Vaovao Tsara Nisoratin’i Matio

26 Jesosy koa fa baka nivolan̈a raha jiaby zen̈y, ho izy tamy mpianatranany: 2 “Hainarô fa afaka andra aroe, ho avy Pasky, ke Zanak’​olo hatolotro amy fahavalonany aby io, baka iô izy hahanton̈o* amy pôtô.”

3 Ke irô lohandohan’​ny mpisôron̈o ndreky irô anti-pan̈ahin’​ny vahoaka aby io nivory tan-dakoron’​ny mpisôron̈obe. Kaiafa an̈aran̈anany. 4 Irô nan̈ano jery araiky fa hampiasa hafitsian̈a hanambaoran̈a Jesosy, aviô hamono izy. 5 Kanefa ho irô: “Sitrany tsy amy fety fa tsao han̈ajima vahoaka ay!”

6 Tamy Jesosy ta Betania, tan-tran̈on’​i Simona, araiky efa navy boka in̈y, 7 nisy man̈angy nan̈aton̈o izy. Viavy io nitondra tavoangy vatosanga nisy menaka man̈itry. Lafo mare vangan’​ny menaka io. Jesosy mbala tam-pihinanan̈a* in̈y, nararan’​ny viavy io tamy lohan’​i Jesosy menaka io. 8 Izikoa fa hitandrô mpianatra aby io raha zen̈y, irô tsy ravoravo, ke ho irô: “Nan̈ino ma menaka in̈y nilanilanian̈a karaha in̈y? 9 Izin̈y raha tôkony nalafo, baka iô nazahoan̈a vola be hamezan̈a olo masikiny.” 10 Hain’​i Jesosy raha nivolan̈indrô, ke ho izy tamindrô: “Nan̈ino ma man̈angy io ataonarô karaha io? Tsara kony raha nataony taminaka ay! 11 Hisy olo masikiny fo aminarô iô, fa zaho ndraiky tsy hidôko aminarô iô fo. 12 Nan̈idin̈y menaka man̈itry in̈y tamin’​ny ain̈inaka izy, fôtony izy tihan̈oman̈a fandiven̈ana zaho. 13 Ambarako anarô mazava tsarabe fa, ndray aia ndray aia hitorian̈a vaovao tsara ty ambony tany eto, tsy maintsy hitantarain̈a koa raha nataon’​ny man̈angy io, misy ahatsiaraovan̈a izy.”

14 Ke araiky tamindrô apostoly 12 aby io, tsy azôvy zen̈y fa Jodasy Iskariota, nandeha tamindrô lohandohan’​ny mpisôron̈o tan̈y, 15 ke ho izy tamindrô: “Ino raha hamezanarô zaho misy hamadihako izy, ke hanambaoranarô izy?” Nifan̈araka irô fa han̈amia izy sekely volafotsy 30. 16 Ke nanomboko tamy zen̈y, izy tsy vôly nitady fotoan̈a mety tsarabe hamadihan̈a Jesosy.

17 Tamin’​ny andra voanalohany hankalazan̈a Fetin’​ny Môfo Tsisy Levira, nan̈aton̈o Jesosy irô mpianatranany aby io, ke ho irô taminany: “Aia tany tianao hikarakaranay raha hoanin̈y amy Pasky?” 18 Ho izy: “Mindao mandeha amy Folàny an-tanàna an̈y, ke volàn̈a aminany: ‘Karaha ty ho Mpampianatra: “Efa marikitry fotoan̈a hifatesako, ke zaho ndreky mpianatranaka hiaraka hankalaza Pasky an-tran̈onao ao.”’ ” 19 Nataondrô mpianatra aby io raha jiaby nan̈irahan’​i Jesosy irô, ke nikarakaraindrô aby raha nilain̈a tamy Pasky.

