Taratasy faharoe handeha amindrô Tesalônianin̈y aby io
1 Baka amy Paoly ndreky Sylvano* aviô Timoty, handeha amy fiangonan̈an’ny Zan̈ahary Babantsika ndreky Jesosy Kristy Tômpo, a Tesalôniky an̈y:
2 Irarian̈a anarô han̈aboahan’ny Zan̈ahary Babantsika ndreky Jesosy Kristy Tômpo hatsaram-pan̈ahy miavaka,* aviô irarian̈a anarô hahazo fiadanan̈a baka amindrô.
3 Rahalahy aby, zahay tsy maintsy man̈ano mersy Zan̈ahary fo baka amy raha ataonarô. Mety tsarabe raha zen̈y fôtony mahaifatatra fo finoan̈anarô, baka iô mahaimifankatia fo koa anarô samby anarô. 4 Ke zen̈y mahavy zahay mirehareha fo izikoa fa mikoran̈a momba anarô amy fiangonan̈an’ny Zan̈ahary. Ambaranay irô koa fa, ndray anarô injehin̈y ndreky miatriky* raha sarotro, anarô miaritry ndreky manan̈a finoan̈a. 5 Ary baka amy zen̈y mahavy Zan̈ahary man̈eky fa anarô vain̈y hiditry amy Fanjakan̈anany, fôtony baka amy Fanjakan̈anany io mahavy anarô miaritry raha marobe zen̈y. Anarô tsy mivadiky, ke Zan̈ahary han̈aboaka fa izy man̈ano ny rariny izikoa fa mitsara.
6 Ia, Zan̈ahary man̈ano ny rariny, ke izy han̈asazy olo mampijaly anarô. 7 Kanefa, ndray anarô ziô miaritry raha sarotro, atsika efa tsy hijaly eky lera Jesosy Tômpo ndreky irô anjelinany mahery aby io habaribary baka an-dan̈itry an̈y 8 an̈atin’ny môtro mizelazela. Izy han̈asazy* olo tsy mahay Zan̈ahary ndreky olo tsy man̈eky vaovao tsara momba Jesosy Tômpontsika. 9 Irô io hitsarain̈a ke haripaka mandrakizay. Irô hadosony man̈oloan̈a izy, aviô izy efa tsy hampiasa angôvonany mahery eky han̈ampian̈a irô. 10 Zen̈y raha handalo lera Tômpo avy ke hamezan̈a voninahitry miaraka amindrô olonany masin̈y aby io. Amin’ny andra zen̈y koa, ho gaga mare ndreky ho rikian̈a irô olo mino izy aby io izikoa fa hahita izy; ndray anarô koa mba ho gaga karaha irô fôtony anarô nino raha nambaranay anarô.
11 Zen̈y mahavy zahay tsy vôly mivavaka ninarô, baka anarô konten’ny Zan̈ahary an̈isan’olo vain̈y kahiany, aviô baka izy hampiasa angôvonany han̈atantirahan̈a zay raha tiany hatao ndreky hampahômby zay raha ataonarô fôtony anarô mino. 12 Amy zen̈y, baka amy raha ataonarô hahavy an̈aran̈an’i Jesosy Tômpontsika hahazo voninahitry. Aviô, anarô mpan̈ara-dia izy koa mba hahazo voninahitry fôtony Zan̈aharintsika ndreky Jesosy Kristy Tômpo samby han̈aboaka hatsaram-pan̈ahy miavaka aminarô.