han̈avaotan̈a izy. 12 Anarô koa fa manota amy rahalahinarô karaha zen̈y ke mandratra feon’ny fieritreretan̈andrô mbala malemy, anarô manota amy Kristy. 13 Ke izikoa baka amin’ny hanin̈y edy mampalemy finoan̈an’ny* rahalahiko, sitrany zaho tsy hihina hena eky, baka zaho tsy hampalemy finoan̈anany.*