Taratasy Handeha Amindrô Efesianin̈y aby Io

1 Baka amy Paoly, apôstôlin’i Kristy Jesosy nohon’ny sitrapôn’ny Zan̈ahary, handeha amindrô olo masin̈y tsy mivadiky salakady tafikamban̈a amy Kristy Jesosy, a Efesosy an̈y:

2 Irarian̈a Zan̈ahary Babantsika ndreky Jesosy Kristy Tômpo han̈aboaka hatsaram-pan̈ahy miavaka aminarô ndreky han̈amia anarô fiadanan̈a.

3 Derain̈a Zan̈ahary Baban’i Jesosy Kristy Tômpontsika, fôtony atsika amezany hatsaran̈a isan-karazany amy faritrin’ny lan̈itry an̈y nohon’ny atsika tafikamban̈a amy Kristy. 4 Izy nifidy atsika talohan’ny nan̈oren̈ana donia ty baka atsika ho tafikamban̈a amy Kristy, amy zen̈y atsika ho be fitiavan̈a ndreky masin̈y aviô tsisy tsin̈y man̈oloan̈a Zan̈ahary. 5 Izy bakà efa nifidy atsika tsialohaloha, amy zen̈y atsika hatsangany ho zanany baka amy Jesosy Kristy, eraka raha mamparavoravo izy ndreky sitrapônany, 6 amy zen̈y olo hidera izy fôtony izy be voninahitry ndreky nan̈aboaka hatsaram-pan̈ahy miavaka tamintsika, sady tsara fan̈ahy izy koa fa nampiasa Zanany tiany nan̈anaovan̈a zen̈y. 7 Baka tamy Zanany io nazahoantsika vidim-pan̈avaotan̈a ndreky nahavy atsika nanjary olo afaka. Ia, atsika nahazo familan-keloko amy fahotan̈antsika tamin’izy nandatsaka lionany. Be ankitin̈y bakà hatsaram-pan̈ahy miavaka aboakan’ny Zan̈ahary.

8 Ten̈a maro hatsaram-pan̈ahy miavaka naboakany tamintsika, aviô atsika namezany fahendrena ndreky fahaizan̈a misain̈y* jiaby, 9 tamin’izy nan̈ano raha hahaizantsika sekire masin̈y momba sitrapônany. Mamparavoravo izy raha zen̈y sady mifan̈araka amy raha iritriretiny hatao. 10 Tanjon̈onany bakà hanangana fomba fitantan̈ana raha* izikoa fa tapitry tanteraka fotoan̈a voatôndro, amy zen̈y havory amy Kristy ao aby raha jiaby, tsy ino zen̈y fa raha an-dan̈itry an̈y ndreky raha ambony tany atỳ. Ia, amy Kristy; 11 zahay tafikamban̈a aminany sady voafidy hanjary mpandova miaraka aminany. Zahay bakà efa nifidin̈a tsialohaloha eraka fikasan̈anany, fôtony izy man̈atanteraka raha jiaby eraka fanapahan-kevitrinany ndreky mifan̈araka amy sitrapônany. 12 Amy zen̈y zahay man̈amia voninahitry Zan̈ahary sady midera izy, fôtony zahay olo voanalohany nan̈anten̈a Kristy. 13 Kanefa anarô koa fa naharen̈y volan̈a momba fahamarin̈ana, tsy ino zen̈y fa vaovao tsara momba fan̈avaotan̈a anarô, anarô koa mba nan̈anten̈a izy. Ke anarô koa fa nino, anarô nasian̈a tombo-kase tamy fan̈ahy masin̈y nampan̈antinain̈a, ke Kristy nampiasainy han̈anaovan̈a zen̈y. 14 Fan̈ahy masin̈y io antoko tsialohaloha* mankamarin̈y fa ho azontsika lova io. Zan̈ahary nan̈ano zen̈y beky izy han̈efa vidim-pan̈avaotan̈a ke hankafaka vahoakanany, amy zen̈y izy hahazo dera ndreky voninahitry.

15 Ke nohon’ny raha zen̈y, rango narin̈esako fa anarô mino Jesosy Tômpo ndreky nahaizako fa anarô man̈aboaka fitiavan̈a amin’olo masin̈y jiaby, 16 zaho tsy vôly man̈ano mersy Zan̈ahary nohon’ny aminarô. Ary zaho mivavaka ninarô fo koa, 17 amy zen̈y Zan̈aharin’i Jesosy Kristy Tômpontsika, tsy azôvy zen̈y fa Baban’ny voninahitry, han̈amia anarô fan̈ahy masin̈y baka anarô hanan̈a fahendrena ndreky hahay dikan’ny raha abaribariny aminarô ke anarô hahay izy tsarabe. 18 Nibiafiny mason’ny fônarô, amy zen̈y ho hainarô fan̈antinan̈a namezany anarô tamin’izy nikaiky anarô; amy zen̈y koa ho hainarô fa be voninahitry harian̈a najarisin̈y hatao lovan’olo masin̈y. 19 Aviô faran-draha be eky angôvo namezany atsika io. Hita tsarabe fa be izio izikoa fa ampiasainy. 20 Angôvo io nananganany Kristy tamy maty ndreky nan̈apitrahany izy tankavanan̈anany amy faritrin’ny lan̈itry an̈y. 21 Izy nampanongainy ke nataony an̈abo lavitry mandilatra fanjakan̈a, fahifan̈a, angôvo, fitondrasan̈a, ndreky an̈aran̈a jiaby, ary tsy amy donia ty* fo fa amin’ny araiky ho avy koa. 22 Nataony ambany fahifan̈an’i* Kristy koa raha jiaby, aviô izy nataony lohany amy raha jiaby momba fiangonan̈a, 23 tsy ino zen̈y fa vatan̈anany. Feno raha jiaby momba izy bakà fiangonan̈a, ary izy mameno raha jiaby.