Taratasy Voanalohany Handeha Amindrô Korintianin̈y aby Io

13 Izikoa zaho mivolan̈a volan̈an’olombelon̈o ndreky volan̈an’ny anjely kanefa zaho tsisy fitiavan̈a, zaho mira lakolosy maresaka na vy fisaka aroe* mifampikon̈o ke mantsintsin̈y. 2 Aviô izikoa zaho mahay maminan̈y sady mahay dikan’ny sekire masin̈y baka iô manan̈a fahaizan̈a jiaby, aviô izikoa zaho manan̈a finoan̈a matanjaka tsarabe* hahavitan̈a mamindra bongo kanefa zaho tsisy fitiavan̈a, zaho tsisy dikany.* 3 Baka iô izikoa zaho man̈amia fanan̈ananaka jiaby misy hazahoan’olo hafa hanin̈y, aviô izikoa zaho man̈ano sôron̈o ain̈inaka misy hampirehareha zaho kanefa zaho tsisy fitiavan̈a, tsisy dikany raha aby zen̈y.

4 Fitiavan̈a io mahari-draha ndreky tsara fan̈ahy. Fitiavan̈a io tsy be fô, tsy poerapoera, tsy man̈ambony ten̈a, 5 tsy man̈ano raha mampamen̈atra,* tsy mitady raha mahatsara ain̈inany tômpiny, tsy mora meloko, aviô tsy mitana heloko am-pô.* 6 Izio tsy ravoravo amy raha tsy marin̈y fa ravoravo amy raha marin̈y. 7 Izio mandefitry raha jiaby, mino raha jiaby, man̈anten̈a raha jiaby, aviô miaritry raha jiaby.

8 Fitiavan̈a io tsy ho ravan̈a foeky. Ndray misy fahaizan̈a maminan̈y, raha zen̈y hifoan̈ana; baka iô ndray misy fivolan̈ana amy volan̈a isan-karazany, raha zen̈y hifoan̈ana; aviô ndray misy fahaizan̈a, raha zen̈y hifoan̈ana. 9 Fôtony voafetra fo raha haintsika, baka iô faminanian̈a ambarantsika tsy feno. 10 Kanefa lera avy raha feno, hifoan̈ana raha voafetra. 11 Tamy zaho mbala tsaiky, zaho nivolan̈a karaha tsaiky, nieritreritry karaha tsaiky, aviô nandiniky karaha tsaiky. Fa zaho iziô efa be io, nadosoko aby toetrin’ny tsaiky. 12 Amy ziôty, manjavozavon̈o karaha mizaha raha amy fitaratra metaly* in̈y raha hitantsika; fa andra araiky an̈y, raha zen̈y ho hitantsika amasoamaso. Amy ziôty, fahaizan̈anaka voafetra, fa amy leran’izen̈y ndraiky izio ho feno,* karaha ataon’ny Zan̈ahary mahay zaho tsarabe. 13 Kanefa raha telo aby ty mbala ho iô fo: Finoan̈a, fan̈antinan̈a, aviô fitiavan̈a. Fa fitiavan̈a ny ten̈a maventy amindrô io.