Vaovao Tsara Nisoratin’i Marka
16 Sabata koa fa vita, Maria Magdalena, ndreky Maria renin’i Jakoba, aviô Salome nivanga ravin-draha man̈itry handeha hahôsotro amy fatin’i Jesosy. 2 Tamin’ny andra voanalohany tamin’ny herin̈iandra, bônera be, masoandra mbala vo mipiriaka in̈y, irô nandeha tam-pasan̈a tan̈y. 3 Irô nifampikoran̈a karaha ty: “Azôvy eky hirahantsika han̈aposy vato amy fidiran̈a amy fasan̈a io?” 4 Fa masondrô koa fa natôpindrô, zahandrô vato io efa voaposy, kanefa izio maventy be. 5 Irô koa fa niditry tam-pasan̈a tao, irô nahita manafo lahy araiky nisikiny rôbo fotsy lava, nipetraka tamin’ny ilany ankavanan̈a. Ke irô lany fan̈ahy. 6 Ho izy tamindrô: “Anarô aza lany fan̈ahy. Jesosy baka a Nazareta, araiky nivonen̈a tamy pôtô in̈y izy tadiavinarô io, tsy zen̈y? Izy efa tsy ato, fôtony izy efa natsangana. Zahava baka, teto tany nan̈apitrahandrô izy. 7 Fa mindao volàn̈a amy mpianatranany ndreky amy Petera: ‘Izy efa amy lalan̈a handeha a Galilia, ke an̈y anarô hahita izy, eraka raha efa nivolan̈iny taminarô.’” 8 Ke irô niboaka baka tam-pasan̈a tao aviô irô nilefa. Nangôrohôro irô sady lany fan̈ahy. Irô tsy nivolan̈a raha tamin’olo foeky fôtony irô navozo.*