20 Andra koa fa hariva, nangala fipitrahan̈a* nan̈odidin̈y latabatra tiô izy ndreky irô mpianatranany 12 aby io. 21 Irô mbala tam-pihinanan̈a fo, Jesosy nivolan̈a: “Ambarako anarô mazava tsarabe fa, araiky aminarô io hamadiky zaho.” 22 Nalahelo mare irô koa fa naharen̈y zen̈y, ke irô samby nan̈ontany izy karaha ty: “Zaho ma zen̈y, Tômpo?” 23 Ho izy: “Araiky man̈ajobo tan̈anany miaraka aminaka an̈atin’​ny kapila, izy araiky hamadiky zaho. 24 Marin̈y fa Zanak’​olo handeha, eraka raha efa voasoratra momba izy, kanefa hidiran’​andra lelahy hamadiky Zanak’​olo! Tsaratsara tamin’​olo zen̈y aby tsy teraka foeky.” 25 Ho Jodasy, araiky handeha hamadiky izy io: “Zaho ma zen̈y, Raby?” Ho Jesosy taminany: “Efa izy edy raha volan̈inao zen̈y.”

26 Irô mbala tam-pihinanan̈a fo, Jesosy nangala môfo. Nivavaka izy, baka iô nitapatapahany izio, aviô nirasainy tamy mpianatranany. Ho izy: “Alaiva ty, hoana. Izity manôndro vatan̈anaka.”* 27 Nangala kôpy koa izy ke nan̈ano mersy Zan̈ahary, baka iô namezany irô kôpy io, sady ho izy: “Migiaha amy ty aby anarô jiaby. 28 lzity manôndro lionaka,* tsy ino zen̈y fa ‘lion’​ny fifan̈ikian̈a’ handeha halatsaka, baka olo maro hahazo familan-keloko nohon’​ny fahotan̈andrô. 29 Ty raha ambarako anarô: Zaho efa tsy higiaka divain eky parapavian’​ny andra higiahako divain vaovao miaraka aminarô, amy Fanjakan̈an’​ny Babako.” 30 Farany, irô koa fa baka nan̈ano hira han̈amezan̈a voninahitry Zan̈ahary,* irô nandeha tamy Bongo Olivy.

31 Ho Jesosy tamindrô: “Anarô jiaby io hiala zaho aby alin̈y ty baka amy raha hahazo zaho, fôtony ty raha efa voasoratra: ‘Hivangoeko mpiambin̈y ôndrikôndriky, ke hiparitaka ôndrikôndriky jiaby.’​ 32 Fa lera zaho hatsangana amy maty, zaho handeha a Galilia, ke an̈y zaho miambin̈y anarô.” 33 Fa ho Petera taminany: “Ndray hiala anao aby irô jiaby io baka amy raha havoa anao, zaho tsy hiala anao foeky!” 34 Ho Jesosy taminany: “Ambarako anao mazava tsarabe fa, alin̈y ty fo, akôholahy mbala tsendriky man̈ena, intelo aby anao han̈ano sary tsy hahay zaho.” 35 Fa ho Petera taminany: “Ndray zaho tsy maintsy ho foaty miaraka aminao, tsy honohono ho zaho foeky han̈ano sary tsy hahay anao zen̈y.” Nivolan̈a karaha zen̈y koa irô mpianatra hafa jiaby.

36 Jesosy ndreky mpianatranany baka tiô nandeha tamy zaridain’​ny Getsemane, ke ho izy tamindrô: “Anarô mipitraha eto fa zaho handeha hivavaka arỳ.” 37 Petera ndreky zanakan’​i Zebedio aroe lahy nindesiny niaraka taminany. Ke nanomboko nalahelo ndreky niasaloha mare izy. 38 Ho izy tamindrô: “Malahelo mare zaho zen̈y, karaha efa ho foaty. Midokoa eto anarô, ke miareta tôro miaraka aminaka.” 39 Niteky lavidavitry hely izy, sady nankôhoko aviô nivavaka karaha ty: “A Babako ô, izikoa mety, adosoa aminaka kôpy ty. Ndray izy man̈ano zen̈y, alô fo sitrapônao hatao fa tsy ninaka.”

