Taratasy handeha amindrô Hebreo aby io

11 Finoan̈a zen̈y fatokisan̈a angôvo jiaby fa ho tanteraka ankitin̈y raha antinain̈a, aviô koa finoan̈a io porofo* mankamarin̈y fa misy tsarabe raha araiky ndray izio tsy hita maso. 2 Irô olo taloha tan̈y* nanan̈a finoan̈a, ke naboakan’ny Zan̈ahary fa irô nankasitrahany.

3 Finoan̈a mahavy atsika mahay fa baka amy volan̈an’ny Zan̈ahary nampisy raha jiaby.* Ia, Zan̈ahary nampiasa raha tsy hita maso han̈amboaran̈a raha hita maso.

4 Baka tamin’i Abela nanan̈a finoan̈a nahavy izy nan̈ano sôron̈o amezan̈a Zan̈ahary. Sôron̈o nataony in̈y misimisy valera tozay nin’i Kaina. Izy nanan̈a finoan̈a ke izy nambara fa marin̈y. Nankasitrahan’ny Zan̈ahary fan̈amezan̈anany, ke ndray izy naty, mbala misy raha fo ianarantsika* baka amy finoan̈a nanan̈any.

5 Baka tamin’i Enoka nanan̈a finoan̈a nahavy izy nafindran’ny Zan̈ahary plasy, amy zen̈y izy tsy hijaly izikoa fa ho foaty. Ia, nafindra plasy izy ke tsisy olo nahita izy foeky. Fa talohan’i Enoka nafindrany, nataony nazava tsarabe taminany fa izy nan̈ano raha namparavoravo Izy.* 6 Ary izikoa olo araiky tsy manan̈a finoan̈a, izy tsy pôsibla hahavita hamparavoravo Zan̈ahary zen̈y foeky; fôtony lan̈iany olo man̈aton̈o Zan̈ahary tsy maintsy mino fa misy izy, sady man̈amia hatsaran̈a lan̈iany olo mifen̈y mare mitady izy.

7 Baka tamin’i Noa nanan̈a finoan̈a nahavy izy nan̈aboaka fa izy navozo Zan̈ahary, ke izy nan̈amboatra sambofiara han̈avaotan̈a fianakavian̈anany. Izy bakà efa nahazo fampitandreman̈a baka tamy Zan̈ahary. Izy nanan̈a finoan̈a, ke zen̈y nahavy izy nambara fa marin̈y ndreky nahavy izy nan̈aboaka fa donia ty vain̈y sazian̈a.

8 Baka tamin’i Abrahama nanan̈a finoan̈a nahavy izy nan̈araka volan̈an’ny Zan̈ahary, tamin’izy nirahany niala tamy tany nisy izy ke nandeha tamy tany nampan̈antin̈ain’ny Zan̈ahary fa hanjary lovanany. Ia, izy nandeha fo, ndray mbala tsy hainy aby aia tany handihanany io. 9 Baka tamin’izy nanan̈a finoan̈a koa nahavy izy nivahiny tamy tany nampan̈antinain̈a io, karaha vahiny tan-tanin’olo in̈y. Izy nipetraka tamy tran̈olay niaraka tamin’Isàka ndreky Jakoba. Irô io koa mba nampan̈antin̈ain’ny Zan̈ahary fa handova tany io. 10 Abrahama tsy vôly niambin̈y tanàna araiky nanan̈a fôtotro ten̈a izy. Zan̈ahary nan̈amboatra plan’ny tanàna io ndreky nan̈ôrin̈y izio.

11 Baka tamy Sarah nanan̈a finoan̈a nahavy izy navesatra, ndray izy efa tsy amy taon̈on’olo tôkony hiteraka eky. Izy bakà nino fa Zan̈ahary, araiky nan̈ano fampan̈antinan̈a io, tsy maintsy hitàna volan̈anany.* 12 Ke zen̈y ivolan̈ana fa baka tamin’i Abrahama, lelahy araiky efa kôntin’ny maty, navian’ny tsaiky maro karaha hamaraozan’ny lakintan̈a amy lan̈itry sady tsy avoakônty karaha ataon’ny jia amôron-dranomasin̈y.

