Taratasy voanalohany handeha amy Timoty
3 Marin̈y raha volan̈iko aminarô ty: Izikoa lelahy araiky mifen̈y hanjary mpiandraikitry, izy man̈iry asa tsara. 2 Mpiandraikitry zen̈y tôkony tsy hisy tsin̈y amy zen̈y tsisy raha hivolan̈ana izy, hahay hipezipezy raha ataony, handiniky tsarabe, tia raha milamin̈y, tia mandray vahiny, mahay mampianatra, baka iô tôkony viavy araiky fo vadiny. 3 Izy tsy tôkony mamolava, kafiry, tia vola, ndreky mitady ady amin’olo,* fa izy tôkony handefitry.* 4 Tôkony ho hainy koa mitondra fianakavian̈anany, baka iô koa ry zanany tôkony han̈araka volan̈anany ndreky halala fomba 5 (izikoa bakà tsy hainy mitondra fianakavian̈anany, akôry hataony hikarakara fiangonan̈an’ny Zan̈ahary?). 6 Izy tsy tôkony ho olo vo vita batisa vo tsy ela,* tsao izy han̈ambony ten̈a kanefa raha zen̈y hahavy izy hahazo sazy mitovy amy nin’ny Devoly. 7 Baka iô koa, izy tôkony manan̈a laza tsara amin’olo ambelan̈a,* amy zen̈y izy tsy ho voabaraka ndreky tsy ho voafandrikin’ny Devoly.
8 Mpikarakara fiangonan̈a koa tôkony mato-tsain̈y, mety atokisan̈a amy raha volan̈iny,* mahay mipezipezy izikoa fa migiaka toaka.* Izy tsy tôkony tia vola ke han̈ano raha tsy marin̈y. 9 Izy tôkony manan̈a feon’ny fieritreretan̈a madio sady tsy tôkony miala amy raha jiaby nampianarin̈y atsika sady inoantsika, tsy ino zen̈y fa sekire masin̈y nabaribary tamintsika.
10 Aviô koa, izy mila zahan̈a toetry* antsendriky misy ahitan̈a izikoa fenony raha takian̈a amin’olo* man̈ano andraikitry io. Ke izikoa tsisy raha hivolan̈ana izy, izy hanjary mpikarakara fiangonan̈a.*
11 Karaha zen̈y koa fa viavy tsy mila man̈ano jerin’ny tsaiky,* tsy man̈odihody olo amy raha tsy nataondrô, aviô izy mila mahay mipezipezy raha ataony, ndreky atokisan̈a amy raha jiaby.
12 Tôkony viavy araiky fo vadin’ny mpikarakara fiangonan̈a, aviô tôkony hainy koa mitondra fianakavian̈anany, intsaka eky ry zanany. 13 Fôtony, izikoa olo* araiky man̈ano tsara fanompoan̈anany, izy hanan̈a laza tsara aviô izy hasaky hikoran̈a raha inoany momba Kristy Jesosy.
14 Soratiko aminao fo raha aby zen̈y, ndray zaho man̈anten̈a ho avy aminao an̈y tsy ho ela, 15 amy zen̈y, ndray zaho somary taratara, ho hainao akôry tôkony hitondrasanao ain̈inao an̈atin’ny fianakavian̈an’ny Zan̈ahary, tsy ino zen̈y fa fiangonan̈an’ny Zan̈ahary velon̈o. Fiangonan̈a io miaro* fahamarin̈ana. 16 Ia, ten̈a raha maventy ankitin̈y sekire masin̈y momba tsy fivadihan̈a amy* Zan̈ahary ty: ‘Jesosy nanjary olombelon̈o,* baka iô izy nimpody nanjary fan̈ahy ndraiky izikoa fa nambaran’ny Zan̈ahary fa marin̈y, aviô izy niboaka tamin’ny anjely, nitorian̈a tamin’ny hafa firenena, ninoan’olo amy donia ty, baka iô namezan’ny Zan̈ahary voninahitry an-dan̈itry an̈y.’