Taratasy handeha amy Titosy
2 Fa anao ndraiky aza vôly mampianatra* raha mifan̈araka amy fampianaran̈a marin̈y.* 2 Ampirisiha lelahy efa mahazohazo taon̈o hahay hipezipezy raha ataony, tsy han̈ano jerin’ny tsaiky,* hahay handiniky, ho fatatra finoan̈a, ho be fitiavan̈a ndreky hiaritry. 3 Aviô ampirisiha koa man̈angy efa mahazohazo taon̈o hanan̈a fitondran-ten̈a man̈amia voninahitry Zan̈ahary, tsy han̈odihody olo amy raha tsy nataondrô, tsy handivôzin’ny figiahan̈a divain, fa hampianatra raha tsara, 4 amy zen̈y irô hahavita han̈amia torohevitry* man̈angy tanora baka irô io ho tia vadindrô, ho tia zanakandrô, 5 hahay handiniky, hadio fitondran-ten̈a, hazoto hikarakara taokantran̈o, han̈ano ny tsara, baka iô han̈aja fahifan̈an’ny vadindrô, amy zen̈y tsisy olo hankaratsy volan̈an’ny Zan̈ahary.
6 Aviô koa ampirisiha fo irô manafolahy aby io hahay handiniky. 7 Amy raha jiaby, aboaha fo fa anao ohatra tsara, baka anao alain’olo tahaka amy fan̈anaovan̈a asa tsara. Mazotoa* mampianatra olo raha madio.* 8 Raha mahatsara olo* fo volàn̈a amy zen̈y tsisy olo han̈amia tsin̈y raha volan̈inao, aviô amy zen̈y koa irô mpanohitry aby io ho men̈atra sady tsy hahita raha hankaratsian̈a atsika. 9 Ampirisiha lan̈iany olo miasa amin’olo* han̈eky fahifan̈an’olo mampiasa irô,* hifen̈y han̈ano raha mamparavoravo irô, tsy hamalivaly irô, 10 ndreky tsy hangalatra amindrô, fa han̈ano ny marin̈y fo, amy zen̈y ho hitan’olo fa ten̈a tsara ankitin̈y fampianaran̈an’ny Zan̈ahary Mpan̈avotro atsika io.
11 Zan̈ahary bakà efa nan̈aboaka hatsaram-pan̈ahy miavaka tamy karazan̈an’olo jiaby, ke nataony raha hahavy irô ho voavonjy. 12 Baka amy fahaizantsika raha zen̈y mahavy atsika* tsy han̈ano raha mifanohitry amy sitrapôn’ny Zan̈ahary ndreky tsy han̈iry han̈ano raha ratsy karaha fataon’olo amy donia ty. Baka amy zen̈y koa mahavy atsika tihan̈aboaka fa atsika mahay mandiniky aviô man̈ano ny marin̈y, baka iô tsy mivadiky amy Zan̈ahary, ndray atsika miaraka miain̈y amin’olo amy donia ty.* 13 Atsika tsy vitany miambin̈y raha mamparavoravo antin̈aintsika fo fa, atsika koa miambin̈y Zan̈aharintsika Farany Mahery io ndreky Jesosy Kristy Mpamonjy atsika han̈aboaka angôvondrô.* 14 Kristy nan̈amia ain̈inany baka atsika ho afaka* amy karazan̈a fandikan-dalàn̈a jiaby. Nan̈ano zen̈y koa izy misy han̈adiovany vahoaka araiky, baka izio hanjary fanan̈ananany manaokan̈a; vahoaka io hazoto han̈ano asa tsara.
15 Aza vôly mikoran̈a momba raha aby zen̈y ndreky mankahery* olo aviô man̈itsy raha tôkony hahitsy, fôtony anao efa namezan̈a fahifan̈a han̈ano zen̈y. Aza man̈eky hambanìn’olo.