13 Irô olo jiaby avoakoran̈a tiô in̈y tsisy nahita fampan̈antinan̈a aby in̈y tanteraka, firaka irô naty. Fa ndray zen̈y, irô nino fa tsy maintsy ho tanteraka fo irô io amin’ny amaray an̈y.* Zen̈y nahavy irô tsy vôly niambin̈y ndreky nan̈ambara tamin’olo fa irô vahiny sady tsy hidôko ela tamy tany io. 14 Lan̈iany olo mivolan̈a raha karaha zen̈y bakà man̈aboaka tsarabe fa irô mifen̈y mitady tany hipitrahandrô. 15 Izikoa irô tsy vôly nieritreritry momba tany nialandrô, irô nahita fomba himpodianan̈a tan̈y fo. 16 Fa irô nifen̈y hahazo tany araiky mbala tsara mare, ary tany zen̈y nin’ny Zan̈ahary.* Zen̈y nahavy Zan̈ahary tsy men̈atra foeky kahian̈a Zan̈aharindrô, fôtony izy efa nan̈oman̈a tanàna araiky handeha hamezan̈a irô.

17 Baka tamin’i Abrahama nanan̈a finoan̈a nahavy izy efa tseky nan̈ano sôron̈o Isàka, izy koa fa nandalo fitsapan̈a, 18 ndray izy efa nivolan̈ana fa “baka amin’i Isàka hiboahan’ny araiky kahian̈a taranakanao.” Ia, vôn̈ono fo Abrahama han̈ano sôron̈o zanany lahitaokan̈a io, ndray izy efa ravoravo nahazo fampan̈antinan̈a aby in̈y. 19 Hainy bakà fa Zan̈ahary mahavita manangana zanany io amy maty. Ary zanany io ndray efa karaha maty, izio nampody taminany. Raha zen̈y misy dikany an̈ohatra.

20 Baka tamin’i Isàka nanan̈a finoan̈a nahavy izy nitso-drano Jakoba ndreky Esao, ke nambarany irô ino raha mbala hiboaka.

21 Baka tamy Jakoba nanan̈a finoan̈a nahavy izy nitso-drano zanakan’i Josefa aroe lahy, tamin’izy efa ho foaty. Izy baka tiô nitongory* tamy tongozonany* ke nivavaka.

22 Baka tamy Josefa nanan̈a finoan̈a nahavy izy nivolan̈a fa irô zanakan’Israely aby io mbala hiala an’Ezipty, tamin’izy efa ho foaty. Izy nan̈afatrafatra* fa taolan̈anany tôkony hindesindrô miaraka amindrô lera irô miala amy tany io.*

23 Baka tamy raimandrenin’i Mosesy nanan̈a finoan̈a nahavy irô tsy navozo bekon’ny mpanjaka, fa nanitriky izy tan̈atin’ny telo fanjava, izy koa fa teraka. Hitandrô bakà fa tsara mare tsaiky hely io. 24 Baka tamy Mosesy nanan̈a finoan̈a nahavy izy, koa fa nahaibe, tsy nan̈eky kahian̈a zanakan’ny zanakavavin’i Faraon.* 25 Naleoleony nampijalian̈a niaraka tamy vahoakan’ny Zan̈ahary tozay hahita haravoan̈a betibetiky amy fan̈anaovan̈a fahotan̈a. 26 Taminany bakà, baraka niaretan’i Kristy mbala valera mare mandilatra harian̈a jiaby tan’Ezipty, fôtony jerinany jiaby efa tamy valisoa ho azony. 27 Baka tamin’izy nanan̈a finoan̈a nahavy izy niala ta Ezipty, fa tsy baka tamin’izy navozo mpanjaka. Ia, izy tsy voahozongozon̈o foeky fôtony izy efa karaha nahita Araiky tsy hita in̈y, tsy azôvy zen̈y fa Zan̈ahary. 28 Baka tamin’izy nanan̈a finoan̈a koa nahavy izy nankalaza pasky ndreky nan̈ôsotro lio tamy sisin’ny varavaran̈a, amy zen̈y anjelin’ny Zan̈ahary* tsy hamono* talan̈olondrô Israelita aby io.