40 Izy baka tiô nimpody tamy mpianatranany aby io, ke irô hitany nandry. Ho izy tamy Petera: “Anarô zalahy tsy nahavita niaritry tôro niaraka taminaka lera araiky foeky? 41 Miambesa ndreky mivavaha fo amy zen̈y anarô tsy ho resin’​ny fakam-pan̈ahy. Menimeny tihan̈ano,* fa nôfotro malemy.” 42 Lôso fan̈indroeny koa izy, ke nivavaka karaha ty: “A Babako ô, izikoa izity tsy mety adoso fa tsy maintsy higiahako, sitrany sitrapônao fo hatao.” 43 Izy koa fa nimpody ndraiky, irô mbala hitany nandry fo fôtony masondrô efa navesatra. 44 Ke ningiany irô, aviô lôso ndraiky koa izy nandeha nivavaka fan̈intelony. Mbala raha nivolan̈iny taloha in̈y fo nampodiny. 45 Izy baka iô nimpody ndraiky tamy mpianatra tiô, ke ho izy tamindrô: “Anarô mbala mandry ndreky mangala kajo fo amy fotoan̈a karaha ty zalahy! Efa marikitry kony lera hamadihan̈a Zanak’​olo ndreky hanoloran̈a izy am-pelantan̈anandrô mpanota aby io ay! 46 Mitsangàna, alô atsika handeha fa efa marikitry ao araiky hamadiky zaho.” 47 Izy mbala nivolan̈a fo, navy Jodasy, araiky tamindrô apostoly 12. Nisy vahoaka marobe nitondra sabatra ndreky kobay niaraka taminany. Irô io irakandrô lohandohan’​ny mpisôron̈o ndreky anti-pan̈ahin’​ny vahoaka.

48 Araiky handeha hamadiky izy io efa nivolan̈a tamindrô karaha ty: “Izy lan̈iany hirôfiko, ke sambaoranarô izy.” 49 Direkty izy nanjohizohy tamy Jesosy tarỳ, aviô izy nivolan̈a: “Mbalatsara, Raby!”, baka iô izy nirôfiny. 50 Fa ho Jesosy taminany: “Ino ma dianao atỳ?” Baka iô vahoaka aby io nan̈aton̈o, ke Jesosy nisambôrindrô, aviô nindesindrô. 51 Araiky tamin’​olo niaraka tamy Jesosy nan̈atsoaka sabatranany, baka iô nifirainy tamy zin̈y mpanompon’​ny mpisôron̈obe, ke nafaka sofin̈inany ilany. 52 Ho Jesosy taminany: “Sabatranao ampodiana an̈atin’​ny tran̈ony, fôtony hivonen̈a amy sabatra lan̈iany olo mampiasa sabatra. 53 Anao ma mieritreritry fa zaho tsy afaka miangavy Babako, ke ziôty izy handefa anjely marobe mandilatra andian-tafiky 12? 54 Fa izikoa zaho man̈ano zen̈y, akôry hampatanteraka raha koran̈in’​ny Soratra Masin̈y mivolan̈a fa raha mandalo ty tsy maintsy hiboaka?” 55 Baka iô ho Jesosy tamindrô vahoaka aby io: “Anarô mitondra sabatra ndreky kobay hanambotro zaho, karaha handeha hanambotro dahalo? Isan’​andra zaho nipetraka tamy tempoly tao nampianatra, kanefa anarô tsy nanambotro zaho. 56 Fa miboaka raha jiaby ty, baka ho tanteraka raha nisoratin’​ny mpaminan̈y.”* Ke niala izy aby mpianatranany jiaby sady lôso nilefa.

57 Irô olo nanambotro izy aby io ndraiky nitondra izy tamy Kaiafa mpisôron̈obe tan̈y. Irô mpanoratra lalàn̈a ndreky anti-pan̈ahy aby io efa nivory tan̈y tamin’​io. 58 Fa Petera ndraiky nan̈araka izy baka lavitry, firaka tan-dakoron’​ny mpisôron̈obe. Baka iô izy niditry tao ke nipetrapetraka niaraka tamindrô mpanompo aby io, fôtony tiany ho hita ino koa raha hiboaka man̈araka.

