Taratasy Handeha Amindrô Romanin̈y aby Io

4 Izikoa zen̈y, ino basy raha mety koran̈intsika momba Abrahama, dadilahibentsika erakan’ny nôfotro? Ino raha nazony? 2 Izikoa Abrahama nambara fa olo marin̈y baka tamy raha nataony, nanan̈a antony nireharehan̈a edy izy, fa izy fo tsy afaka nirehareha man̈oloan̈a Zan̈ahary. 3 Fa ino ma raha volan̈in’ny Soratra Masin̈y? “Abrahama nan̈aboaka fa izy nino Jehovah, ke izy nikonten̈a* ho olo marin̈y.” 4 Lelahy araiky koa fa miasa, karama amezan̈a izy tsy konten̈a ho hatsaram-pan̈ahy miavaka, fa raha* tsy maintsy ifain̈a aminany. 5 Fa izikoa misy lelahy araiky tsy miasa kanefa izy mino Zan̈ahary araiky man̈ambara fa marin̈y olo mpanota,* izy konten̈a ho olo marin̈y fôtony izy manan̈a finoan̈a. 6 Karaha ty koa raha nambaran’i Davida tamin’izy nivolan̈a fa sambatra olo konten’ny Zan̈ahary ho olo marin̈y, ndray tsy baka amy raha ataony mahavy zen̈y: 7 “Sambatra lan̈iany olo voavela heloko ndreky voavela* fahotan̈a. 8 Sambatra zay olo tsy konten’i Jehovah foeky fahotan̈anany.”

9 Izio ma olo voavositry fo mety ho sambatra karaha zen̈y, va olo tsy voavositry koa? Karaha ty baka ho atsika: “Abrahama nikonten̈a* ho olo marin̈y fôtony izy nanan̈a finoan̈a.” 10 Ke tamy lera karakôry ma izy nikonten̈a ho olo marin̈y? Tamin’izy efa voavositry sa tamin’izy mbala tsy voavositry? Tsy tamin’izy efa voavositry, fa tamin’izy mbala tsy voavositry. 11 Izy nahazo famantaran̈a, tsy ino zen̈y fa famosiran̈a. Io antoko* fa izy olo marin̈y fôtony izy nanan̈a finoan̈a ndray izy mbala tsy voavositry, baka izy hanjary baban’olo jiaby manan̈a finoan̈a kanefa tsy voavositry, amy zen̈y irô hikonten’ny* Zan̈ahary ho olo marin̈y. 12 Zen̈y koa nahavy izy hanjary baban’ny taranaka voavositry, aviô izy tsy basin’ny baban’olo voavositry fo fa nin’olo manan̈a finoan̈a karaha ninany koa. Abrahama babantsika baka efa nanan̈a finoan̈a ndray tamin’izy mbala tsy voavositry.

13 Fôtony tsy baka tamy fan̈arahan̈a lalàn̈a nahavy Abrahama na taranakanany nahazo fampan̈antinan̈a fa izy handova donia araiky, fa baka tamin’izy nikonten̈a ho olo marin̈y fôtony izy nanan̈a finoan̈a. 14 Fa izikoa irô olo aby man̈araka lalàn̈a io mpandova, tsisy raha ilàn̈a finoan̈a aviô foan̈a fampan̈antinan̈a. 15 Ny marin̈y aminany, baka amy Lalàn̈a hiboahan’ny helokon’ny Zan̈ahary, fôtony izikoa tsisy lalàn̈a, tsisy fandikan-dalàn̈a.

16 Zen̈y nahavy atsika nahazo fampan̈antinan̈a io fôtony atsika manan̈a finoan̈a. Izio mifan̈araka amin’ny hatsaram-pan̈ahy miavakan’ny Zan̈ahary, baka taranakan’i Abrahama jiaby hahazo izio, tsy irô man̈araka Lalàn̈a fo fa irô manan̈a finoan̈a karaha nin’i Abrahama babantsika jiaby koa. 17 (Ty baka raha efa voasoratra: “Zaho nanendry anao hanjary baban’ny firenena maro.”) Natao man̈oloan̈a Zan̈ahary, araiky ninoany in̈y raha zen̈y, tsy azôvy zen̈y fa araiky mamelon̈o olo maty ndreky mivolan̈a raha mbala tsisy karaha raha efa misy in̈y.* 18 Abrahama natoky tsarabe fa izy hanjary baban’ny firenena maro natà raha zen̈y karaha raha tsy pôsibla in̈y. Izy baka natoky raha nambara izy ty: “Ho maro karaha zen̈y taranakanao.” 19 Hainy tsarabe fa ain̈inany efa mira maty (fôtony izy efa kadiriny 100 taon̈o), aviô Saraha tsy afaka niteraka.* Ndray izy man̈ano zen̈y, finoan̈anany tsy nihen̈y. 20 Fa baka tamy fampan̈antinan̈an’ny Zan̈ahary nahavy Abrahama nino ke tsy nisalasala foeky. Ia, nanjary nahazo angôvo izy baka tamy finoan̈anany, ke nan̈amia voninahitry Zan̈ahary. 21 Aviô izy natoky amy fô jiaby fa vitan’ny Zan̈ahary man̈atanteraka zay raha nampan̈antin̈ainy. 22 Ke zen̈y nahavy “izy nikonten̈a* ho olo marin̈y.”

23 Kanefa, tsy ninany fo nanoratan̈a volan̈a “izy nikonten̈a* ho olo marin̈y” in̈y, 24 fa nintsika koa. Atsika koa hikonten̈a* ho olo marin̈y, fôtony atsika mino Araiky nanangana Jesosy Tômpontsika tamy maty in̈y. 25 Zan̈ahary nan̈ambela Jesosy hivonen̈a nohon’ny fahotan̈antsika, baka iô izy natsangana tamy maty baka atsika hambara fa olo marin̈y.