Taratasy voanalohany nisoratin’i Petera
4 Ke, fôtony Kristy nijaly tamin’izy olombelon̈o,* ataova koa raha hahavy anarô hanan̈a toe-tsain̈y karaha ninany.* Lan̈iany olo mijaly* bakà efa tsy manota eky, 2 amy zen̈y izy efa tsy han̈atanteraka fan̈irian̈an’olombelon̈o eky, izikoa izy mbala velon̈o, fa han̈ano sitrapôn’ny Zan̈ahary. 3 Efa ampy eky zay fotoan̈a nan̈anaovanarô sitrapôn’olo amy donia ty, tamin’ny anarô nitondra ten̈a karaha olo tsisy hen̈atra,* ndreky nan̈eram-pô nan̈atanteraka fan̈irian̈a han̈ano raha tsy manjary,* baka iô nan̈eram-pô tamy figiahan-toaka dila loatra, ndreky tamy fan̈anaovan̈a fety tsy voafehy,* ndreky tamin’ny anarô nan̈eram-pô nifan̈oesa nigiaka toaka, aviô nan̈eram-pô nanompo sampy.* 4 Irô lany fan̈ahy fôtony anarô efa* tsy man̈eram-pô man̈ano raha ratsy miaraka amindrô, karaha fataonarô taloha in̈y eky, ke anarô tihitihindrô. 5 Araiky vôn̈ono hitsara olo velon̈o ndreky olo maty handeha hitsara irô olo aby zen̈y arakaraka raha nataondrô. 6 Ny marin̈y aminany, zen̈y nahavy vaovao tsara io nambara tamin’olo maty koa, amy zen̈y ndray irô nitsarain̈a eraka fomba fihevitrin’olombelon̈o, irô ho velon̈o mifan̈araka amy fitaritan̈an’ny fan̈ahy masin̈in’ny Zan̈ahary.
7 Efa marikitry faran’ny raha jiaby, ke irarian̈a anarô hisain̈y tsarabe, ndreky tsy ho rikian̈a* amy zen̈y anarô tsy han̈adin̈a hivavaka. 8 An̈abony raha jiaby, anarô mifankatiava mare, fôtony fitiavan̈a io mandrakotro fahotan̈a maro. 9 Anarô mila samby tia mandray vahiny,* aviô anarô tsy mila min̈on̈on̈o izikoa fa man̈ano zen̈y. 10 Anarô io mpanompo atokisan̈a* sady an̈aboahan’ny Zan̈ahary hatsaram-pan̈ahy miavaka amy fomba isan-karazany. Ke ampiasay hifanompoan̈a kadô namezan̈a anarô zen̈y, arakarakan’ny nazonarô tsiaraikiaraiky. 11 Izikoa misy olo mivolan̈a, izy tôkony hivolan̈a karaha olo man̈ambara hafatra baka amy Zan̈ahary. Izikoa misy olo man̈ampy olo hafa,* izy tôkony hitavandra angôvo baka amy Zan̈ahary; amy zen̈y Zan̈ahary hahazo voninahitry amy raha jiaby, baka amy Jesosy Kristy. Ia, ninany voninahitry ndreky angôvo mandrakizay mandrakizay! Ameny.
12 Rahalahy ndreky ranabavy tiako aby, aza gaga anarô ndray maresaka mare karaha môtro mizelazela in̈y fitsapan̈a mahazo anarô, ke karaha misy raha hafahafa in̈y mavoa anarô. 13 Mitovy fo bakà antony nahavy Kristy nijaly ndreky antony mahavy anarô mijaly, ke anarô miravoravoa fo, amy zen̈y anarô ho ravoravo mare amy fotoan̈a han̈abaribarian̈a voninahitrinany. 14 Sambatra anarô izikoa baka amin’ny anarô mitondra an̈aran̈an’i Kristy mahavy anarô hankaratsian’olo.* Ia, sambatra anarô fôtony anarô manan̈a fan̈ahin’ny voninahitry, tsy ino zen̈y fa fan̈ahin’ny Zan̈ahary.
15 Tsy tôkony baka amy famonoan̈a olo, na fangalaran̈a, na fan̈anaovan̈a raha ratsy, na baka amy fidiran̈a amin’ny afairan’olo foeky mahavy anarô mijaly. 16 Fa izikoa ndraiky olo araiky mijaly fôtony izy Kristianin̈y, izy tsy tôkony ho men̈atra, fa izy tôkony hanohy han̈amia voninahitry Zan̈ahary fo amy maha Kristianin̈y izy. 17 Ziô bakà fotoan̈a voatôndro hitsaran̈a, ary olon’ny* Zan̈ahary antsendriky handeha hitsarain̈a voanalohany. Kanefa, izikoa atsika hitsarain̈a voanalohany, han̈ano akôry irô olo aby tsy nan̈eky vaovao tsara baka amy Zan̈ahary aby io? 18 Aviô, izikoa tsy vôntro mora* hampa avotro olo marin̈y, han̈ano akôry eky irô olo tsy mavozo Zan̈ahary salakady mpanota aby io? 19 Alô edy basy lan̈iany olo mijaly baka amy fan̈anaovan̈a sitrapôn’ny Zan̈ahary hanohy hitavandra izy fo sady tsy ho vôly han̈ano ny tsara. Zan̈ahary Mpamôron̈o io tsy mivadiky foeky.