Vaovao Tsara Nisoratin’i Matio
15 Ke nisy Fariseo ndreky mpanoratra lalàn̈a baka ta Jerosalema nan̈aton̈o Jesosy. Karaha ty ho irô taminany: 2 “Nan̈ino ma mpianatranao aby io tsy man̈araka fomban-drazan̈a, karaha ataony manasa tan̈ana* izikoa fa hihina?”
3 Fa ho Jesosy tamindrô: “Anarô ke, nan̈ino ma fomban-drazan̈anarô fo arehanarô fa didin’ny Zan̈ahary ndraiky dikavinarô? 4 Ohatra iziô, Zan̈ahary efa nivolan̈a: ‘Hajà babanao ndreky reninao’, aviô: ‘Tsy maintsy vonen̈a lan̈iany olo manihitihy* babany na reniny.’ 5 Fa anarô ndraiky mivolan̈a: ‘Izikoa misy olo mivolan̈a amy babany na amy reniny: “Raha jiaby anan̈ako ke mety hampiasaiko han̈ampian̈a anao efa nataokako nin’ny Zan̈ahary”,* 6 izy efa tsy mila man̈ampy* iry olobeny eky.’ Tsy nasianarô fôtiny foeky volan̈an’ny Zan̈ahary, fôtony fomban-drazan̈anarô ny raha ten̈a maventy aminarô. 7 Mpihatsaravelatsihy aby ty! Marin̈y ankitin̈y faminanian̈a nambaran’i Isaia momba anarô ty: 8 ‘An̈arany fo* irô olo aby ty man̈aja zaho, kanefa fôndrô lavitry zaho mare. 9 Tsisy varany irô manohy manompo zaho, fôtony didy baka amin’olombelon̈o fo raha ampianarindrô.’ ” 10 Baka iô nikahiany han̈aton̈o izy tiô vahoaka aby io, aviô ho izy: “Tandrin̈esa, ke ataova raha hahaizanarô dikan’ny raha volan̈iko ty: 11 Tsy raha miditry amy vavanany mahavy olo araiky haloto, fa raha miboaka baka amy vavanany.”*
12 Mpianatranany aby io nan̈aton̈o izy, ke ho irô taminany: “Hainao ma fa neloko mare irô Fariseo aby io koa fa naharen̈y raha nivolan̈inao tiô in̈y?” 13 Ho izy tamindrô: “Himbotan̈a zay raha maniry tsy natsabon’ny Babako.* 14 Ambilà an̈y irô. Irô io mpitariky, kanefa gila. Ke izikoa olo gila mitariky olo gila, irô roe samby ho latsaka an̈atin’ny lavaka.” 15 Ho Petera taminany: “Mba hazavà aminay kony fan̈oharan̈a tiô in̈y.” 16 Ke ho Jesosy: “Mbala tsy mazava aminarô fo koa ma zin̈y? 17 Tsy hainarô ma fa raha jiaby miditry amy vava mandalo an̈atin’ny kibo, baka iô aboaka amy tany fangirian̈a* an̈y? 18 Kanefa, baka an̈atin’ny fô aby raha aboakan’ny vava, ke zen̈y ny raha mandoto olo. 19 Ohatra iziô, baka an̈atin’ny fô iboahan’ny jery tsy manjary ke mahavy olo: Mamono olo, mandiadia vady, mijangajanga,* mangalatra, mitsangana ho vavolombelon̈o mavandy, baka iô tsy man̈isy fôtiny raha masin̈y. 20 Raha aby zen̈y ny raha mandoto olo, fa tsy fihinanan̈a amy tan̈ana tsy avoasasa.”*
