Taratasy Handeha Amindrô Galatianin̈y aby Io
1 Baka amy Paoly, apôstôly tsy nitindren’olo na nirahan̈a nitindren’olo, fa nitindren’i Jesosy Kristy ndreky Zan̈ahary Baba, araiky nanangana izy tamy maty, 2 ndreky baka amy rahalahy jiaby miaraka aminaka, handeha amindrô fiangonan̈a aby a Galatia an̈y:
3 Irarian̈a Zan̈ahary Babantsika ndreky Jesosy Kristy Tômpo han̈aboaka hatsaram-pan̈ahy miavaka* aminarô ndreky han̈amia anarô fiadanan̈a. 4 Izy nahafoe ain̈inany han̈adosoan̈a fahotan̈antsika, amy zen̈y izy han̈avotro atsika amy donia tsy manjary ty,* fôtony zen̈y sitrapôn’ny Zan̈ahary Babantsika, 5 araiky amezan̈a voninahitry mandrakizay mandrakizay! Ameny.
6 Gaga zaho fa betibetiky fo efa nialanarô edy* Araiky* nikaiky anarô baka tamin’ny hatsaram-pan̈ahy miavaka naboakan’i Kristy, ke anarô nanomboko nitandren̈y vaovao tsara hafa. 7 Zen̈y ndraiky tsy mivolan̈a fa misy vaovao tsara hafa, fa misy olo mampialamboetry anarô sady tihan̈aova vaovao tsara momba Kristy io. 8 Kanefa, izikoa misy araiky aminay na anjely araiky baka an-dan̈itry an̈y man̈ambara vaovao tsara aminarô ankoatran’ny vaovao tsara efa nambaranay taminarô in̈y, anò izy ho voaozon̈o. 9 Eraka raha efa nivolan̈inay tiô in̈y, ary mbala ampodiko ndraiky koa: Lan̈iany olo man̈ambara vaovao tsara aminarô ankoatran’ny araiky efa nikenarô in̈y, anò izy ho voaozon̈o.
10 Izio ma zaho mitady rady amin’olo sa amy Zan̈ahary? Sa zaho tihamparavoravo olo? Izikoa bakà zaho mbala tihamparavoravo olo, zaho tsy mpanompon’i Kristy. 11 Tiako ho hainarô, rahalahy aby, fa vaovao tsara nambarako taminarô in̈y tsy baka amin’olombelon̈o; 12 izio bakà tsy nazoko baka tamin’olo sady tsy nampianarin̈y zaho, fa Jesosy Kristy nan̈abaribary izio taminaka.
13 Hay be fa efa ren̈inarô raha nataoko tamy zaho nan̈araka Fivavahan̈a Jiosy.* Naresaka* fan̈injehako fiangonan̈an’ny Zan̈ahary baka izio ho ravan̈a. 14 Zaho faran-draha nafana fô eky tamy fan̈arehan̈a Fivavahan̈a Jiosy, mandilatra tanora maro nitovy taon̈o taminaka sady firenena araiky taminaka aby io. Ia, zaho faran-draha nafana fô eky tamy fan̈arehan̈a fomban-drazan̈andrô razambeko* aby io. 15 Fa Zan̈ahary, araiky nahavy zaho teraka* sady nikaiky zaho baka tamin’ny hatsaram-pan̈ahinany miavaka io, koa fa nahita fa mety 16 hampiasan̈a zaho han̈ambara vaovao tsara momba Zanany amindrô hafa firenena aby io, misy hahaizandrô izy, zaho tsy direkty nangataka hevitry tamin’olo.* 17 Aviô koa, zaho tsy nandeha ta Jerosalema tamindrô apôstôly talohanaka aby io, fa zaho nandeha ta Arabia, baka iô zaho nimpody ta Damaskosy.
18 Efa telo taon̈o tafara tatỳ zaho vo nanonga ta Jerosalema handeha hamangy Kefasy,* aviô zaho nidôko 15 andra taminany tan̈y. 19 Fa zaho tsy nahita apôstôly hafa, izikoa tsy Jakoba rahalahin’ny Tômpo fo. 20 Zaho man̈amia toky anarô man̈oloan̈a Zan̈ahary fa tsisy vandy raha soratiko aminarô aby io.
21 Tafaran’izen̈y amy zay zaho nandeha tamy faritrin’i Syria ndreky Kilikia. 22 Kanefa irô fiangonan̈an’i Kristy a Jodia an̈y mbala tsiary nahita zaho mivantan̈a foeky. 23 Ty fo raha ren̈indrô: “Lelahy nan̈enjiky atsika in̈y kony ziô man̈ambara vaovao tsara momba finoan̈a tiany hiravan̈iny taloha in̈y ay!” 24 Ke irô nan̈amia voninahitry Zan̈ahary baka tamy raha nandalo taminaka zen̈y.