Taratasy voanalohany handeha amy Timoty
2 Voanalohany antsendriky, zaho mampirisiky anao hivavaka nin’ny karazan̈an’olo jiaby, ke iangavia Zan̈ahary han̈ampy irô. Aviô aza adin̈a man̈ano mersy Zan̈ahary. 2 Mivavaha koa nin’ny mpanjaka ndreky nin’ny manam-pahifan̈a jiaby,* amy zen̈y atsika afaka hiain̈y milamin̈y aviô tsisy mpanakantsakana, ke atsika hahavita hanompo Zan̈ahary amy fô jiaby aviô atsika hazoto amy raha jiaby ataontsika. 3 Vavaka ndreky fiangavian̈a karaha zen̈y tsara sady mamparavoravo Zan̈ahary Mpan̈avotro atsika. 4 Tiany bakà izikoa karazan̈an’olo jiaby ho avotro ndreky hahay tsarabe ny marin̈y. 5 Fôtony bakà, araiky fo Zan̈ahary, aviô araiky fo mpan̈elan̈elan̈a izy amin’olombelon̈o. Kristy Jesosy mpan̈elan̈elan̈a io. 6 Izy nan̈amia vidim-pan̈avaotan̈a* misy han̈avaotan̈a olo jiaby. Zen̈y raha handeha hitorian̈a izikoa fa avy fotoan̈a voatôndro. 7 Han̈ambara momba raha zen̈y nahavy Zan̈ahary nifidy zaho hanjary mpitory ndreky apôstôly, amy zen̈y zaho hampianatra irô hafa firenena aby io baka irô hino Zan̈ahary ndreky hahay ny marin̈y. Marin̈y raha volan̈iko zen̈y fa tsy vandy.
8 Ke ndray aia ndray aia tany ivorianarô, tiako izikoa irô lelahy tsy mivadiky aby io fo mivavaka;* fa izy fo, tsy tôkony an̈atin’irô mbala meloko na tsy fankahazo amin’olo irô man̈ano zen̈y. 9 Aviô koa, man̈angy tôkony hisikiny lamba mihaja sady mifan̈entan̈a amin’olo manompo Zan̈ahary. Tôkony haboakandrô fo fa irô mahay mandiniky,* ke sanjindrô tsy tôkony han̈elingelin̈y eritreritrin’olo. Irô tsy tôkony hisanjy mare loatra, ke sady han̈ano taly miavaka mare ndreky hisikiny ravaka volamena na perla aviô hisikiny lamba lafo mare. 10 Ia, tôkony haboakandrô amy sanjindrô fa irô mpanompon’ny Zan̈ahary. Tsy ino sanjindrô io fa asa tsara ataondrô.
11 Man̈angy tôkony hangin̈y* ndreky hanetry ten̈a izikoa fa ampianarin̈y.* 12 Zaho tsy man̈aomba man̈angy hampianatra an̈ivon’ny fiangonan̈a na hanan̈a fahifan̈a amy lelahy. Izy tôkony hangin̈y. 13 Fôtony, Adama niasain’ny Zan̈ahary voanalohany, zay vo Eva. 14 Aviô i Adama tsy voafitaka fa i Eva ny voafitaka tanteraka ke izy nandika lalàn̈an’ny Zan̈ahary. 15 Kanefa, irô man̈angy aby io ho voaro lera irô manan-janaka, fa irô fo mila mifen̈y hanan̈a finoan̈a ndreky fitiavan̈a aviô ho masin̈y ndreky hahay handiniky.