21 Jesosy baka tiô niala tiô, ke izy nandeha tamy faritry Tyro ndreky Sidona. 22 Nisy man̈angy fenisianin̈y araiky baka tamy faritry io nan̈aton̈o izy sady niafatrafatra mare, niangavy izy karaha ty: “Mamindrà fô aminaka, Tômpo Zanakan’i Davida e! Mijaly mare zanako man̈angy fôtony misy demony.” 23 Kanefa tsy nitohizan’i Jesosy foeky koran̈any man̈angy io. Nan̈aton̈o izy mpianatranany aby io, ke ho irô taminany: “Man̈angy io kony tsy vôly miafatrafatra afarantsika ao ay! Iraha mandeha an̈y izy!” 24 Karaha ty ho Jesosy tamy man̈angy io: “Handeha amin’ny ôndrikôndriky very amy taranakan’ny* Israely fo nan̈irahan̈a zaho, fa tsy handeha amin’olo hafa.” 25 Fa man̈angy io navy, ke nankôhoko nan̈oloan̈a izy sady nivolan̈a: “Mba ampia kony zaho, Tômpo ô!” 26 Ho Jesosy taminany: “Tsy mety izikoa môfon’ny tsaiky alain̈a, aviô atsipy amy zanak’amboa.” 27 Fa ho man̈angy io: “Marin̈y zen̈y, Tômpo! Fa ndray zanak’amboa koa mba mihinan̈a potipotikin’ny môfo latsaka baka amy latabatran’ny tômpiny.” 28 Ke ho Jesosy taminany: “Ten̈a be ankitin̈y finoan̈anao! Irarian̈a ho tanteraka aminao raha nangatahanao!” Ke niaraka tamy zen̈y, janga zanakan’ny man̈angy io.
29 Tafaran’izen̈y, Jesosy niala tiô. Izy koa fa navy marikitry Ranomasin̈in’ny Galilia, izy nanonga tamy bongo, baka iô izy nangala fipitrahan̈a. 30 Nisy vahoaka marobe nan̈aton̈o izy sady nitondra olo nalemy vity, nisy antsa, gila, moa, aviô olo maro nanan̈a aretin̈y hafa koa. Napetrakandrô talohan’i* Jesosy tiô irô olo narary aby io, ke Jesosy nampahivan̈a irô. 31 Olo jiaby tiô lany fan̈ahy izikoa fa nahita olo moa nahavita nivolan̈a, olo nisy antsa janga, olo nalemy vity nahavita nandeha, baka iô olo gila nahita. Ke irô nan̈amia voninahitry Zan̈aharin’ny Israely.
32 Ke nikahian’i Jesosy nan̈aton̈o izy irô mpianatranany aby io, ke ho izy tamindrô: “Mampahinakinaka zaho zalahy irô olo aby ty ay! Efa telo andra baka irô zay nidôko taminaka teto, sady efa tsisy hanin̈y eky amindrô ao. Tsy mety amy jerinaka foeky han̈iraka irô handeha kanefa irô silaon̈o,* tsao fo irô ho fanin̈y* amy lalan̈a an̈y.” 33 Fa ho irô mpianatranany aby io taminany: “Atsika ty kony amy tany mitaokan̈a ay! Ke aia tany hahitantsika môfo hahavoky olo marobe aby ty?” 34 Ho Jesosy tamindrô: “Firy ma môfo aminarô ao?” Ho irô: “Fito izy ato, aviô misy laoko madiniky vitsivitsy.” 35 Jesosy koa fa baka nan̈iraka irô olo aby io nipetraka tamy tany, 36 nalainy môfo fito ndreky laoko aby in̈y. Izy koa fa baka nivavaka,* nitapahany irô môfo aby io, baka iô nirasainy tamy mpianatranany, ke irô amizay nandrasa raha aby io tamin’olo jiaby. 37 Nihina aby olo jiaby, ke voky. Izikoa fa navory lambilambin’ny hanin̈y tavela, irô io nahafeno antômby fito maro maventy.* 38 Izikoa atao kônty, 4 000 lelahy nihinan̈a, ankoatran’ny man̈angy ndreky tsaiky. 39 Farany, niravan̈in’i Jesosy amizay olo marobe in̈y, aviô izy niondran̈a sambo, ke nandeha tamy faritry Magadana.