Taratasy handeha amy Titosy
1 Zaho, Paoly, manoratra taratasy ty. Zaho mpanompon’ny Zan̈ahary salakady apôstôlin’i Jesosy Kristy, ary zaho manan̈a finoan̈a, karaha irô olo nifidin’ny Zan̈ahary aby io koa. Zaho tsy basiny mahay ny marin̈y fo fa, mifen̈y koa zaho hanan̈a fomba fiainan̈a tian’ny Zan̈ahary. 2 Raha jiaby zen̈y miôrin̈y amy fan̈antinan̈a fiainan̈a tsisy farany. Efa rango ela Zan̈ahary nampan̈anten̈a izio, ary izy tsy mahay mavandy. 3 Nataon’ny Zan̈ahary Mpan̈avotro atsika io raha nahavy volan̈anany ho hain’olo, tamy fotoan̈a hitany fa nety,* ke zaho namezany beko hitory momba Jesosy Kristy. 4 Taratasy ty handeha aminao Titosy; anao zanako, aviô mitovy raha inoantsika:
Irarian̈a anao han̈aboahan’ny Zan̈ahary Babantsika ndreky Kristy Jesosy Mpamonjy atsika hatsaram-pan̈ahy miavaka ndreky hamezandrô fiadanan̈a.
5 Anao nirahiko nidôko ta Kreta amy zen̈y anao han̈itsy raha mila ahitsy, ndreky hanendry anti-pan̈ahy isaka tanàna, eraka toromariky namezako anao aby ty: 6 Anti-pan̈ahy zen̈y tôkony ho* lelahy tsisy raha ivolan̈ana izy, tôkony hanan̈a vady araiky fo, aviô tôkony hanan-janaka mino Zan̈ahary sady tsy malaza man̈eram-pô man̈ano raha ratsy* ndreky tsy maditry. 7 Fôtony bakà, anti-pan̈ahy* zen̈y mpanompon’ny* Zan̈ahary, ke izy tsy tôkony misy raha hivolan̈ana izy, tsy mifaorse olo han̈araka hevitrinany, tsy mora meloko, tsy mamolava, tsy kafiry,* tsy tôkony ho tia vola ke han̈ano raha tsy marin̈y; 8 fa izy tôkony ho tia mandray vahiny, tia man̈ano ny tsara, mahay mandiniky,* man̈ano ny marin̈y, tsy mivadiky, mahafehy ten̈a, 9 aviô izy koa fa mampianatra, raha ampianariny tôkony hiôrin̈y amy raha marin̈y ampianarintsika,* amy zen̈y raha tsara ampianariny io tsy basiny hankahery olo fo fa, hahavitany han̈itsy lan̈iany olo manohitry fampianaran̈a io koa.
10 Maro bakà lelahy mahery andra, ndreky man̈ano koran̈a tsisy dikany, baka iô mamitaka olo, ary ankamaraozandrô io olo man̈izingizin̈y momba famosiran̈a. 11 Mila afody vavandrô olo aby io fôtony irô tsy vôly man̈ano raha hampihen̈y* finoan̈an’ny fianakavian̈a sasany. Irô bakà mampianatra raha tsy marin̈y misy hazahoandrô raha. 12 Misy mpaminan̈indrô araiky zay nivolan̈a karaha ty: “Olo baka a Kreta mpavandy, bibidỳ masiaka, aviô tsy basiny kamo fo fa mbala angoain̈y koa.”
13 Marin̈y raha zen̈y. Ke anao aza vôly man̈anatra irô mare, amy zen̈y irô ho fatatra finoan̈a, 14 sady tsy hitandren̈y angano jiosy ndreky didy baka amin’olo niala amy fampianaran̈a marin̈y. 15 Amin’olo madio, madio aby raha jiaby; fa amin’olo maloto sady tsy mino Zan̈ahary ndraiky tsisy raha tsy maloto, fôtony maloto jerindrô ndreky feon’ny fieritreretan̈andrô. 16 Irô mivolan̈a mahay Zan̈ahary, kanefa tsy hita amy raha ataondrô foeky raha zen̈y, fôtony irô io man̈ano raha tsy tian’ny Zan̈ahary ndreky tsy man̈araka volan̈anany baka iô tsy man̈eva* man̈ano asa tsara foeky.