Vaovao Tsara Nisoratin’i Lioka
9 Baka iô, nikahiany irô 12 Lahy aby io ke navoriny, aviô irô namezany angôvo ndreky fahifan̈a han̈aboaka demony jiaby ndreky hampajanga aretin̈y. 2 Baka iô irô nirahiny hitory momba Fanjakan̈an’ny Zan̈ahary ndreky hampajanga olo. 3 Ho izy tamindrô: “Anarô aza mitondra raha foeky izikoa fa mandeha, aza mitondra tongozo, na saka fatao vatsy, na môfo, na vola.* Aviô aza mitondra lamba aroe.* 4 Fa amy zay tran̈o hidiranarô, midokoa ao parapialanarô amy tanàna io. 5 Ndray aia ndray aia misy olo tsy mandray anarô, lera anarô miala amy tanàna io, ahintsàn̈a laposiera* amy vitinarô, ho vavolombelon̈o hitsara irô.” 6 Ke irô lôso nandeha nitety tanàna tsiaraikiaraiky tamy faritry io, nan̈ambara vaovao tsara ndreky nampajanga olo.
7 Heroda* nanjaka tamy faritrin’i Galilia tamy zen̈y. Ren̈iny raha jiaby nandalo, ke izy very hevitry fôtony nisy olo nivolan̈a fa Jaona efa natsangana tamy maty. 8 Kanefa olo sasany ndraiky nivolan̈a fa izio Elia, aviô nisy koa nivolan̈a fa izio araiky tamindrô mpaminan̈y aby taloha tan̈y nitsangana tamy maty. 9 Heroda nivolan̈a: “Jaona efa nitapahako loha. Azôvy fo basy olo ren̈iko man̈ano raha aby zen̈y?” Ke izy nitady fomba hahitan̈a Jesosy.
10 Apostoly aby io koa fa nimpody, nitantaraindrô tamy Jesosy raha jiaby nataondrô. Aviô irô nindesiny nitaokan̈a tamy tanàna araiky kahian̈a Betsaïda. 11 Kanefa nanjary hain’ny vahoaka raha zen̈y, ke izy narehandrô. Niraisiny tsarabe irô, baka iô izy nanomboko nikoran̈a tamindrô raha momba Fanjakan̈an’ny Zan̈ahary, ndreky nampajanga lan̈iany olo nila nitahan̈a. 12 Andra koa fa marikitry ho tsôfotro, nan̈aton̈o izy irô 12 Lahy aby io, ke ho irô taminany: “Ravàn̈a irô olo aby io, amy zen̈y irô mandeha amy tanàna man̈odidin̈y ndreky ambanivolo mitady tany handrian̈a ndreky hanin̈y hoanin̈y, fôtony tany misy atsika ty mitaokan̈a.” 13 Fa ho izy tamindrô: “Amezanarô raha hoanin̈y irô.” Ho irô: “Môfo dimy ndreky laoko aroe fo raha misy aminay. Izikoa tsy raha zahay donko handeha hivanga hanin̈in’olo jiaby io.” 14 Tamy zen̈y baka, nisy lelahy kadiriny 5 000 tiô. Kanefa ho Jesosy tamy mpianatranany: “Iraha mipetraka olo, ke ataova mitsitokotoko kadiriny 50 isaka andiany.” 15 Ke nataondrô raha zen̈y, baka iô nirahandrô nipetraka aby olo jiaby. 16 Nalain’i Jesosy môfo dimy ndreky laoko aroe aby in̈y, aviô izy nisan̈andra lan̈itry ke nitso-drano irô io. Nitapahany amizay irô io, baka iô namezany irô mpianatranany aby io, ke nirasaindrô tamy vahoaka. 17 Olo jiaby nihina ke voky. Izikoa fa navory lambin’ny hanin̈y tavela, izio nahafeno tanty 12.
18 Tafaran’izen̈y, an̈atiny izy mivavaka manaokan̈a in̈y, irô mpianatranany aby io nan̈aton̈o izy, ke izy nan̈ontany irô: “Azôvy ma fahaizan’olo zaho?” 19 Karaha ty ho irô: “Jaona Mpan̈ano Batisa. Sasany ndraiky mivolan̈a: Elia. Fa misy koa mivolan̈a: Araiky amindrô mpaminan̈y aby taloha tan̈y nitsangana tamy maty.” 20 Fa baka tiô ho izy tamindrô: “Anarô ke, azôvy fahaizanarô zaho?” Ho Petera: “Kristin’ny Zan̈ahary.” 21 Ke nifeperiny mare irô tsy han̈ambara raha zen̈y tamin’olo, 22 baka iô ho izy: “Zanak’olo tsy maintsy hiaritry fijalian̈a maro, baka iô irô anti-pan̈ahy ndreky lohandohan’ny mpisôron̈o aviô mpanoratra lalàn̈a aby io tsy han̈eky* izy. Hivonen̈a izy, baka iô amin’ny andra fahatelo izy hatsangana.”