29 Baka tamin’irô Israelita aby io nanan̈a finoan̈a nahavy irô namakivaky Ranomasin̈y Mena, karaha olo mandeha tamy tany maiky in̈y. Kanefa irô Ezipsianin̈y aby io koa fa nan̈aohatra nan̈ano karaha zen̈y, irô natelin̈in’ny rano.

30 Baka tamin’irô Israelita* aby io nanan̈a finoan̈a nahavy riban’ny Jerikô rongana, irô koa fa baka nikodidin̈y tanàna io tan̈atin’ny fito andra. 31 Baka tamy Rahaba, man̈angy makorely in̈y, nanan̈a finoan̈a nahavy izy nandray tsarabe irô mpitsikilo aby in̈y, ke izy tsy naty niaraka tamy vahoaka ratsy fan̈ahy* nipetraka tamy tanàna io.

32 Ino koa raha mety hivolan̈iko? Tsy ampy fotoan̈a izikoa zaho mbala hikoran̈a momba Gideona, Baraka, Samson, Jefta, Davida, aviô Samoela ndreky irô mpaminan̈y hafa aby io. 33 Baka tamin’irô nanan̈a finoan̈a nahavy irô nahavita nandresy mpanjaka maro, nan̈ano raha hisian’ny rariny, nahazo fampan̈antinan̈a, namody vavan’ny lion, 34 tsy nay foeky ndray natsipy tan̈atin’ny môtro nizelazela, nahavita nilefa ke tsy natin’ny sabatra, nalemy kanefa nanjary natanjaka, tsy navozovozo foeky nandeha lagera, ndreky nampilefa maramila maro nandeha nanafiky irô. 35 Nisy man̈angy sasany nitsena havandrô natsangana tamy maty, fa olo hafa ndraiky nampijalian̈a mare fôtony irô tsy nan̈eky havaotan̈a tamy fomba hafa ankoatran’ny vidim-pan̈avaotan̈a, amy zen̈y irô hahazo fitsanganan̈a amy maty mbala tsaratsaran’ny nindrô olo efa natsangana taloha aby in̈y. 36 Olo sasany ndraiky nitsapain̈a izikoa fa nadroedroen’olo ndreky nikaravasìn̈a, ary tsy vitan’izen̈y fo fa, irô mbala nirohizin̈y silisily ndreky nigadrain̈a koa. 37 Irô nitorahan̈a vato, nitsapain̈a, nitapahan̈a aroe tamy lasỳ, nivonen̈a tamy sabatra, nirenireny sady nisikiny hodrik’ôndrikôndriky* ndreky hodrikin’ny bengy, salakady tsisy raha nanan̈ana, ndreky ninjehin̈y, baka iô nampijalian̈a. 38 Irô nirenireny tamy tany paiky, tamy bongo, nisitriky tan̈atin’ny lava-bato ndreky tan̈atin’ny lavaka maventy tambanin’ny tany. Donia ty tsy vain̈y irô foeky!

39 Ndray efa nataon’ny Zan̈ahary nazava tsarabe tamin’olo jiaby tsy nivadiky aby in̈y fa irô nankasitrahany nohon’irô nanan̈a finoan̈a, tsisy tamindrô in̈y nahita fahatantirahan’ny fampan̈antinan̈a natao tamindrô. 40 Zan̈ahary bakà efa nieritreritry han̈amia atsika raha tsara mare, amy zen̈y irô tsy hanjary lavorary alohantsika.