Taratasy handeha amindrô Kôlôsianin̈y aby io
4 Anarô tômpo,* ataova ara-drariny ndreky mahitsy fomba hitondrasanarô mpanomponarô,* fôtony hainarô fa anarô koa mba manan̈a Tômpo an-dan̈itry an̈y.
2 Aza vôly mivavaka. Aza adin̈a foeky mivavaka ndreky man̈ano mersy Zan̈ahary. 3 Mivavaha koa ninay, baka Zan̈ahary han̈ampy zahay hahita fomba han̈ambaran̈a volan̈anany, amy zen̈y zahay hahavita han̈ambara sekire masin̈y momba Kristy. Baka amy zio mahavy zaho migadra. 4 Mivavaha koa amy zen̈y zaho hahavita han̈azava zio tsarabe, erakan’ny tôkony hataoko.
5 Lera anarô mifandray amin’olo ambelan̈a,* aboaha fa anarô misy jery, aviô ampiasà tsara fotoan̈anarô.* 6 Ataova mamparavoravo fo volan̈anarô, karaha ataon’ny hanin̈y ampy sira in̈y, amy zen̈y ho hainarô raha tôkony hivolan̈inarô amin’olo tsiaraikiaraiky.
7 Tykiko, rahalahiko tiako ndreky mpanompo tsy mivadiky salakady mpanompon’ny Tômpo karaha atsika, han̈ambara aminarô vaovao jiaby momba zaho. 8 Alefako aminarô an̈y izy, misy ahaizanarô akôry naninay, amy zen̈y koa izy hankahery anarô.* 9 Dia araiky aminany i Onesimosy, rahalahiko tiako sady tsy mivadiky, araiky baka aminarô an̈y in̈y; hitantaraindrô aminarô raha jiaby mandalo atỳ.
10 Sambitsara zen̈y anarô ho Aristarko, namako migadra ato, ndreky ho Marka, havan’i Barnabasy.* Marka bakà araiky nirahan̈a niraisinarô tsarabe izikoa izy avy aminarô an̈y in̈y. 11 Sambitsara zen̈y koa ho Jesosy, araiky kahian̈a Josto. Voavositry aby irô io. Irô zaraiky fo niaraka niasa taminaka nitory momba Fanjakan̈an’ny Zan̈ahary. Irô io ten̈a nan̈ampy ndreky nankahery zaho mare. 12 Sambitsara zen̈y koa anarô ho Epafra, araiky baka aminarô an̈y in̈y. Izy mpanompon’i Kristy Jesosy. Izy tsy vôly mivavaka mare ninarô, amy zen̈y anarô ho matotro fo ndreky hatoky tsarabe fa tsisy tsy ho tanteraka sitrapôn’ny Zan̈ahary. 13 Zaho masaky mivolan̈a aminarô fa mifen̈y mare izy mitady raha mahatsara anarô, ndreky mahatsara irô a Laodikia aviô irô a Hierapôlisy an̈y.
14 Sambitsara zen̈y anarô ho Lioka, dôkotera tiantsika in̈y, ndreky ho Demasy. 15 Sambitsara amindrô rahalahy aby a Laodikia an̈y, ndreky amy ranabavy Nymfa aviô amy fiangonan̈a mivory an-tran̈onany ao. 16 Taratasy ty koa fa baka nivakian̈a taminarô tan̈y, vakia amindrô amy fiangonan̈a a Laodikia an̈y koa izy ty, aviô araiky nalefako ta Laodikia koa mila vakian̈a aminarô ao. 17 Baka iô karaha ty volàn̈a amin’i Arkipo: “Mifen̈a mare han̈ano fanompoan̈a nankin̈in’ny Tômpo taminao, amy zen̈y zio ho vitanao tsarabe.”
18 Zaho Paoly mandefa sambitsara nisoratin’ny tan̈ananaka ty aminarô. Aza adin̈anarô fa zaho migadra.* Irarian̈a Zan̈ahary han̈aboaka hatsaram-pan̈ahy miavaka aminarô.