23 Aviô karaha ty ho izy tamin’olo jiaby: “Izikoa misy olo tihan̈ara-dia zaho, izy tsy tôkony han̈eky ain̈inany* eky fa, isan’andra izy tôkony hitondra hazofijalian̈anany* ke han̈araka zaho fo. 24 Fôtony ho foaty lan̈iany olo mitady fomba han̈avaotany ain̈inany, fa lan̈iany olo mahafoe ain̈inany fôtony izy mpan̈ara-dia zaho, han̈avotro izio.* 25 Ino edy varany izikoa olo araiky mahazo raha jiaby amy donia ty, kanefa fahin̈ananany very na koa potiky fiainan̈anany? 26 Fôtony lan̈iany olo men̈atra aminaka ndreky amy volan̈anaka, ho men̈atra amin’olo zen̈y koa Zanak’olo lera izy avy amy voninahitrinany ndreky nin’ny Babany aviô nindrô anjely masin̈y aby io. 27 Kanefa ambarako anarô marin̈y tsarabe fa, sasany amin’olo aby mitsangana eto tsy ho foaty foeky, izikoa tsy efa mahita Fanjakan̈an’ny Zan̈ahary.”
28 Valo andra tafaran’ny nivolan̈any raha aby zen̈y, Petera ndreky Jaona aviô Jakoba nindesiny niaraka taminany nanonga tamy bongo tan̈y nivavaka. 29 Izikoa izy fa nivavaka, niova fahitan̈a saoranany aviô lambanany nanjary fotsy nangilangilatra. 30 Ke indriô nisy lelahy aroe nikoran̈a taminany: Mosesy ndreky Elia. 31 Feno voninahitry irô koa fa niboaka, aviô irô nikoran̈a mikasiky fomba handihanan’i Jesosy; izio ho tanteraka tsy ho ela a Jerosalema an̈y. 32 Petera ndreky irô olo niaraka taminany aby io tamy zen̈y efa sokoen-tôro mare. Fa irô koa fa tafifaoha tsarabe, irô nahita voninahitrin’i Jesosy ndreky olo aroe lahy nitsangana niaraka taminany. 33 Ke irô roe lahy io koa fa hiala tamy Jesosy tiô, karaha ty ho Petera tamy Jesosy: “A Mpampianatra, pare amintsika tsarabe eto. Ambilà zahay hanangana tran̈olay telo, ke araiky ninao, araiky nin’i Mosesy, baka iô araiky nin’i Elia.” Kanefa tsy hainy aby dikan’ny raha nivolan̈iny. 34 An̈atiny izy mbala nivolan̈a zen̈y in̈y, nisy rôndro nifôron̈o baka iô nanakotro irô; ke navozo mare irô izikoa fa nitakaofan’ny rôndro io. 35 Aviô nisy feo baka tamy rôndro io nivolan̈a karaha ty: “Io Zanako, araiky nifidiko. Tandrin̈esa izy.” 36 An̈atin’ny feo io mbala mivolan̈a fo, Jesosy zaraiky fo hitandrô tiô. Nangin̈y jay irô mpianatra aby io, ke mbala tsy nitantaraindrô tamin’olo antsendriky raha hitandrô.
37 Amarain’izin̈y, irô koa fa nijotso baka tamy bongo io, nisy vahoaka marobe nitsena izy. 38 Indriô nisy lelahy baka tamy vahoaka tao nandronton̈o izy karaha ty: “Mpampianatra, mafadiana kony e! Mba zahava kony zanako,* fa izy zaraiky fo zanako. 39 Izy nisaraon̈an’ny fan̈ahy ratsy ke iô fo izy miafatrafatra. Tsaiky io ataon’izio mitsipatsipaka ndreky mifaorafaora ranivy. Efa maradratra mare zanako io vo ialàny. 40 Irô mpianatranao aby io efa niangaviako han̈aboaka izio, fa tsy vitandrô.” 41 Ke ho Jesosy: “Taranaka tsisy finoan̈a ndreky ratsy fan̈ahy! Ziska ombian̈a ma zaho tsy maintsy hidôko aminarô eto ndreky handefitry aminarô? Indesa atỳ zanakanao.” 42 Tsaiky io koa fa nan̈aton̈o, narampin’ny demony io tamy tany izy, sady nataony nitsipatsipaka mare. Kanefa fan̈ahy maloto io nisiahan’i Jesosy, ke janga tsaiky lelahy io, baka iô izy natôndron’i Jesosy tamy babany. 43 Ke lany fan̈ahy olo jiaby izikoa fa nahita angôvo maventin’ny Zan̈ahary.
