Taratasy voanalohany handeha amindrô Tesalônianin̈y aby io

1 Baka amy Paoly ndreky Sylvano* aviô Timoty, handeha amy fiangonan̈an’ny Zan̈ahary Babantsika ndreky Jesosy Kristy Tômpo, a Tesalôniky an̈y:

Irarian̈a anarô han̈aboahan̈a hatsaram-pan̈ahy miavaka* ndreky hahazo fiadanan̈a.

2 Zahay tsiary tsy man̈ano mersy Zan̈ahary isaka zahay mivavaka momba anarô. 3 Tsy adin̈anay foeky, man̈oloan̈a Zan̈ahary Babantsika, raha nataonarô fôtony anarô mino Zan̈ahary ndreky tia izy; tsy adin̈anay foeky koa fa anarô mifen̈y miaritry fôtony anarô man̈anten̈a Jesosy Kristy Tômpontsika. 4 Rahalahy aby, Zan̈ahary ten̈a tia anarô, aviô hainay fa izy nifidy anarô, 5 fôtony vaovao tsara nitorianay taminarô in̈y tsy raha volan̈a karakaraha io fo fa hafatra ten̈a matomboko. Fan̈ahy masin̈y bakà nan̈ampy zahay nitory taminarô, baka iô zahay lastiô resy lahatra fa marin̈y raha nitorianay. Ary hainarô tsarabe karakôry nataonay nitady raha mahatsara anarô. 6 Aviô anarô nangala tahaka zahay ndreky nangala tahaka Tômpo. Anarô bakà nan̈eky hafatra io ndray tiô fan̈injehan̈a, ke ravoravo fo anarô fôtony fan̈ahy masin̈y nan̈ampy anarô. 7 Ke anarô nanjary ohatra tsara amin’olo jiaby nino hafatra nitorianay io, tsy azôvy zen̈y fa irô a Makedonia ndreky a Akaia an̈y.

8 Ty bakà raha misy: Volan̈an’i Jehovah tsy vitany ren̈in’olo jiaby ta Makedonia ndreky ta Akaia fo fa, ren̈in’olo amy tany jiaby koa fa anarô mino Zan̈ahary, ke efa tsisy raha mila volan̈inay eky. 9 Irô foeky bakà tsy vôly mikoran̈a fomba nifankahitantsika voanalohany. Baka iô koa irô man̈ambara fa anarô vôly nanompo sampy ke nanjary nanompo* Zan̈ahary velon̈o sady ten̈a izy, 10 ndreky miambin̈y Zanany hijotso baka an-dan̈itry, tsy azôvy zen̈y fa Jesosy araiky natsangany tamy maty in̈y. Izy han̈avotro atsika lera Zan̈ahary han̈ampatra helokonany.