Taratasy Handeha Amindrô Romanin̈y aby Io
14 Raisa tsara olo malemy finoan̈a, aviô aza mitsaratsara olo tsy mitovy hevitry aminao.* 2 Olo araiky fatatra finoan̈a mihinan̈a raha jiaby, fa olo malemy finoan̈a ndraiky legimo* fo raha hoaniny. 3 Zay olo mihinan̈a tsy tôkony han̈ambany olo tsy mihinan̈a, baka iô zay olo tsy mihinan̈a tsy tôkony hitsara olo mihinan̈a, fôtony izy efa niraisin’ny Zan̈ahary. 4 Azôvy ma anao ke handeha hitsara mpanompon’olo hafa? Tômponany zaraiky fo afaka mitsara izikoa mety na tsy mety raha ataony.* Hahômby izy, fôtony Jehovah man̈ampy izy.*
5 Misy olo mihevitry fa misy andra araiky miavaka amin’ny andra hafa, fa olo sasany ndraiky mihevitry fa mitovy aby andra jiaby io. Kila olo tôkony ho resy lahatra tanteraka amy raha iritriretiny.* 6 Lan̈iany olo mitandrin̈y andra araiky, mitandrin̈y raha zen̈y han̈amezan̈a voninahitry Jehovah. Lan̈iany olo mihinan̈a, izy mihinan̈a han̈amezan̈a voninahitry Jehovah, fôtony izy man̈ano mersy Zan̈ahary; aviô lan̈iany olo tsy mihinan̈a, mbala han̈amezan̈a voninahitry Jehovah fo koa antony mahavy izy tsy mihinan̈a, kanefa izy koa mba man̈ano mersy Zan̈ahary. 7 Tsisy amintsika io baka velon̈o nin’ny ain̈inany tômpiny fo, baka iô tsisy amintsika io maty nin’ny ain̈inany tômpiny fo. 8 Fôtony izikoa atsika velon̈o, atsika velon̈o nin’i Jehovah, aviô izikoa atsika maty, atsika maty nin’i Jehovah. Ke ndray velon̈o atsika ndray maty, atsika nin’i Jehovah. 9 Ty baka antony nahavy Kristy naty aviô velon̈o ndraiky: Amy zen̈y izy hanjary Tômpon’olo* maty ndreky olo velon̈o.
10 Kanefa nan̈ino ma anao mitsara rahalahinao? Na, nan̈ino ma anao man̈ambany rahalahinao? Samby mbala hitsangana man̈oloan̈a Zan̈ahary aby baka atsika jiaby io, ke izy hitsara atsika jiaby.* 11 Fôtony ty raha voasoratra: “‘Izikoa zaho mbala velon̈o’, ho Jehovah, ‘olo* jiaby handohaliky man̈oloan̈a zaho, aviô irô* jiaby han̈eky fa zaho Zan̈ahary.’” 12 Ke atsika tsiaraikiaraiky samby mbala hitsarain’ny Zan̈ahary eraka raha nataontsika.
13 Ke atsika tsy tôkony hifampitsara eky, fa atsika tôkony ho tapa-kevitry tsy han̈apetraka vato mampavoatsikon̈o na raha hafa manakantsakana man̈oloan̈a rahalahy araiky. 14 Nohon’ny zaho mpan̈ara-dia Jesosy Tômpo, zaho mahay sady resy lahatra tsarabe fa tsisy raha malotoloto hoazy zen̈y. Lera olo araiky mieritreritry fa raha araiky maloto, amin’in̈y raha io maloto aminany. 15 Izikoa baka amin’ny hanin̈y hoaninao mampameloko rahalahinao, efa tsisy fitiavan̈a eky raha ataonao. Finoan̈anany aza robatin̈y* amin’ny hanin̈y hoaninao, fôtony Kristy efa naty han̈avaotan̈a izy. 16 Aza atao raha hahavy* olo hanan̈a antony han̈aratsian̈a raha tsara ataonarô. 17 Fidiran̈a amy Fanjakan̈an’ny Zan̈ahary baka tsy miankiny amy fihinanan̈a na figiahan̈a, fa miankiny amy fahamarin̈ana ndreky fihavanan̈a baka iô haravoan̈a baka amy fan̈ahy masin̈y. 18 Zay olo manompo Kristy salakady manan̈a irô toetry aby io, izy ankasitrahan’ny Zan̈ahary salakady ankasitrahan’olo.
19 Ke alô atsika samby hifen̈y han̈ano raha hampisy fihavanan̈a ndreky hifampahery. 20 Aza ravan̈iny amy raha momba hanin̈y eky asan’ny Zan̈ahary. Marin̈y ndraiky fa raha jiaby madio, kanefa tsy mety* raha ataon’olo araiky izikoa izy mihinan̈a kanefa raha zen̈y mahavy olo hafa halemy finoan̈a.* 21 Sitrany tsy mihina hena na migiaka divain na man̈ano raha hafa, izikoa raha zen̈y mampalemy finoan̈an’ny* rahalahinao. 22 Ke raha inoanao io, izio tanà ninao ndreky nin’ny Zan̈ahary. Sambatra zay olo tsy man̈amelo-ten̈a amy raha ataony. 23 Fa izikoa ndraiky izy misalasala, kanefa izy mbala mihina fo, izy efa voaheloko edy, fôtony tsy baka amy finoan̈a an̈anaovany raha zen̈y. Ia, fahotan̈a aby zay raha jiaby atao tsy amy finoan̈a.