Vaovao Tsara Nisoratin’i Lioka
14 Tamy Sabata araiky zay, Jesosy nandeha nihinan̈a tamy tran̈on’ny araiky tamindrô Fariseo aby io; nizahavandrô tsarabe izy. 2 Indriô nisy lelahy avoan’ny aretin̈y biribiry* nan̈oloan̈a Jesosy. 3 Ke Jesosy nan̈ontany irô olo mahay Lalàna ndreky irô Fariseo aby io karaha ty: “Mety ma mampahivan̈a olo amin’ny andra sabata sa tsy mety?” 4 Fa irô nangin̈y fo. Ke lelahy io nikasihiny, nitahany, aviô izy nalefany nandeha. 5 Baka iô ho izy tamindrô: “Azôvy aminarô ma, izikoa zanany na aombinany latsaka an̈atin’ny vôvo, tsy direkty hampanonga izy baka ao, ndray Sabata andra?” 6 Ke irô tsy tafivolan̈a foeky.
7 Izikoa fa hitany fa irô olo aby nikahian̈a tamy fihinanan̈a io nifidy plasy farany mihaja, izy nan̈ano fan̈oharan̈a. Ho izy tamindrô: 8 “Anao koa fa kahian’olo han̈aton̈o fetin’ny mariazy, aza mangala* plasy farany mihaja. Ndraindray baka, misy olo mihajahajanao koa voakaiky. 9 Olo nikaiky anarô io han̈aton̈o anao ke hivolan̈a: ‘Ameza lelahy ty plasinao.’ Ke ho men̈atra anao handeha amy plasy farany afara. 10 Fa lera anao ainviten’olo, mindao mangala plasy farany afara. Amy zen̈y olo nikaiky anao io han̈aton̈o anao sady hivolan̈a: ‘Mandihana amy plasy alohaloha anao havako ô!’ Ke anao hahazo voninahitry man̈oloan̈a olo jiaby niaraka niainviten̈a taminao. 11 Fôtony ho voabaràka lan̈iany olo man̈ambony ten̈a, fa lan̈iany olo manetry ten̈a ndraiky hamezan̈a voninahitry.”
12 Aviô ho izy tamy lelahy niainvite izy io: “Anao koa fa mikaiky olo hihinan̈a matsan̈a na hariva, aza mikaiky namanao na rahalahinao na havanao na jiraninao mpan̈arivo aby io. Irô baka mety hiainvite anao koa, ke ho voavaly raha nataonao. 13 Fa anao koa fa hiainvite olo amy fety, kahia olo masikiny, misy antsa, malemy vity, aviô gila. 14 Amy zen̈y anao ho sambatra, fôtony irô tsy hahavita hamaly raha nataonao. Fa lera olo marin̈y hatsangana, iô anao hahazo valiny.”
15 Araiky tamin’olo aby ainvite tiô koa fa naharen̈y zen̈y, ho izy taminany: “Sambatra olo mihina* amy Fanjakan̈an’ny Zan̈ahary.”
16 Ho Jesosy taminany: “Nisy lelahy araiky nan̈oman̈a fihinanam-be,* ke izy nikaiky olo maro. 17 Izikoa fa navy lera fihinanan̈a hanin̈y hariva, izy nan̈iraka mpanomponany hikaiky olo jiaby niainviteny: ‘Mavia fa raha jiaby efa pare.’ 18 Kanefa irô jiaby nitady fialan-tsin̈y. Ho araiky voanalohany: ‘Zaho io nivanga vilo, ke mila mandeha an̈y zaho mizaha izio. Miala tsin̈y fa zaho tsy afaka.’ 19 Ho araiky hafa: ‘Zaho io nivanga aomby folo, ke handeha an̈y zaho hizaha* irô io. Miala tsin̈y fa zaho tsy afaka.’ 20 Karaha ty koa ho araiky hafa: ‘Zaho io vo baka nan̈ano mariazy, ke zaho tsy afaka man̈an̈y.’ 21 Lôso mpanompo io nandeha nitantara raha aby zen̈y tamy tômponany tan̈y. Neloko tômpin-tran̈o io, ke ho izy tamy mpanomponany: ‘Mindao malaky mandeha amy lalabe ndreky amy lalantsifotro an-tanàna an̈y; indesa atỳ irô olo masikiny, misy antsa, jamba, ndreky malemy vity.’ 22 Karaha ty ho mpanompo io izy koa fa tafimpody: ‘Tômpoko anao, vita aby raha jiaby nan̈irahanao zaho, kanefa mbala misy plasy fo ao.’ 23 Ke ho Tômpo io tamy mpanompo io: ‘Mindao mandeha amy lalan̈a ambelan̈an’ny tanàna an̈y. Forse handeha atỳ irô olo aby an̈y baka tran̈onaka ho feno. 24 Fôtony zaho man̈ambara anarô fa, tsisy amindrô olo niainviten̈a aby io foeky han̈andran̈a hanin̈y hariva namboariko.’”
25 Nisy vahoaka marobe dia araiky tamy Jesosy, ke izy nitodiky aviô ho izy tamindrô: 26 “Izikoa misy olo man̈aton̈o zaho, kanefa izy tsy mankahala* babany ndreky mamany ndreky vadiny ndreky zanany ndreky rahalahiny ndreky anabaviny, ia firaka amy fahin̈ananany foeky, izy tsy mety hanjary mpianatranaka. 27 Zay olo tsy mitondra hazofijalian̈anany* ke tsy man̈araka zaho, tsy mety hanjary mpianatranaka. 28 Azôvy aminarô ma iziô tihiasa tilikambo ke tsy mipetraka antsendriky hikônty ôtrino depansinany, misy ahitany izikoa mahampy hankifan̈a izio volanany va tsy mahampy? 29 Izikoa izy tsy man̈ano zen̈y, izy mety handatsaka fôtotro, kanefa tsy ho vitany hankefa izio. Han̈adroadro izy aby zay olo mahita izio, 30 ke ho irô: ‘Lelahy io nanomboko nan̈ôrin̈y tilikambo kanefa izio tsy vitany firaka am-parany.’ 31 Aviô, azôvy mpanjaka handeha hiady amy mpanjaka hafa ke tsy hipetraka antsendriky hangataka soso-kevitry, misy ahitany izikoa vitany na tsy vitany hiady amin’ny araiky manan̈a maramila 20 000, kanefa maramilanany 10 000? 32 Izikoa raha zen̈y tsy vitany, diany olo io mbala lavitry, izy han̈iraka ambasadera han̈ano raharaham-pihavanan̈a.* 33 Karaha zen̈y koa, lan̈iany olo tsy mahafoe fanan̈ananany jiaby tsy mety hanjary mpianatranaka.
34 “Tsara ankitin̈y sira, fa izikoa sira ndraiky manjary matsatso, ino eky raha han̈ampodianan̈a sironany? 35 Izio tsy mety hatao amy tany na amy zeziky, ke arian̈a* foeky. Lan̈iany manan̈a sofin̈y hindesin̈y mitandren̈y, mitandrin̈esa.”