Taratasy handeha amindrô Kôlôsianin̈y aby io
1 Baka amy Paoly, apôstôlin’i Kristy Jesosy nifidin’ny* Zan̈ahary, ndreky baka amy Timoty rahalahintsika, 2 handeha amin’olo masin̈y aby a Kôlôsia an̈y, tsy azôvy zen̈y fa irô rahalahy tsy mivadiky sady mpan̈ara-dia Kristy aby io:
Irarian̈a Zan̈ahary Babantsika han̈aboaka hatsaram-pan̈ahy miavaka* aminarô ndreky han̈amia anarô fiadanan̈a.
3 Zahay tsy vôly man̈ano mersy Zan̈ahary Baban’i Jesosy Kristy Tômpontsika, zahay koa fa mivavaka ninarô. 4 Ren̈inay bakà fa anarô mino Kristy Jesosy ndreky tia olo masin̈y jiaby, 5 ary baka amy fan̈antinan̈a najarisin̈y ninarô an-dan̈itry an̈y mahavy zen̈y. Anarô efa naharen̈y momba fan̈antinan̈a io tamy zahay nitory vaovao tsara taminarô, tsy ino zen̈y fa hafatra momba fahamarin̈ana. 6 Vaovao tsara io ren̈in’olo man̈eran̈a donia ty aviô maro olo man̈eky izio, ary izio navy firaka taminarô tan̈y. Maro koa olo man̈eky izio aminarô an̈y, nanomboko tamin’ny andra narin̈esanarô ndreky nahaizanarô tsarabe ino marin̈y hatsaram-pan̈ahy miavaka aboakan’ny Zan̈ahary zen̈y. 7 Zen̈y raha nianaranarô tamin’i Epafra, mpiara-manompo tiantsika sady rahalahy tsy mivadiky. Izy mpanompon’i Kristy misolo ten̈a zahay. 8 Nikoran̈iny taminay koa fa fan̈ahy masin̈y man̈ampy anarô han̈aboaka fitiavan̈a.
9 Ke rango tamin’ny andra narin̈esanay raha jiaby momba anarô zen̈y, zahay tsy vôly mivavaka baka Zan̈ahary han̈ampy anarô hahay tsarabe ino sitrapônany. Mivavaka fo koa zahay baka fan̈ahy masin̈y han̈ampy anarô hanan̈a fahendrena jiaby sady hahay raha tian’ny Zan̈ahary hambara, 10 amy zen̈y fitondran-ten̈anarô han̈amia voninahitry Jehovah ke anarô hamparavoravo izy amy lafiny jiaby ndreky han̈ano* asa tsara isan-karazany, baka iô hahaihitombo fo fahaizanarô ny marin̈y momba Zan̈ahary. 11 Irarian̈a Zan̈ahary hampiasa angôvonany be voninahitry ke hankafatatra anarô ndreky han̈amia anarô angôvo jiaby ilainarô, amy zen̈y anarô hahavita hiaritry raha jiaby ndreky hahari-draha aviô ho ravoravo. 12 Ke ataova mersy Zan̈ahary Babantsika, fôtony izy nan̈ampy anarô ho vain̈y hahazo lovan’olo masin̈y, tsy azôvy zen̈y fa irô olo an̈atin’ny hazavan̈a.
13 Zan̈ahary nan̈avotro atsika tamy fahifan̈an’ny hiziky, baka iô namindra atsika amy fanjakan̈an’ny Zanany tiany. 14 Zanany io nankafaka atsika izikoa fa nan̈efa vidim-pan̈avaotan̈a, ke zen̈y mahavy atsika mahazo familan-keloko nohon’ny fahotan̈antsika. 15 Tsisy ny hafa amy toetrin’ny Zan̈ahary tsy hita maso toetrinany, aviô izy talan̈olo amy raha jiaby niasain’ny Zan̈ahary. 16 Izy nampiasain̈a izikoa fa namôron̈o raha hafa jiaby, na an-dan̈itry an̈y na ambony tany eto, na raha hita maso na raha tsy hita maso, na mpitondra* zen̈y, na tômpo, na fitondrasan̈a, na fahifan̈a. Ia, izy nampiasain̈a izikoa fa namôron̈o raha hafa jiaby, ary ninany namoraon̈ana irô io. 17 Izy nisy talohan’ny raha hafa jiaby, aviô izy nampiasain̈a hampisy raha hafa jiaby. 18 Izy lohan’ny vatan̈a, tsy ino zen̈y fa fiangonan̈a. Izy fanombohan̈a ndreky talan̈olo amin’olo maty, ke izy voanalohany amy raha jiaby. 19 Kristy tian’ny Zan̈ahary ho feno amy lafiny jiaby. 20 Baka tamy Kristy, ia, baka tamy lio nalatsany tamin’ny hazofijalian̈a* in̈y, nahavy raha hafa jiaby nampihavan̈in’ny Zan̈ahary taminany,* na raha an-dan̈itry zen̈y na raha ambony tany.
21 Taloha, anarô lavitry Zan̈ahary sady fahavalonany, fôtony jerinarô nifantoko tamy fan̈anaovan̈a raha tsy manjary. 22 Fa anarô ziô nampihavan̈in’ny Zan̈ahary taminany baka tamy sôron̈o nataon’ny Zanany. Nan̈ano zen̈y Zan̈ahary baka anarô ho masin̈y ndreky tsy hisy tsin̈y aviô tsisy raha han̈odian̈a anarô, lera anarô man̈oloan̈a Izy. 23 Ndray izy man̈ano zen̈y, anarô mila manan̈a finoan̈a fo ndreky miôrin̈y tsarabe amy fôtotro io* ke tsy han̈eky ho voahozongozon̈o. Aza ambela hisy raha foeky han̈adoso fan̈antinan̈a efa nazonarô baka tamy vaovao tsara efa ren̈inarô, sady nitorian̈a tamin’olo jiaby.* Zaho* nirahan’ny Zan̈ahary han̈ambara vaovao tsara io.
24 Ndray zaho iziô mijaly, zaho ravoravo fo fôtony haiko fa mahatsara anarô raha zen̈y. Zaho mbala vôn̈ono hijaly fo, karaha Kristy, misy hahatsara vatan̈an’i Kristy, tsy ino zio fa fiangonan̈a. 25 Zaho nanjary mpanompon’ny fiangonan̈a zen̈y, eraka andraikitry nankin̈in’ny Zan̈ahary taminaka baka hahatsara anarô. Zen̈y mahavy zaho han̈ano erakan’ny vitako amy fitorian̈a volan̈an’ny Zan̈ahary. 26 An̈isan’ny volan̈an’ny Zan̈ahary io sekire masin̈y efa nasitriky rango tamy fotoan̈a nisian’ny donia ty,* ndreky rango tamindrô taranaka aby taloha tan̈y. Fa sekire zen̈y ndraiky ziôty efa nabaribary tamin’olonany masin̈y aby io. 27 Irô hafa firenena aby io koa mba tian’ny Zan̈ahary han̈ambaran̈a sekirenany masin̈y salakady be voninahitry io. Ty sekire io: Kristy tafikamban̈a aminarô, dikan’izio: Anarô man̈anten̈a hahazo voninahitry miaraka aminany. 28 Zahay mitory momba izy. Mifen̈y koa zahay mampianatra ndreky man̈anatra olo jiaby, aviô raha jiaby hainay rasainay amindrô, amy zen̈y zahay hahavita han̈ampy olo jiaby man̈ara-dia Kristy hanjary matotro. 29 Zen̈y mahavy zaho miasa mare sady mampiasa angôvo amezany zaho.