Taratasy handeha amindrô Hebreo aby io
2 Zen̈y mahavy atsika mila mitandrin̈y fo, mihoatran’ny mahazatra, baka atsika han̈araka raha efa ren̈intsika, amy zen̈y atsika tsy hiala amy raha inoantsika foeky. 2 Fôtony bakà, izikoa volan̈a nambarandrô anjely aby io atokisan̈a, aviô olo nandika lalàn̈a ndreky tsy nan̈araka volan̈a nahazo sazy fanaoko izy, 3 akôry tsy hampavoasazy atsika izikoa atsika tsy mijery famonjian̈a maventy be amy ziôty io? Tômpontsika bakà voanalohany nivolan̈a momba famonjian̈a maventy be io, ary irô olo naharen̈y izy nikoran̈a momba izio koa nan̈amia toky atsika fa marin̈y raha zen̈y. 4 Ndray Zan̈ahary koa mba nan̈aboaka fa marin̈y raha volan̈indrô zen̈y, ke izy nan̈ambela irô han̈ano famantaran̈a ndreky fahagagan̈a aviô raha maro miavaka isan-karazany, baka iô irô namezany fan̈ahy masin̈y fôtony zen̈y sitrapônany.
5 Momba donia* ho avy koran̈inay io, irô anjely aby io tsy namezan’ny Zan̈ahary fahifan̈a hanjaka amy zio. 6 Fa nisy vavolombelon̈o zay nanoratra karaha ty: “Ino ma olombelon̈o zen̈y ke alainao onon̈o, aviô ino ma zanak’olombelon̈o zen̈y ke karakarainao? 7 Izy nataonao ambanimbany helindrô anjely aby io. Izy nataonao Mpanjaka sady namezanao haja ndreky voninahitry, baka iô nifidinao hiandraikitry raha jiaby niasainao. 8 Nataonao ambany fahifan̈anany* aby raha jiaby.” Ke izikoa fa nataon’ny Zan̈ahary ambany fahifan̈an’i Jesosy aby raha jiaby, tsisy raha nambelan’ny Zan̈ahary tsy han̈eky izy. Fa ndray atsika ziô mbala tsendriky mahita fa raha jiaby man̈eky* Jesosy, 9 atsika ndraiky mahita fa izy efa namezan̈a voninahitry ndreky haja. Izy nahazo irô raha aby io, ndray izy natao ambanimbany helindrô anjely aby io, fôtony izy efa nijaly mare ndreky naty. Zan̈ahary nan̈aboaka hatsaram-pan̈ahy miavaka tamin’olombelon̈o, ke izy nambelany naty misy han̈avaotan̈a irô.
10 Nin’ny Zan̈ahary aby raha jiaby, aviô baka aminany nampisy irô io. Izy tihan̈amia voninahitry zanakanany marobe, ke hitany fa pare tsarabe izikoa Mpitariky Farany Maventy io ambelany hijaly, amy zen̈y izio hahavita* han̈avotro irô. 11 Araiky fo baban’ny araiky mankamasin̈y ndreky nindrô ankamasin̈iny aby io, ke zen̈y mahavy izy tsy men̈atra foeky mikaiky irô io rahalahy. 12 Ke ho izy: “Handeha hambarako amindrô rahalahiko aby io an̈aran̈anao, baka iô an̈ivon’ny fiangonan̈a zaho hihira hiderako anao.” 13 Aviô ho izy: “Zaho hatoky izy.” Baka iô koa ho izy: “Indriô zaho ndreky irô tsaiky madiniky namezan’i Jehovah zaho aby io.”
14 Ke, fôtony irô tsaiky aby io nôfotro ndreky lio, nanjary nôfotro ndreky lio koa izy, amy zen̈y baka amy nifatesany hahavy araiky nampisy fahafatesan̈a io ho ripaka, tsy azôvy zen̈y fa Devoly. 15 Amy zen̈y koa izy hankafaka lan̈iany olo nandivôzin’ny favozoan̈a ho foaty. Ia, teky koa, irô efa nandivôzin’izio edy. 16 Ny marin̈y aminany bakà, taranakan’i Abrahama izy hampiany io fa tsy irô anjely aby io. 17 Ke izy tsy maintsy nanjary karaha irô rahalahiny aby io, tamy lafiny jiaby, baka izy hanjary mpisôron̈obe mamindra fô ndreky atokisan̈a amy fanompoan̈a Zan̈ahary, amy zen̈y izy han̈ano sôron̈o handrakaofan̈a fahotan̈antsika, ke hampihavan̈a atsika amy Zan̈ahary. 18 Ke, fôtony izy efa nijaly tamin’izy niaritry fitsapan̈a, vitany tsarabe man̈ampy lan̈iany olo miaritry fitsapan̈a.