Taratasy Handeha Amindrô Romanin̈y aby Io
16 Zaho mandrisiky anarô handray tsarabe Foibỳ ranabavintsika, mpanompo amy fiangonan̈a a Kenkrea. 2 Mafadiana, raisa tsara izy eraka fomba tôkony handraisan̈a olo masin̈y, fôtony izy koa mba mino Tômpo. Ampia izy amy zay raha ilàny fan̈ampian̈a, fôtony izy mpiaro olo maro, an̈isan’izen̈y zaho.
3 Sambitsara amy Priska ndreky Akoila mpiara-miasa aminaka man̈ano asan’i Kristy Jesosy. 4 Irô io nirisiky fahin̈anandrô* han̈avaotan̈a zaho. Tsy zaho fo fa fiangonan̈a jiaby amin’ny hafa firenena aby an̈y koa mba man̈ano mersy irô. 5 Sambitsara koa amy fiangonan̈a mivory an-tran̈ondrô ao. Sambitsara amin’i Epaineto rahalahiko tiako, an̈isan’ny voaloham-bokatra tan’Azia ke nanjary mpan̈ara-dia Kristy. 6 Sambitsara amy Maria araiky niasa mare nan̈ampy anarô. 7 Sambitsara amin’i Androniko ndreky Jonia havako sady niaraka nigadra taminaka. Irô io haindrô apôstôly aby io tsarabe sady efa mpan̈ara-dia Kristy talohanaka.
8 Sambitsara amin’i Ampliato, rahalahiko tiako sady mpan̈ara-dia Tômpo. 9 Sambitsara amin’i Orbano, mpiara-miasa amintsika man̈ano asan’i Kristy, ndreky amy Staky rahalahiko tiako. 10 Sambitsara amin’i Apela, araiky ankasitrahin’i Kristy. Sambitsara amin’i Aristobolo ndreky amin’olo tran̈o araiky aminany. 11 Sambitsara amin’i Herodiona havako. Sambitsara amy Narsisy ndreky amindrô olo mpan̈ara-dia Tômpo tran̈o araiky aminany ao. 12 Sambitsara amy Tryfena ndreky Tryfosa, man̈angy miasa mare man̈ano asan’ny Tômpo. Sambitsara amy Persỳ ranabavy tiantsika, fôtony izy niasa mare nan̈ano asan’ny Tômpo. 13 Sambitsara amy Rofosy, araiky voafidin’ny Tômpo, ndreky amy mamany sady mamako koa. 14 Sambitsara amin’i Asynkrito, Flegona, Hermesy, Patroba, ndreky Herma, aviô amindrô rahalahy aby miaraka amindrô ao. 15 Sambitsara amy Filologo ndreky Jolia, Nerea ndreky anabaviny, ndreky Olympa, aviô amin’olo masin̈y jiaby miaraka amindrô ao. 16 Mifan̈anaova ôroko masin̈y izikoa fa mifan̈ano mbalatsara. Fiangonan̈an’i Kristy jiaby man̈ano sambitsara anarô.
17 Mampirisiky anarô zaho rahalahy aby han̈ara-maso zay olo mampisy fisaratsarahan̈a ndreky mahavy olo hafa hiala amy finoan̈a.* Mifanohitry amy raha nianaranarô baka raha ataondrô zen̈y, ke iariva irô. 18 Fôtony baka, olo karaha zen̈y tsy mpanompon’i Kristy Tômpontsika fa mpanompon’ny kibondrô.* Irô man̈ano volan̈a manambitamby ndreky mandroboko olo, misy hamitahan̈a fôn’olo matify jery. 19 Nanjary hain’olo jiaby fa anarô man̈araka volan̈a ke zen̈y mahavy zaho ravoravo aminarô. Ndray zen̈y, tiako izikoa anarô marangitry izikoa amy raha tsara, fa bahara* izikoa amy raha ratsy. 20 Tsy ho ela, Zan̈ahary man̈amia fiadanan̈a hanôrotôro Satana ambanin’ny vitinarô. Irarian̈a Jesosy Tômpontsika han̈aboaka hatsaram-pan̈ahinany miavaka aminarô.
21 Sambitsara zen̈y anarô ho Timoty, mpiara-miasa aminaka, aviô ho iry havako: Losio, ndreky Jasona, aviô Sosipatro.
22 Zaho, Tertio, araiky nanoratra taratasy baka amy Paoly ty, man̈ano sambitsara anarô amin’ny an̈aran̈an’ny Tômpo.
23 Sambitsara zen̈y anarô ho Gaio, araiky nan̈ano karibo an-tran̈o zaho* ndreky fiangonan̈a jiaby. Sambitsara zen̈y anarô ho Erasto, mpikajy volan’ny* tanàna, ndreky Koarto rahalahiny. 24 ——
25 Zan̈ahary mahavita mankafatatra anarô eraka vaovao tsara ambarako ndreky eraka fitorian̈a momba Jesosy Kristy. Vaovao tsara zen̈y mifan̈araka tsarabe amy sekire masin̈y nasitriky rango efa ela be tan̈y, 26 fa efa naboaka atsika* ndraiky amy ziôty, aviô firenena jiaby efa nan̈ambaran̈a izio, baka tamy faminanian̈a amy Soratra Masin̈y ao. Raha zen̈y mifan̈araka amy didin’ny Zan̈ahary araiky velon̈o mandrakizay, amy zen̈y firenena jiaby hino izy ndreky han̈araka volan̈anany, fôtony zen̈y sitrapônany. 27 Baka tamy raha nataon’i Jesosy Kristy, ameza voninahitry mandrakizay Zan̈ahary, araiky kaihany manan̈a fahendrena! Ameny.