Vaovao Tsara Nisoratin’i Lioka
16 Karaha ty koa ho izy tamy mpianatranany: “Nisy lelahy mpan̈arivo nanan̈a mpanompo araiky niandraikitry raha jiaby tan-tran̈onany tao. Nisy olo nivolan̈a taminany fa mpanomponany io nandanilany fanan̈ananany. 2 Nikahiany mpanompo io, ke ho izy taminany: ‘Ino raha ren̈iko momba anao zen̈y? Ameza zaho atỳ tatitry momba asa nankin̈iny taminao, fôtony efa tsy anao eky hiandraikitry tran̈onaka.’ 3 Ke mpanompo io nieritreritry: ‘Ino eky raha handeha hataoko? Zaho io handeha hadoson’ny tômpoko tsy hiandraikitry fanan̈ananany eky, kanefa zaho tsy hahavita hiasa tany* fôtony zaho tsy fatatra; hangataka hampamen̈atra zaho! 4 Ah! Hitako hevitry amy zen̈y olo han̈ano karibo an-tran̈o zaho lera zaho afak’asa.’ 5 Ke nikahiany tsiaraikiaraiky olo aby nanan̈an’ny tômponany traosa. Ho izy tamin’ny araiky voanalohany: ‘Ino* ma raha hanan̈an’ny tômpoko aminao?’ 6 Ho izy: ‘Menaka olivy injaton’ny bata.’* Ke ho mpanompo io taminany: ‘Alaiva taratasy fifan̈ikian̈a nataonao, mipitraha, aviô sorata ao malaky 50.’ 7 Baka iô ho izy tamin’ny araiky hafa: ‘Anao ke, ino raha hanan̈any aminao?’ Ho olo io: ‘Varimbazaha injaton’ny kora.’* Ke ho izy taminany: ‘Alaiva taratasy fifan̈ikian̈a nataonao, aviô 80 sorata.’ 8 Ke tômpon’ny mpanompo io nidera izy, fôtony ndray izy nan̈ano raha tsy marin̈y, naboakany fa izy misain̈y.* Fôtony zanakan’ny donia ty* koa fa man̈ano afaira amy mpiara-belon̈o amindrô, irô mahay mandiniky mandilatran’ny zanakan’ny mazava.
9 “Ty koa raha ambarako anarô: Ataova raha hazahoanarô kamarady baka amin’ny harian̈a tsy marin̈y, amy zen̈y lera irô io lany, anarô hiraisin’ny kamaradinarô aby io amy toeran̈a hipitrahan̈a mandrakizay. 10 Lan̈iany olo atokisan̈a amy raha hely, atokisan̈a koa izy amy raha be; aviô lan̈iany olo tsy marin̈y amy raha hely, tsy marin̈y koa izy amy raha be. 11 Ke izikoa tsy aboakanarô fa anarô mety atokisan̈a lera anarô mampiasa harian̈a tsy marin̈y, azôvy olo handeha han̈ankin̈y harian̈a ten̈a izy aminarô? 12 Aviô, izikoa tsy aboakanarô fa anarô mety atokisan̈a lera anarô mampiasa rahan’olo, azôvy olo han̈amia raha anarô? 13 Tsisy mpanompo mahavita manompo tômpo aroe: Na araiky ho halany, fa araiky ho tiany; na araiky hajainy,* fa araiky ndraiky tsy hasiany fôtiny. Tsy ho vitanarô hanompo Zan̈ahary sady hanompo Harian̈a.”*
14 Irô Fariseo tia vola aby io nitandren̈y raha jiaby zen̈y, ke Jesosy nadroedroendrô. 15 Ke ho izy tamindrô: “Anarô mivolan̈a fa anarô marin̈y man̈oloan̈a olo, kanefa Zan̈ahary mahay fônarô. Fôtony raha iritriretin’olo fa ten̈a misy valera, in̈y edy ny mampangaroharo amason’ny Zan̈ahary.
16 “Lalàn̈a ndreky Mpaminan̈y aby io firaka amy Jaona fo. Fa nanomboko tiô, Fanjakan̈an’ny Zan̈ahary io vaovao tsara torian̈a amin’olo, ke karazan̈an’olo jiaby mifen̈y mare man̈an̈y. 17 Ia, ho moramora amy lan̈itry ndreky tany aby ho ravan̈a, tozay tsy ho tanteraka tendron’ny soratra araiky amy Lalàn̈a ao.
18 “Lan̈iany lelahy misaraka amy vadiny ke manambady olo hafa, izy mandiadia vady. Aviô lan̈iany olo manambady man̈angy nisarahan’ny vadiny, izy mandiadia vady.
19 “Nisy lelahy mpan̈arivo araiky nisikiny lamba viôlé matoe ndreky lamba lin.* Izy nankafỳ raha farany tsara isan’andra, aviô nan̈eram-pô nan̈ano zay raha tiany. 20 Nisy lelahy mpangataka kahian̈a Lazarosy zay efa fapetrakan’olo tamy varavaran̈anany tiô. Rakotro bay ain̈inany. 21 Nan̈iry izy hihinan̈a hanin̈y latsaka baka tamy latabatran’ny lelahy mpan̈arivo io. Ndraiky nisy amboa foeky navy nilelatra bainany. 22 Tafara tatỳ, naty lelahy mpangataka io, ke izy nindesin’ny anjely handeha ankilan’i Abrahama.*
“Naty koa lelahy mpan̈arivo in̈y, ke izy nalevin̈y. 23 Tamin’izy nijalijaly tamy Fasan̈a* tao in̈y, izy nisan̈andra ke nahita Abrahama baka lavitry aviô Lazarosy tankilanany* tarỳ. 24 Ke izy nikaiky karaha ty: ‘A Abrahama babako ô, mamindrà fô aminaka, aviô iraha Lazarosy han̈ajobo tendron’ny tôndronany an̈atin’ny rano baka hampanintsinintsy lelanaka, fôtony mijaly zaho an̈atin’ny môtro mizelazela ty.’ 25 Kanefa ho Abrahama: ‘Zanako, tsaraova fa tan̈atin’ny andra jiaby niain̈anao, anao voky raha maro tsara.* Lazarosy ndraiky, raha tsy manjary fo nazony. Fa amy ziôty, izy hankahirezin̈y atỳ, fa anao ndraiky mijaly. 26 Baka iô koa, nasian̈a fampan̈a be mampisaraka zahay ndreky anarô, amy zen̈y olo tihiala atỳ tsy ho afaka handeha aminarô an̈y, aviô olo baka aminarô an̈y tsy ho afaka hitsaka aminay atỳ.’ 27 Ke ho izy: ‘Izikoa zen̈y basy, zaho mangataka anao, baba, handefa izy an-tran̈on’ny babako an̈y, 28 amy zen̈y izy han̈azava tsarabe* amindrô rahalahiko dimy an̈y, baka irô tsy ho lôso amy tany fijalian̈a atỳ koa.’ 29 Kanefa ho Abrahama: ‘Irô manan̈a Mosesy ndreky irô mpaminan̈y aby io. Ambilà irô hitandren̈y irô.’ 30 Ke ho lelahy io: ‘Abrahama babako ô, irô tsy hitandren̈y! Fa izikoa ndraiky misy araiky amin’olo maty atỳ mandeha amindrô an̈y, irô hibebaka.’ 31 Kanefa ho Abrahama taminany: ‘Izikoa irô tsy mitandren̈y Mosesy ndreky irô mpaminan̈y aby io, irô mbala tsy ho resy lahatra ndray misy olo mitsangana amy maty zen̈y.’”