Vaovao Tsara Nisoratin’i Jaona
12 Tsiota andra talohan’ny Pasky, Jesosy navy ta Betania. Tao tany nisy Lazarosy, araiky natsangany tamy maty in̈y. 2 Tao nisy olo niainvite izy hihinan̈a hanin̈y hariva. Marta nikarakara hanin̈indrô, fa Lazarosy ndraiky an̈isandrô olo nihinan̈a* niaraka taminany. 3 Maria baka iô nangala menaka man̈itry livra* araiky. Izio narda ten̈a izy sady lafo mare. Nararany tamy vitin’i Jesosy izio, aviô vitin’i Jesosy nifôriny tamy fan̈evanany. Nanjary nan̈itry tran̈o jiaby azon’ny fofon̈on’ny menaka io. 4 Fa ho Jodasy Iskariota, araiky tamindrô mpianatranany aby io, araiky efa handeha hamadiky izy io: 5 “Nan̈ino ma menaka man̈itry in̈y tsy nalafo 300 denaria, aviô vola namezan̈a olo masikiny?” 6 Tsy baka amin’izy miasaloha amin’olo masikiny nahavy izy nivolan̈a zen̈y, fa fôtony izy mpangalatra. Izy baka nitana boatim-bolandrô, aviô izy efa zatra nangalatra vola tan̈atin’izio tao. 7 Ke ho Jesosy: “Ialanao izy, fa han̈oman̈ana andra handiven̈ana zaho antony mahavy izy man̈ano izio. 8 Hisy olo masikiny fo aminarô iô, fa zaho ndraiky tsy hidôko aminarô iô fo.”
9 Tan̈atin’ny fotoan̈a zen̈y, naro Jiosy nanjary nahay fa izy tao. Fa tsy baka tamy Jesosy fo antony naviandrô, fa irô koa mba tihahita Lazarosy, araiky natsangany tamy maty in̈y. 10 Irô lohandohan’ny mpisôron̈o aby io nan̈ano tetiky hamonoan̈a Lazarosy koa, 11 fôtony baka taminany nahavy Jiosy marobe nandeha tan̈y, ke nino Jesosy.
12 Amarain’izin̈y, vahoaka marobe navy tamy fety io naharen̈y fa Jesosy ho avy a Jerosalema. 13 Ke irô nandeha nangala sampan̈an’ny palmie, baka iô irô nandeha nitsena izy, sady nandronton̈o karaha ty: “Mba vonjia kony izy e! Irarian̈a hahazo hatsaran̈a araiky avy amin’ny an̈aran̈an’i Jehovah, tsy azôvy zen̈y fa Mpanjakan’Israely.” 14 Jesosy koa fa nahita zanaka borìky, izy nipetraka tan̈abon’izio, eraka raha efa voasoratra ty: 15 “Aza mavozo anao, zanakavavin’i Ziona. Zahava, indriô mpanjakanao man̈aton̈o anao, izy mitenginy zanaka borìky.” 16 Tsy nazava tamindrô mpianatranany aby io raha zen̈y tamy voanalohany, fa lera Jesosy namezan̈a voninahitry, nazondrô onon̈o fa raha aby zen̈y efa voasoratra momba izy, aviô raha aby zen̈y nataondrô taminany.
17 Irô vahoaka aby niaraka taminany ke nahita izy nikaiky Lazarosy hiboaka baka am-pasan̈a ndreky nanangana izy tamy maty in̈y tsy vôly nitantara raha hitandrô. 18 Zen̈y koa nahavy irô olo aby io nandeha nitsena izy, fôtony ren̈indrô fa izy nan̈ano fahagagan̈a. 19 Ke irô Fariseo aby io nifampikoran̈a karaha ty: “Hitanarô io! Atsika tsisy raha vitantsika foeky. Zahava baka fa man̈araka izy aby donia ty!”
20 Nisy Griky koa an̈isan’olo navy handeha hivavaka, tamin’ny andra fety. 21 Ke irô nan̈aton̈o Filipo, araiky baka Betsaïda a Galilia, ke niangavy izy: “A tômpoko anao, zahay mba tihahita Jesosy.” 22 Filipo nandeha nivolan̈a raha zen̈y tamin’i Andrea. Andrea ndreky Filipo amizay nandeha nivolan̈a raha zen̈y tamy Jesosy.