An̈atiny olo jiaby mbala rikian̈a tamy raha jiaby nataon’i Jesosy in̈y, karaha ty ho izy tamy mpianatranany: 44 “Tandrin̈esa tsarabe aviô alaiva onon̈o raha volan̈iko ty: Hisy olo hamadiky Zanak’olo ke hanolotro izy am-pelatan̈anandrô fahavalo aby io.” 45 Kanefa tsy nazava tamindrô foeky raha nivolan̈iny. Nasitriky irô baka raha zen̈y beky tsy ho azondrô, aviô irô navozo han̈ontany izy momba raha zen̈y.
46 Irô baka tiô nanomboko nimalo momba azôvy ny farany be tamindrô. 47 Hain’i Jesosy raha tan̈atin’ny fôndrô, ke izy nangala tsaiky hely araiky, natsangany tankilanany tiô, 48 aviô ho izy tamindrô: “Lan̈iany olo mandray tsaiky hely ty, baka amy fan̈ajany an̈aran̈anaka, mandray zaho koa. Aviô zay olo mandray zaho, mandray Araiky nan̈iraka zaho koa. Fôtony lan̈iany mihevi-ten̈a* ho farany hely aminarô jiaby, izy ny farany be.”
49 Ho Jaona: “A Mpampianatra, zahay nahita olo zay nampiasa an̈aran̈anao izikoa fa nan̈aboaka demony. Namango zahay nisakan̈a izy fôtony izy tsy miaraka amintsika.” 50 Ho Jesosy taminany: “Anarô aza man̈aohatra hisakan̈a izy, fôtony lan̈iany olo tsy manohitry anarô, miaraka aminarô.”
51 Izikoa fa nahainan̈aton̈o* fotoan̈a handeha hangalan̈a izy hanonga an-dan̈itry an̈y, izy ten̈a tapa-kevitry handeha a Jerosalema. 52 Ke izy nandefa iraka handeha alohanany. Lôso irô ke niditry tamy tanànan’ny Samaritanin̈y, handeha han̈oman̈a faviany. 53 Fa olo tao tsy nandray izy, fôtony izy efa tapa-kevitry handeha a Jerosalema. 54 Jakoba ndreky Jaona mpianatra koa fa nahita raha zen̈y, irô nivolan̈a: “Tômpo, tianao ma zahay hivolan̈a baka hisy môtro hilatsaka baka an-dan̈itry ke handripaka irô?” 55 Fa izy nitodiky, baka iô irô nisiahany. 56 Ke irô nifindra tamy tanàna hafa.
57 Irô koa fa tamy lalan̈a, nisy olo nivolan̈a taminany: “Zaho han̈araka anao ndray aia ndray aia tany himboanao.” 58 Kanefa Jesosy nivolan̈a: “Amboadỳ misy lavaka hisitrihan̈a, aviô vôron̈o* misy tran̈ony, fa Zanak’olo ndraiky tsisy tran̈o!”* 59 Baka iô karaha ty ho izy tamin’ny araiky hafa: “Alô han̈araka zaho.” Lelahy io nivolan̈a: “Tômpo, ambilà antsendriky zaho handeha handevin̈y babako.” 60 Fa ho izy taminany: “Ambilà olo maty handevin̈y olo maty, fa mindao anao mandeha man̈ambara Fanjakan̈an’ny Zan̈ahary.” 61 Mbala nisy olo hafa koa nivolan̈a: “Zaho han̈araka anao, Tômpo. Fa ambilà antsendriky zaho handeha han̈ano veloma irô olo an-tran̈onaka an̈y.” 62 Ho Jesosy taminany: “Tsisy olo mitana lasarỳ sady mitodiky afara, ke vain̈y hiditry amy Fanjakan̈an’ny Zan̈ahary.”