Taratasy voanalohany handeha amy Timoty
4 Kanefa volan̈an’ny* Zan̈ahary man̈ambara fa, amin’ny hoavy, olo sasany tsy hino raha inoantsika eky fôtony irô mitandren̈y volan̈a baka amy fan̈ahy ratsy* ndreky mitandren̈y fampianaran̈an’ny demony. 2 Ia, irô hitandren̈y vandindrô olo mpihatsaravelatsihy aby io, kanefa feon’ny fieritreretan̈andrô olo aby io efa miran̈a nitombohin̈y vỳ may mare. 3 Irô tsy man̈aomba olo hanambady, aviô irô tsy man̈aomba olo hihina hanin̈y sasany, kanefa irô hanin̈y aby io niasain’ny Zan̈ahary amy zen̈y lan̈iany olo manan̈a finoan̈a ndreky mahay ny marin̈y hihinan̈a hanin̈y aby io ndreky han̈ano mersy Izy. 4 Tsara aby bakà raha jiaby niasain’ny Zan̈ahary, an̈isan’izen̈y hanin̈y, ke tsisy hanin̈y tsy mety hoanintsika izikoa atsika efa baka nan̈ano mersy Zan̈ahary. 5 Sady Zan̈ahary efa nan̈ambara fa hanin̈y aby io madio,* ke anarô koa fa nivavaka momba irô io, anarô afaka mihina irô io.
6 Ke izikoa anao mifen̈y man̈amia torohevitry aby zen̈y irô rahalahy aby io, ho hita fa anao mpanompon’i* Kristy Jesosy ankitin̈y. Ho hita koa fa anao nahazo fampianaran̈a tsara sady man̈araka izio tsarabe. 7 Anao aza mitandren̈y tantara tsy marin̈y sady tsy man̈isy fôtiny Zan̈ahary, karaha irô tantara fitantaraindrô matoevavy aby io. Fa mifen̈a mare tsy hivadiky amy* Zan̈ahary; ia, ataova tanjon̈o raha zen̈y. 8 Fôtony olo araiky koa man̈ano spaoro, misy hatsaran̈a hely azony, fa olo araiky ndraiky koa tsy mivadiky amy* Zan̈ahary, izy hahazo hatsaran̈a maro rango iziô firaka amin’ny hoavy.* 9 Atokisan̈a tsarabe volan̈a zen̈y sady ten̈a tôkony hiken̈a. 10 Zen̈y mahavy atsika hiasa mare sady hifen̈y angôvo jiaby, fôtony atsika matoky* Zan̈ahary velon̈o, araiky Mpan̈avotro karazan̈an’olo jiaby, intsaka eky fa olo tsy mivadiky aminany.
11 Aza vôly man̈ambara didy aby zen̈y ndreky mampianatra momba irô io. 12 Marin̈y fa anao tanora, kanefa aza ambela hisy olo foeky han̈ambany anao. Anao mifen̈a fo baka anao hanjary môdely arehan’olo tsy mivadiky, na amy raha volan̈inao zen̈y, na amy raha ataonao, na amy fitondran-ten̈a madio anan̈anao, na amy fan̈aboahanao fitiavan̈a na amy fanan̈anao finoan̈a. 13 Parapaviako, mifen̈a fo hahay hamaky teny amason’olo, baka iô aza vôly mandrisiky olo han̈ano raha tsara* ndreky mampianatra irô. 14 Mitandrema tsao anao tsy man̈isy fôtiny kadô namezan’ny Zan̈ahary anao. Kadô io nazonao tamin’irô anti-pan̈ahy aby io* nametra-tan̈ana taminao irô koa fa naharen̈y faminanian̈a momba anao. 15 Diniha* tsarabe raha aby zen̈y, aviô aza adoso an̈atin’ny jerinao foeky, baka ho hitan’olo jiaby fa anao nahaimatotro.* 16 Ataova ny farany tsara vitanao baka anao hahay hampianatra sady hanjary ohatra tsara amin’olo. Aza vôly man̈ano raha aby zen̈y, fa izikoa anao man̈ano zen̈y, anao ho voavonjy aviô ho voavonjy koa olo mitandren̈y anao.