23 Kanefa ho Jesosy tamindrô: “Navy lera han̈amezan̈a voninahitry Zanak’olo. 24 Ankitikitin̈y, ambarako anarô marin̈y tsarabe fa, izikoa voam-bary araiky tsy latsaka amy tany ke maty, izio hidôko voam-bary araiky fo. Fa izikoa ndraiky izio maty, izio hamokatra mare. 25 Lan̈iany olo tia ain̈inany handrobaka izio, fa lan̈iany olo mankahala ain̈inany amy donia ty hiaro izio ke hahazo fiainan̈a mandrakizay. 26 Zay olo tihanompo zaho, izy tôkony han̈araka zaho, aviô zay tany misy zaho misy mpanomponaka koa. Zay olo manompo zaho hamezan’ny Baba voninahitry. 27 Miasaloha mare zaho zen̈y! Ino eky raha hivolan̈iko? A Baba, avaota zaho baka ho afaka amy lera ty. Kanefa, efa baka amy lera ty edy antony naviako. 28 Baba, ameza voninahitry an̈aran̈anao.” Baka iô nisy feo baka tan-dan̈itry nivolan̈a karaha ty: “Efa namezako voninahitry izio, ary zaho mbala han̈amia voninahitry izio ndraiky koa.”
29 Izikoa fa ren̈in’ny vahoaka nitsangana tiô raha zen̈y, irô nivolan̈a fa nisy difibaratra. Sasany ndraiky nivolan̈a: “Nisy anjely nikoran̈a taminany.” 30 Ho Jesosy: “Feo tiô in̈y tsy natao ninaka, fa natao ninarô. 31 Navy eky iziô lera hitsaran̈a donia ty, ke mpitondra donia ty hitoravan̈a. 32 Fa zaho koa fa ampanongain̈a baka ambony tany,* zaho hitaon̈o karazan̈an’olo jiaby han̈aton̈o zaho.” 33 Nivolan̈a zen̈y izy han̈ambaran̈a fomba hifatesany tsy ho ela. 34 Ke ho irô vahoaka aby io taminany: “Ren̈inay tamy Lalàn̈a tao fa Kristy haharitry* mandrakizay. Akôry ivolan̈anao fa Zanak’olo tsy maintsy ampanongain̈a?* Azôvy ma Zanak’olo zen̈y?” 35 Ho Jesosy tamindrô: “Hely tavela fotoan̈a hidokoan’ny hazavan̈a aminarô iô. Ke mandihana diany anarô mbala manan̈a hazavan̈a, amy zen̈y anarô tsy ho resin’ny hiziky. Lan̈iany mandeha amin’ny hiziky tsy mahay tany imboany. 36 Diany anarô mbala manan̈a hazavan̈a, aboaha fa anarô mino hazavan̈a, amy zen̈y anarô hanjary zanakan’ny hazavan̈a.”
Jesosy nivolan̈a raha aby zen̈y, baka iô izy lôso ke nisitriky irô. 37 Ndray maro fahagagan̈a nataony man̈oloan̈a irô, irô tsy nino izy, 38 amy zen̈y ho tanteraka volan̈an’ny mpaminan̈y Isaia ty: “Jehovah, azôvy ma nino raha ren̈indrô baka taminay?* Aviô azôvy nan̈aboahan’i Jehovah baontan̈ananany?” 39 Irô tsy afaka nino fôtony karaha ty koa ho Isaia: 40 “Masondrô nataony gila baka iô fôndrô nataony mahery kafan̈a, baka masondrô tsy hahita aviô fôndrô tsy hahay dikan’ny raha zen̈y, tsao koa irô himpody aminaka ke zaho hampahivan̈a irô.” 41 Nivolan̈a raha aby zen̈y Isaia, fôtony izy nahita voninahitrin’i Kristy, baka iô izy nikoran̈a momba izy. 42 Kanefa ndray maro tamindrô mpitondra aby io nino izy, irô tsy nasaky namaosa raha zen̈y fôtony irô navozo irô Fariseo aby io, tsao fo irô ho voataora hiala amy synagoga. 43 Voninahitry baka amin’olombelon̈o baka tiatiandrô mandilatra voninahitry baka amy Zan̈ahary.
44 Kanefa Jesosy nivolan̈a mare karaha ty: “Lan̈iany olo mino zaho, tsy zaho fo inoany fa Araiky nan̈iraka zaho koa. 45 Aviô lan̈iany olo mahita zaho, mahita Araiky nan̈iraka zaho koa. 46 Zaho navy amy donia ty karaha hazavan̈a, amy zen̈y lan̈iany olo mino zaho tsy hidôko amin’ny hiziky. 47 Fa izikoa misy olo maharen̈y volan̈anaka kanefa tsy man̈araka irô io, zaho tsy hitsara izy; fôtony zaho tsy navy hitsara donia ty, fa han̈avotro donia ty. 48 Misy olo hitsara lan̈iany olo tsy mijery zaho ndreky tsy mandray volan̈anaka. Volan̈a nivolan̈iko hitsara izy amin’ny andra farany. 49 Fôtony zaho tsy nivolan̈a hevitrinaka, fa Baba nan̈iraka zaho nan̈amia zaho didy momba raha tôkony hivolan̈iko ndreky hambarako. 50 Baka iô haiko fa didinany hazahoan̈a fiainan̈a tsisy farany. Ke zay raha volan̈iko, volan̈iko eraka raha nivolan̈in’ny Baba taminaka.”