59 Ke irô lohandohan’​ny mpisôron̈o ndreky irô jiaby an̈isan’​ny Fitsaran̈a An̈abo* aby io nitady vavolombelon̈o hivolan̈a raha tsy marin̈y momba Jesosy, baka izy hivonen̈a. 60 Fa ndray naro vavolombelon̈o mavandy navy tiô, irô tsy nahita antony hamonoan̈a izy foeky. Baka iô nisy olo aroe navy, 61 ke ho irô: “Lelahy io nivolan̈a karaha ty: ‘Zaho mahavita mandravan̈a tempolin’​ny Zan̈ahary baka iô manangana izio an̈atin’​ny telo andra.’ ” 62 Ke mpisôron̈obe nitsangana sady nivolan̈a tamy Jesosy karaha ty: “Anao karaha tsy mivolan̈a! Tsy ren̈inao ma raha volan̈indrô momba anao zen̈y?” 63 Fa Jesosy jay fo. Ke ho mpisôron̈obe taminany: “Zaho man̈iraka anao hifanta amy Zan̈ahary velon̈o, ke ambarà zahay, anao ma Kristy Zanakan’​ny Zan̈ahary zen̈y?” 64 Ho Jesosy taminany: “Efa izy edy raha volan̈inao zen̈y. Fa zaho man̈ambara anarô: Manomboko iziô, ho hitanarô Zanak’​olo hipetraka ankavanan̈an’​ny Araiky Mahery* sady ho avy amy rôndron’​ny lan̈itry.” 65 Ke nitriarin’​ny mpisôron̈obe lambanany ambelan̈a, baka iô ho izy: “Tsy man̈isy fôtiny Zan̈ahary izy! Ino koa ma raha mbala ilavantsika vavolombelon̈o? Efa ren̈inarô izy tsy nan̈isy fôtiny Zan̈ahary tiô in̈y! 66 Akôry hevitrinarô?” Ho irô: “Izy man̈eva ho foaty.” 67 Ke nandrorandrô saoranany, baka iô nivangoandrô tombok’​ôndry izy. Sasany ndraiky nan̈amia izy tefan-tsofin̈y, 68 sady nivolan̈a karaha ty: “Ô Kristy e, aboaha iô baka anao mpaminan̈y zen̈y! Azôvy namopoko anao tiô in̈y?”

69 Petera tamin’​io ndraiky nipetraka tan-tany, tan-dakoro tao. Nisy mpanompovavy araiky nan̈aton̈o izy sady nivolan̈a: “Anao koa mba niaraka tamy Jesosy, araiky baka a Galilia in̈y!” 70 Kanefa izy nifamatra tankilan’​olo jiaby tiô, sady nivolan̈a: “Tsy zaho donko zen̈y fa olo hafa ay!” 71 Izy koa fa nan̈aton̈o tamy barô fidiran̈a amy lakoro io, nisy tsaiky man̈angy hafa koa nahita izy ke nivolan̈a karaha ty tamin’​olo aby tiô: “Lelahy io niaraka tamy Jesosy, araiky baka Nazareta in̈y!” 72 Mbala nifamatra fo izy salakady nifanta karaha ty: “Tsy haiko foeky lelahy zen̈y!” 73 Tsy elan’​izin̈y, irô olo aby nitsangana narikitry tiô nan̈aton̈o Petera ke ho irô taminany: “Anao zalahy namandrô ankitin̈y e! Ndray fomba fivolan̈anao* fo efa ahaizan̈a zen̈y.” 74 Ke nanomboko nan̈ozon̈o ain̈inany* izy sady nifanta karaha ty: “Tsy haiko foeky lelahy zen̈y ho zaho!” Tiô ny iô, nisy akôholahy nan̈ena. 75 Ke nazon’​i Petera onon̈o raha nivolan̈in’​i Jesosy ty: “Akôholahy mbala tsendriky man̈ena, intelo aby anao han̈ano sary tsy hahay zaho.” Ke lôso izy niboaka sady nitomoan̈y fôtony nare loatra alahelonany.