Taratasy voanalohany handeha amindrô Tesalônianin̈y aby io
5 Rahalahy aby, tsisy raha tôkony hisoratinay aminarô eky momba fotoan̈a ndreky vanim-potoan̈a, 2 fôtony hainarô tsarabe fa andran’i Jehovah ho avy karaha mpangalatra amin’ny alin̈y. 3 Irô koa fa mivolan̈a: “Fiadanan̈a ndreky filaminan̈a!”, ho avy tampoko amindrô fandripahan̈a. Ia, raha zen̈y ho tampoko karaha ataon’ny tehotehokon’ny man̈angy pitihin’ny tsaiky in̈y; tsisy tany hilifasandrô foeky. 4 Fa anarô, rahalahy aby, anarô tsy an̈atin’ny hiziky ke oe ho tampoko aminarô karaha ataon’ny mpangalatra tsy nan̈ampoy ho takatran’ny andra kiaka in̈y andra zen̈y. 5 Fôtony anarô jiaby io zanakan’ny hazavan̈a ndreky zanakan’ny andra mazava. Atsika salakady tsy zanakan’ny alin̈y tsy zanakan’ny hiziky.
6 Irô olo hafa aby io mandry. Fa atsika ndraiky, alô atsika tsy hoandry fa hiambin̈y fo ndreky handiniky tsarabe. 7 Fôtony lan̈iany olo mandry, alin̈y izy mandry; aviô lan̈iany olo mamolava, alin̈y izy migiaka mare. 8 Fa atsika ndraiky zanakan’ny hazavan̈a, ke alô atsika tsy vôly han̈aboaka fa atsika mahay mandiniky; aviô alô atsika hisikiny fiaraovan-tratra, tsy ino zen̈y fa finoan̈a ndreky fitiavan̈a; baka iô han̈ano fiaraovan-doha, tsy ino zen̈y fa fan̈antinan̈a famonjian̈a. 9 Fôtony bakà, tsy han̈asazy atsika* antony nifidianan’ny Zan̈ahary atsika, fa izy nifidy atsika baka atsika ho avotro. Jesosy Kristy Tômpontsika nampiasainy han̈avaotan̈a atsika. 10 Ia, Jesosy naty han̈avaotan̈a atsika, amy zen̈y na velon̈o* atsika na maty,* atsika* hiaraka aminany. 11 Ke aza vôly mifankahery ndreky mifan̈ampy, karaha efa ataonarô ziô.
12 Rahalahy aby, zahay miangavy anarô han̈aja irô olo miasa mare an̈ivon’ny fiangonan̈a ao, ndreky irô olo mitariky anarô amy fan̈anaovan̈a asan’ny Tômpo, aviô irô olo man̈anatra anarô. 13 Mifen̈a ho tsara fan̈ahy mare amindrô sady ho tia irô, fôtony irô io miasa mare. Aviô koa, mihavàn̈a tsara anarô samby anarô. 14 Tsy zen̈y fo fa, mandrisiky anarô koa zahay, rahalahy aby, han̈anatra* lan̈iany olo tsy man̈araka fitsipiky, hankahery olo kivy, han̈ampy olo malemy,* aviô hahari-draha amin’olo jiaby. 15 Anarô aza mamaly faty,* fa mifan̈anaova ny tsara fo, aviô man̈anaova ny tsara amin’olo jiaby.
16 Miravoravoa fo. 17 Aza vôly mivavaka. 18 Mahaiza man̈ano mersy amy raha jiaby. Zen̈y raha tian’ny Zan̈ahary hataonarô mpan̈ara-dia Kristy Jesosy. 19 Anarô aza man̈ano raha hahavy fan̈ahy masin̈in’ny Zan̈ahary tsy hiasa aminarô.* 20 Anarô mitandrema tsao tsy man̈isy fôtiny hafatra baka amy Zan̈ahary.* 21 Alaiva antoko tsarabe raha jiaby; aza vôly man̈ano ny tsara. 22 Fadiana aby kila raha ratsy jiaby.
23 Zan̈ahary man̈amia fiadanan̈a, ke irarian̈a izy han̈amia anarô fiadan̈ana ndreky hankamasin̈y anarô, baka anarô hahavita hanompo izy. Aviô rahalahy aby, amy maha fiangonan̈a anarô, irarian̈a toe-tsain̈inarô ndreky fiainan̈anarô aviô vatan̈anarô tsy ho hisy tsin̈y foeky sady tsy ho hisy antsany amy lafiny jiaby, lera avy fotoan̈a himpodianan’i Jesosy Kristy Tômpontsika. 24 Zan̈ahary nifidy anarô io tsy mivadiky amy volan̈anany, ke handeha hataony ankitin̈y raha zen̈y.
25 Rahalahy aby, anarô aza vôly mivavaka baka Zan̈ahary han̈ampy zahay.
26 Anarô koa fa man̈ano mbalatsara rahalahy jiaby, iraofa amy fify irô.*
27 Amin’ny an̈aran̈an’ny Tômpo, zaho miangavy anarô hamaky taratasy ty amy rahalahy jiaby.
28 Irarian̈a Jesosy Kristy Tômpontsika han̈aboaka hatsaram-pan̈ahy miavaka aminarô.