Taratasy Handeha Amindrô Efesianin̈y aby Io
5 Ke, amy maha zanaka tian̈a anarô, alaiva tahaka Zan̈ahary, 2 aviô mifen̈a fo han̈aboaka fitiavan̈a, karaha nataon’i Kristy nankatia atsika* ndreky nan̈amia ain̈inany hatao fan̈atitry ndreky sôron̈o nintsika,* baka izio hanjary han̈itry tsara amy Zan̈ahary.
3 Aza ambela hiton̈onin̈y aminarô foeky koran̈a momba fijangajangan̈a* ndreky raha jiaby mety ho fahalotoan̈a na fan̈irian̈a tsy mety afa-pô, fôtony raha zen̈y tsy mety amin’olo masin̈y; 4 karaha zen̈y koa fitondran-ten̈a mampamen̈atra, ndreky koran̈a lefadefaka, aviô songetaka vetaveta, fôtony irô io samby tsy mendriky; fa sitrany man̈ano mersy Zan̈ahary. 5 Hainarô sady mazava aminarô tsarabe bakà fa na olo mpijangajanga zen̈y, na olo man̈ano raha mampangaroharo,* na olo manan̈a fan̈irian̈a tsy mety afa-pô, tsy azôvy zen̈y fa olo manompo sampy, tsisy hanan̈a lova amy Fanjakan̈an’i Kristy ndreky Zan̈ahary.
6 Aza misy olo hambelanarô hamitaka anarô amy volan̈a tsisy dikany, fôtony baka amy raha aby zen̈y mahavy Zan̈ahary ho meloko amy zanakan’ny tsy fan̈arehan̈a volan̈a. 7 Ke aza man̈ano raha misy ifandraisany amindrô foeky;* 8 anarô taloha bakà tan̈atin’ny hiziky,* fa anarô ziô ndraiky efa an̈atin’ny hazavan̈a,* fôtony anarô tafikamban̈a amy Tômpo. Aboaha amy fiainan̈anarô fo fa anarô io zanakan’ny hazavan̈a, 9 fôtony hazavan̈a io mamokatra karazan̈a hatsaran-toetry jiaby ndreky fan̈anaovan̈a ny marin̈y baka iô fahamarin̈ana. 10 Ataova fo raha hahaizanarô ino raha tian’ny Tômpo, 11 aviô voleza man̈ano raha tsisy dikany fataon’olo an̈atin’ny hiziky; fa mifanohitry amy zen̈y, aboaha fa ratsy raha ataondrô.* 12 Fôtony raha ataondrô amy misitriky an̈y, ndray manon̈ono izy fo mampamen̈atra. 13 Raha jiaby abaribary* bakà aboakan’ny hazavan̈a, fôtony raha jiaby aboaka io hazavan̈a aby. 14 Zen̈y mahavy raha voavolan̈a ty: “Anao mandry io mifohaza, baka iô mitsangàna amy maty, amy zen̈y Kristy han̈azava anao.”
15 Ke mitandrema tsarabe fo tsao anarô mitondra ten̈a karaha olo lefaka fa tsy olo misy jery, 16 aviô ampiasà tsara fotoan̈anarô,* fôtony ratsy andra ziôty. 17 Ke voleza man̈ano karaha olo tsy misain̈y, fa ataova fo raha hahaizanarô sitrapôn’i Jehovah. 18 Baka iô anarô aza man̈ano mamon’ny divain, fôtony raha zen̈y hahavy anarô han̈ano hadalan̈a.* Fa anarô mila feno fan̈ahy masin̈y fo. 19 Lera anarô mifampikoran̈a,* anarô mifankahireza ke mampiasà salamo ndreky hira fideran̈a Zan̈ahary baka iô hira masin̈y, aviô mihirà amy fô nin’i Jehovah, miaraka amy lamozìky; 20 baka iô aza vôly man̈ano mersy Zan̈ahary Babantsika amy raha jiaby, amin’ny an̈aran̈an’i Jesosy Kristy Tômpontsika.
21 Anarô samby anarô mifan̈ikia, fôtony anarô mavozo Kristy. 22 Anarô man̈angy, ikia vadinarô, karaha atao man̈eky Tômpo, 23 fôtony lelahy lohan’ny vadiny, karaha ataony Kristy lohan’ny fiangonan̈a, sady izy lastiô mpamonjy vatan̈a io.* 24 Ke, karaha ataon’ny fiangonan̈a man̈eky Kristy, man̈angy koa tôkony han̈eky vadiny amy raha jiaby. 25 Anarô lelahy, tiava fo vadinarô, karaha nataon’i Kristy tia fiangonan̈a ndreky nan̈amia ain̈inany hamonjian̈a izio, 26 baka izy hankamasin̈y izio, ke han̈adio izio amy rano fisehan̈a, tsy ino zen̈y fa volan̈an’ny Zan̈ahary, 27 amy zen̈y fiangonan̈a io ho tsara mare man̈oloan̈a izy sady tsy hisy tasy, na kôrikôritry, na raha mitovitovy amy zen̈y, fa ho masin̈y ndreky tsisy tsin̈iny.
28 Karaha zen̈y koa fa, lelahy tôkony ho tia vadiny karaha ataony tia ain̈inany. Zay lelahy tia vadiny tia ain̈inany. 29 Tsiary nisy olo bakà mankahala ain̈inany* tômpiny zen̈y, fa izio tsy maintsy vilôminy ndreky karakarainy,* karaha ataon’i Kristy amy fiangonan̈a, 30 fôtony atsika an̈isan’ny vatan̈anany. 31 “Zen̈y mahavy lelahy hiala babany ndreky reniny, aviô hitambatra amy* vadiny, ke hanjary nôfotro araiky fo irô roe.” 32 Maventy sekire masin̈y nivolan̈iko zen̈y. Izio mikoran̈a momba Kristy ndreky fiangonan̈a. 33 Ndray izy man̈ano zen̈y, lelahy tsiaraikiaraiky tsy maintsy mankatia vadiny karaha ataony mankatia ain̈inany in̈y, fa man̈angy ndraiky tôkony han̈aja vadiny mare.